ZĨRINƆ 3
3
Gɔ̃gbɛ̃ ɛrɛ werekɔ̃anaa
1Zĩkea Pita kũ Yuhanao gɛ̀ɛ Luda ɔnn fãnantɛ̃ mɔ̀ aakɔ̃ aduakɛgɔrɔa. 2Gɔ̃gbɛ̃ ke kú gwe ò a ì ɛrɛ ũmɛ. Lákũ gu dìgɔ̃ dɔ nà òdi a sɛ́ ò su ò a ditɛ Luda ɔnn gãnu kũ òdi pi Gãnu Mana gũn. Gwen àdigɔ̃ bara kɛ gbɛ̃ kũ òtɛn gɛ̃ ɔn pìi gũnnɔa. 3Kũ à Pita kũ Yuhanao è, òtɛn su gɛ̃ Luda ɔnn, akũ à baraa kɛ̀ḿma. 4Ò wɛ́ pɛ̀a, akũ Pita pìnɛ: Ǹ ó gwa la. 5Akũ à wɛ́ pɛ̀ḿma àtɛni ń gba dã. 6Akũ Pita pìnɛ: Má ɔgɔ vĩro, ama pɔ́ kũ má vĩn mani n gba. Kũ Yesu Kirisi Nazɛra tɔ́o ǹ futɛ ǹ táa o. 7Akũ Pita a kũ̀ a ɔplaa à a fùtɛ a zɛ̀. Gwe gɔ̃̀nɔ a gbálanɔ kũ a gɛ̀sɛwaanɔ gbãna kũ̀. 8À vĩ̀ à zɛ̀, akũ à nà táa'onaaa. À gɛ̃̀ kũńwo Luda ɔnn àtɛn táa o àtɛn vĩvĩ àtɛn Luda sáabu kpá. 9Baadi pínki a è àtɛn táa o àtɛn Luda sáabu kpá, 10akũ ò a dɔ̃̀ barakɛri kũ àdigɔ̃ vutɛ Luda ɔnn Gãnu Manan ũ, akũ yã kũ à a lè ń kũ gbãna à bò ń sarɛ.
Pita waazikɛna Luda ɔnn
11Lákũ à na Pita kũ Yuhanaoa nà gu kũ òdi pi Sulemanu èdan, akũ baadi pínki tɛn gɛ̃ ń kĩnaa, kũ yã pìi bò ń sarɛ yãi. 12Kũ Pita gbɛ̃nɔ è, à pìńnɛ: Isarailanɔ, bɔ́ yã mɛ́ à tò yã pìi bò á sarɛɛ? Bɔ́ yã mɛ́ à tò á wɛ́ fĩ̀wá lɛɛ? Átɛn da ó zĩda gbãna kesɔ̃ ó ludayãmana mɛ́ à tò gbɛ̃ dí táa ò yá? 13Ó dizi káakunɔ Ibrahĩ kũ Isaakuo kũ Yakubuo Luda gwenaa kpà a zĩkɛri Yesua. Ákɔ̃nɔ sɔ̃ a a kpà gbãnadenɔa a bo a kpɛ Pilati kũ à zɛ̀ kũ a gbarɛnaao arɛ. 14A bo Luda gbɛ̃ mana kũ à kú adona pì kpɛ, akũ a wɛ́ kɛ̀ Pilatia à gbɛ̃dɛri gbarɛárɛ. 15A Wɛ̃̀ndikpammarii dɛ̀, akũ Luda a vù bona gan. A sèedadenɔn ó ũ. 16Yesunaanikɛna mɛ́ à tò gɔ̃gbɛ̃ kũ á a dɔ̃ átɛni a gwa dí wèrekɔ̃a Yesu tɔ́ gbãna yãi. Yesunaanikɛna mɛ́ à a gbà aafia á pínki wára. 17Tera ma gbɛ̃nɔ, má dɔ̃ kũ ákɔ̃nɔ kũ á gbãnadenɔ yã pìi kɛ̀ wɛ́sirakɛnaa gũmmɛ. 18Luda dò annabinɔnɛ arɛ, akũ ò gĩnakɛ ò pì ń pínki kũ Arumasihu ni wɛ́tãmma e, akũsɔ̃ à kɛ̀ lɛ. 19Abire yãi à nɛ̀sɛ litɛ à arɛ dɔ Ludaa, á durunnanɔ ni kɛ̃áwa de à suárɛ kũ nɛ̀sɛkpatɛnaao 20à Yesu kũ à gĩnakɛ à a dìtɛárɛ Arumasihu ũ pì zĩáwa. 21Séde àgɔ̃ kú musu gĩa ari gɔrɔ kũ Luda ni pɔ́ pínki kɛkɛ à kɛ dufu, lákũ à dà a annabinɔnɛ nà ò ò zaa káaku. 22Musa pì, Dikiri á Luda ni á gbɛ̃ke sɛ́ annabi ũ lán a bà. À yã kũ ani oárɛ ma pínki. 23Gbɛ̃ kũ adi annabii pì yã ma sɔ̃ro, Luda ni ade bo á tɛ́ à a dɛmɛ. 24Annabi kũ ò Luda yã ònɔ pínki naana Samuɛli kĩnaa gɔrɔ díkĩna baaruu kpà. 25Yã kũ annabii pìnɔ òo kũ Luda bàka kũ à kú kũ á dizi káakunɔo gɔ̃̀ á pɔ́ ũ, lákũ à ò Ibrahĩnɛ nà à pì áni arubarika da andunia buri pínkigu a buri gãi. 26Kũ Luda a zĩkɛri pìi dìtɛ, à a zĩ̀áwa káaku, de à arubarika daágu à á baadi kpɛ li a yãvãnikɛnanɔnɛ.
Currently Selected:
ZĨRINƆ 3: BB2005
Highlight
Share
Copy
Want to have your highlights saved across all your devices? Sign up or sign in
Bisã Bible © SIM International, 2005.
