ZĨRINƆ 2

Luda Nini kipanaa

1Kũ Pɛntikɔsi dikpɛ gɔrɔ kà, ò kú gu dokɔ̃nɔa ń pínki. 2Kãnto ò kĩni mà bona ludambɛ lán zàga'ĩa gbãna bà, akũ kpɛ́ kũ ò vutɛna wã̀. 3Ò pɔ́ è lán tɛ́nɛnɛnɔ bà à fã̀kɔ̃a à dìdi ń baadia. 4Akũ Luda Nini kìpaḿma ń pínki, akũ ò nà yãkeburi'onaaa lákũ Nini pì ń gbá lɛ́ nà.

5Yuda kenɔ kú Yurusalɛmu gwe, ludayãmari kũ ò bò andunia bùsu sĩnda pínki gũnnɔ ũ. 6Kũ ò ń zuka pìi mà, ò kàkarańyĩ dasidasi, akũ ò bídi kɛ̀, kũ ò mà òtɛni ń gbɛ̃ sĩnda pínki buri yã o. 7Yã pì ń kũ gbãna à bò ń sarɛ ò pì: Yã'orii pìnɔ bi Galilidenɔmɛ ń pínkiroo? 8À kɛ̀ dera o mà òtɛni ó baadi bùsu yã oo? 9Patianɔ kũ Midianɔ kũ Elamunɔn ó ũ kũ gbɛ̃ kũ ò kú Mɛsɔpɔtamianɔ kũ Yudeao kũ Kapadosiao kũ Pɔntuo kũ Asiao 10kũ Firigiao kũ Pamfiliao kũ Misilao kũ Libia bùsu kũ à kú Sirɛni sarɛo kũ gbɛ̃ kũ ò bò Romunɔ. 11Yudanɔ kũ gbɛ̃ kũ ò ń donyĩ zɛ́ sɛ̀nɔn ó ũ kũ Kɛrɛtinɔ kũ Larubunɔ, akũ ótɛn ma òtɛn Luda yãbonsarɛ kɛnanɔ o kũ ó baadi buriyãnɔ. 12Yã pì ń kũ gbãna ò bídi kɛ̀, òtɛn kɔ̃ lala òtɛn pi: Yã kpate takan gwee? 13Gbɛ̃kenɔ sɔ̃ òtɛni ń lalandi kɛ ò pì: Í mɛ́ à ń kũ.

Pita waazikɛnaa

14Akũ Pita fùtɛ à zɛ̀ kũ a gbɛ̃ kpara gbɛ̃nɔn kuri awɛɛdonɔ à yã ò gbãngbãn à pì: Ákɔ̃nɔ Yudanɔ kũ gbɛ̃ kũ á kú Yurusalɛmunɔ pínki, à sã kpá à tó mà yã pì oárɛ. 15Í dí gbɛ̃ pìnɔ kũ lákũ átɛn da nàro, zaakũ kɔnkɔ mɔ̀ kɛ̃ndon tera. 16Yã kũ annabi Yoɛli òon dí:

17Luda pì:

Gɔrɔ kpɛdenɔ zĩ mani ma Nini pisi gbɛ̃ sĩnda pínkia,

á nɛ́gɔ̃gbɛ̃nɔ kũ á nɛ́nɔgbɛ̃nɔ ni annabikɛyã o,

á kɛfɛnnanɔ ni wɛ́gupu e,

á mare zɔ̃kɔ̃nɔ ni nana o.

18Gɔrɔ birenɔa

mani ma Nini pisi ma zɔ̀blerinɔa

gɔ̃gbɛ̃nɔ kũ nɔgbɛ̃nɔ ń pínki

oni annabikɛyã o.

19Mani sèedanɔ kɛ musu,

mani yãbonsarɛnɔ kɛ andunia gũn,

aru kũ tɛ́o kũ túsukpɛ síi lukuo nigɔ̃ kún.

20Ifãntɛ̃ ni sira kũ,

mɔvura ni tɛ̃ra kũ lán aru bà

ari Dikiri sugɔrɔ zɔ̃kɔ̃ gakuride gɔ̃ gɛ́ ká,

21gbɛ̃ sĩnda pínki kũ òdi Dikiri sísinɔ ni bo.

22Isarailanɔ, à yã dí ma. Lákũ á dɔ̃ á zĩdanɛ nà, Luda Yesu Nazɛra mɔ̀árɛ a gbɛ̃ ũ kũ daboyãnɔ kũ yãbonsarɛnɔ kũ sèeda kũ à kɛ̀ a gãi á tɛ́nɔ. 23Luda zɛ̀o a pɔyenyĩna kũ a dɔ̃naao gũn kũ ò a kpàáwa, akũ a tò kifirinɔ a pà lía ò a dɛ̀. 24Akũ Luda ga bàa pòroa à a vù, zaakũ à zɛ́ vĩ kũ ga ni fɔ̃ àgɔ̃ a kũnaro. 25Zaakũ Dauda a yã ò à pì:

Madìgɔ̃ Dikiri e ma wɛ́n gɔrɔ sĩnda pínki,

lákũ à kú ma ɔplai nà

pɔ́ke ni ma lukaro.

26Abire yãin ma pɔ dìgɔ̃ nna,

ma nɛ̀sɛgũn pù.

Ma tãmaa vĩ kũ ma mɛ̀ nigɔ̃ kun,

27zaakũ ĩni ma tó mira gũnlo,

ĩni we n gbɛ̃ kũ à kú adona yagi kũro.

28N ma da wɛ̃̀ndi zɛ́a,

ma pɔnna nigɔ̃ pana n kĩnaa.

29Ma gbɛ̃nɔ, mani fɔ̃ mà ó dizi káaku Dauda yã oárɛ swáswa. À gà ò a vĩ̀ a mira kú wɛ̃tɛ dín ari kũ a gbãrao. 30A annabikɛ gũn à dɔ̃̀ kũ Luda lɛ́ sɛ̀awa à pì, áni a burinɔ doke ká a kpatan. 31Dauda gĩnakɛ à Arumasihu vuna gan è, akũ à a yã ò à pì: Luda ni a tó mira gũnlo, ani we a mɛ̀ yagi kũro. 32Yesu pìin Luda a vù gan. A sèedadenɔn ó ũ ó pínki. 33Vutɛna Luda ɔplai à a Nini kũ à a lɛ́ sɛ̀wɛrɛ sì a Dea. Yã kũ átɛn e akũsɔ̃ átɛn ma tera de Luda Nini kũ à pìsiwá ũmɛ. 34Zaakũ adi kɛ Dauda mɛ́ à fùtɛ à gɛ̀ɛ ludambɛro, à pì:

Dikiri ò ma dikirinɛ à vutɛ a ɔplai

35ari àgɔ̃ a ibɛrɛnɔ kɛnɛ a tìntin ũ.

36Isarailanɔ, àgɔ̃ dɔ̃ sãnsãn kũ Yesu kũ a a pà líaan Luda dìtɛ Dikiri ũ, Arumasihu ũ dɔ.

37Kũ ò yã pìi mà, à ń zɔ̃, akũ ò Pita kũ zĩ̀ri kparanɔ là ò pì: Gbɛ̃nɔ, óni kɛ deraa? 38Akũ Pita pìńnɛ: Á baadi nɛ̀sɛ litɛ à da'itɛ kɛ kũ Yesu Kirisi tɔ́o, á durunnanɔ ni kɛ̃áwa áni Luda Nini sí gba ũ. 39Zaakũ lɛ́ kũ Luda sɛ̀ɛ pì de á pɔ́ ũmɛ kũ á nɛ́nɔ kũ gbɛ̃ kũ ò kú zã̀nɔ, gbɛ̃ kũ Dikiri ó Luda ni ń sísi pìnɔ ń pínki. 40À yã pãndenɔ òńnɛ dasi à nàkaraḿma à pì: À á zĩda bo gbãragbɛ̃ vãni dínɔ tɛ́. 41Akũ gbɛ̃ kũ ò a yã pìi sìnɔ da'itɛ kɛ̀. Zĩ birean ò kàra ń tɛ́ gbɛ̃nɔn wàa gɛ̃ro. 42Ò laakarii dɔ̀ zĩ̀rinɔ yãdannɛnaaa kũ kɔ̃gbɛ̃kɛnaao kũ Dikiri pɔ́blenaao kũ aduakɛnaao.

Yesudenɔ kunna kũ kɔ̃o

43Zĩ̀rii pìnɔ tɛn sèeda kũ yãbonsarɛnɔ kɛ, akũ vĩna gbɛ̃ sĩnda pínki kũ̀. 44Dikiri náanikɛrinɔ pínki gã̀ dokɔ̃nɔmɛ. Pɔ́ kũ ò vĩnɔ gɔ̃̀ ń pínki pɔ́ ũ. 45Tó ò ń pɔ́ kũ ò vĩnɔ yìa, òdi a ɔgɔ kpaatɛtɛkɔ̃nɛ lákũ baadi bɔkɔtɛ de nà. 46Lákũ gu dìgɔ̃ dɔ nà òdigɔ̃ kɔ̃ kakara Luda ɔnn, òdigɔ̃ pɔ́ ble kɔ̃ bɛa kũ pɔnnao kũ nɛ̀sɛ mɛ̀n doo. 47Òdigɔ̃ Luda tɔ́ kpá, akũsɔ̃ òdigɔ̃ nna kũ baadi pínkio. Dikiri dìgɔ̃ gbɛ̃ kũ átɛni ń sura banɔ kara ń tɛ́ lákũ gu dìgɔ̃ dɔ nà.

Currently Selected:

ZĨRINƆ 2: BB2005

Highlight

Copy