ZĨRINƆ 1

Lɛ́sɛna Luda Nini yã musu

1Tiofilu, ma ònnɛ ma takada káaku gũn lákũ Yesu kɛ̀ nà kũ yã kũ à dàńnɛnɔ pínki zaa a naana gɔrɔ 2ari gɔrɔ kũ à yã dìtɛ a zĩ̀rinɔnɛ kũ Luda Nini gbãnao, akũ Luda a sɛ̀ à tà kãao a kĩnaa. 3Zaakũ a ganaa gbɛra à a zĩda mɔ̀ńnɛ à sèedayãnɔ kɛ̀ńnɛ dasi kũ à tò ò dɔ̃̀ sikaa sari kũ à bɛ̃nɛ. À a zĩda mɔ̀ńnɛ gɔrɔ bupla à kpata kũ à bò Luda kĩnaa yã òńnɛ. 4Kũ ò kakarana, akũ à pìńnɛ: Àsun bo Yurusalɛmuro. Àgɔ̃ lɛ́ kũ ma De sɛ̀árɛ dã, lákũ ma a yã òárɛ nà. 5Zaakũ Yahaya gbɛ̃nɔ da'itɛ kɛ̀ í gũmmɛ, ama gɔrɔ pla la mani á da'itɛ kɛ Luda Nini gũn.

Tana kũ Yesuo ludambɛ

(Maa 16:19-20; Luk 24:50-53)

6Kũ ò kakarana lɛ, akũ ò a là ò pì: Dikiri, gɔrɔ dí gũnn ĩni Isarailanɔ kpata ɛrańnɛ yá? 7À wèḿma à pì: Á zɛ́ vĩ àgɔ̃ gɔrɔ kesɔ̃ gɔrɔ zaka kũ ma De dìtɛ kũ a zĩda ikooo dɔ̃ro. 8Tó Luda Nini kìpaáwa, áni gbãna le àgɔ̃ de ma sèedadenɔ ũ Yurusalɛmu kũ Yudea bùsu gu sĩnda pínkio kũ Samaria bùsuuo ari à gɛ́ pɛ́ andunia lɛ́a. 9Yã bire onaa gbɛra Luda a sɛ̀ ń wára ari à gɛ̀ɛ à sã̀tɛ ń wɛ́a ludambɛ lukun. 10A tanaa gũn lákũ ń wɛ́ pɛ́ ludambɛa nà, akũ gbɛ̃nɔn pla kenɔ bò ò zɛ̀ ń sarɛ ò pɔ́kasa puranɔ dana. 11Ò pì: Galili bùsudenɔ, à kɛ̀ dera á zɛna átɛn ludambɛ gwaa? Yesu kũ Luda a bò á tɛ́ à tà kãao a kĩnaa pìi, ani ɛra à su lákũ a è àtɛn tá gwe nà.

Yudasi gɛ̃nɛkɛnaa

12Akũ ò kìpa Kùkpɛ sĩ̀sĩia ò sù Yurusalɛmu. Sĩ̀sĩi pìi zã̀ kũ Yurusalɛmuo à kà lán kiloo do taka bà. 13Kũ ò kà, akũ ò dìdi kpɛ́ musu, gu kũ òdigɔ̃ kún. Pita kú gwe kũ Yuhanao kũ Yamisio kũ Anduruo kũ Filipio kũ Tomasio kũ Batɔlɔmiuo kũ Matiuo kũ Alafeu nɛ́ Yamisio kũ Simɔ Kokarideo kũ Yamisi nɛ́ Yudasio. 14Ń pínki ń zĩda kpà aduakɛnaaa lɛɛlɛ kũ Mariama Yesu dao kũ Yesu dakũnanɔ kũ nɔgbɛ̃ kparanɔ.

15Gɔrɔ birea Pita fùtɛ à zɛ̀ Yesu ìba kũ ò kà gbɛ̃nɔn basuddo takanɔ tɛ́ à pì: 16Ma gbɛ̃nɔ, yã kũ Dauda ò kũ Luda Nini gbãnao Yudasi kũ à dò gbɛ̃ kũ ò Yesu kũ̀nɔnɛ arɛ yã musu, tilasimɛ Luda yã pì papa. 17Ó gbɛ̃ domɛ yã a baka kú ó zĩ díkĩna gũn. 18À zĩtɛ lù kũ ɔgɔ kũ à lè a vãnikɛnaa gũnwo. Gwen à bàkɛ̃ à lɛ̀tɛn, a nɛ̀sɛɛ pũ̀tã a nukãninɔ bɔ̀tɛ pínki. 19Yurusalɛmudenɔ pínki yã pìi mà, akũ ò tɔ́ kpà gu pìinɛ Akɛlɛdama kũ ń buri yão. Tɔ́ pìi pì gbɛ̃dɛri zĩtɛ. 20Ò a yã ò Zabura takada gũn ò pì:

A bɛ gɔ̃ bɛzĩ ũmɛ,

gbɛ̃ke súngɔ̃ kú a gũn doro.

Ò pì dɔ:

Gbɛ̃ pãnde gɔ̃ a gɛ̃nɛ ũ.

21-22A yã mɛ́ à tò gbɛ̃ kũ òdigɔ̃ tɛ́wái gɔrɔ kũ ó kú lɛɛlɛ kũ Dikiri Yesuo zaa Yahaya gbɛ̃nɔ da'itɛkɛgɔrɔa ari gɔrɔ kũ Luda a bò ó tɛ́nɔ, ò ń gbɛ̃ do bo àgɔ̃ de a vuna gan sèedade ũ kũoo. 23Akũ ò gbɛ̃nɔn planɔ bò, Yusufu kũ òdi pinɛ Baasaba òdi pinɛ dɔ Yusutu kũ Matiao. 24Akũ ò adua kɛ̀ ò pì: Dikiri, ń gbɛ̃ sĩnda pínki nɛ̀sɛ dɔ̃. Gbɛ̃nɔn pla dínɔ tɛ́ ǹ gbɛ̃ kũ n bò mɔwɛrɛ, 25de a bàka gɔ̃ kú kũ ókɔ̃nɔ zĩ̀rinɔ zĩ díkĩna gũn yãi, zĩ kũ Yudasi bòn à gɛ̀ɛ gu kũ kɔ̃ sɛ̀ kãao gũn. 26Akũ ò kàpaa kpà gbɛ̃nɔn pla pìnɔ yã musu. Akũ líkpana Matia kũ̀, akũ ò a dà zĩ̀ri gbɛ̃nɔn kuri awɛɛdonɔ tɛ́.

Currently Selected:

ZĨRINƆ 1: BB2005

Highlight

Copy