YUHANA 21

Yesu bo à suna a ìbanɔnɛ sɛ̀bɛ lɛ́a

1Abire gbɛra Yesu ɛ̀ra à a zĩda mɔ̀ a ìbanɔnɛ dɔ Tiberia sɛ̀bɛ lɛ́a. Lán dí bàn à a zĩda mɔ̀ńnɛ. 2Simɔ Pita kú lɛɛlɛ kũ Tomasi kũ òdi pinɛ Sìkao kũ Natanaɛli kũ à bò Kana, Galili bùsuuo kũ Zebedi nɛ́nɔ kũ Yesu ìba gbɛ̃nɔn pla pãndenɔ. 3Simɔ Pita pìńnɛ: Matɛn gɛ́ kpɔ̀ wɛtɛmɛ. Akũ ò pìnɛ: Ókɔ̃nɔ se óni gɛ́ kũnwo. Akũ ò gɛ̀ɛ ò gɛ̃̀ gó'itɛ gũn, ama odi pɔ́ke kũ gwãani birearo. 4Kũ gu tɛn su dɔ, Yesu zɛna bara, ama a ìbanɔ dí dɔ̃ kũ àkũmɛro. 5Akũ à lɛ́ zùńyĩ à pì: Gbɛ̃nɔ, ádi pɔ́ke le a kũ̀roo? Ò pì: Oi! 6Akũ à pìńnɛ: À birigi zu gó ɔplai áni pɔ́ kũ. Kũ ò zù, ò kpɔ̀ɔ kũ̀ dasidasi ò fù sɛna. 7Akũ ìba kũ Yesu yeii pìi pì Simɔ Pitanɛ: Dikirimɛ. Pita uta danaro. Kũ à mà ò pì Dikirimɛ, akũ à a uta sɛ̀ à dà à kùsi ía. 8Ìba kparanɔ tɛn birigi gátɛ pana kũ kpɔ̀ɔo òtɛn suo kũ góo, zaakũ ò zã̀ kũ baraoro, à de mita basɔɔro takalaro. 9Kũ ò bikũ̀ bara, ò burodii è katɛna gwe kũ kpɔ̀ɔo kpakpana tɛ́a. 10Yesu pìńnɛ: À mɔ́ kũ kpɔ̀ kũ a kũ̀ terao kenɔ. 11Akũ Simɔ Pita gɛ̃̀ gó gũn à birigi gàtɛ à bikũ̀o bara. À pana kũ kpɔ̀ gbɛ̃̀ntɛ̃nɔ mɛ̀n basuppla akuri awɛɛ'aakɔ̃. Bee kũ à dasi lɛ, táaru pì dí kɛ̃ro. 12Yesu pìńnɛ: À mɔ́ à pɔ́ ble. A ìba ke dí fɔ̃ à lɛ́ bò à a là dín a ũro, zaakũ ò dɔ̃ kũ Dikirimɛ. 13Yesu gɛ̀ɛ à burodii sɛ̀ à kpàḿma. Lɛn à kɛ̀ lɛ kũ kpɔ̀ɔo dɔ. 14Yesu a zĩda mɔna a ìbanɔnɛ gɛ̃̀n aakɔ̃den gwe a vuna gan gbɛra.

Yesu kũ Pitao

15Kũ ò pɔ́ blè ò làka, Yesu Simɔ Pita là à pì: Yuhana nɛ́ Simɔ, ń yemai de gbɛ̃ dínɔla yá? À wèa à pì: Ee Dikiri, ń dɔ̃ kũ má yenyĩ. Yesu pìnɛ: Ǹ pɔ́ble kpá ma sãnɛ bɔ̀rɔnɔa. 16A gɛ̃̀n plade Yesu ɛ̀ra à a là dɔ à pì: Yuhana nɛ́ Simɔ, ń yemai yá? À wèa à pì: Ee Dikiri, ń dɔ̃ kũ má yenyĩ. Yesu pìnɛ: Ǹ ma sãnɔ dãmɛnɛ. 17À a là a gɛ̃̀n aakɔ̃de à pì: Yuhana nɛ́ Simɔ, ń yemai yá? Kũ Yesu Pita là a gɛ̃̀n aakɔ̃de tó à yeai, a pɔ yàka, akũ à pìnɛ: Dikiri, ń yã sĩnda pínki dɔ̃. Ń dɔ̃ kũ má yenyĩ. Yesu pìnɛ: Ǹ pɔ́ble kpá ma sãnɔa. 18Yãpuran matɛn onnɛ, kũ ń de kɛfɛnna ũ, ndì pɔ́ da n zĩda ǹ gɛ́ gu kũ ń yein, ama tó n zĩ kũ̀, ĩni n ɔnɔ poro, gbɛ̃ pãnde ni dannɛ à gɛ́ kũnwo gu kũ ń yeiron. 19Kũ Yesu ò lɛ, Pita ga kũ ani Luda tɔ́ bon à tɛ́a. Abire gbɛra Yesu pìnɛ: Ǹ tɛ́mai.

Yesu kũ ìba kũ Yesu yeiio

20Pita lìtɛ à ìba kũ Yesu yeii pìi è tɛ́ńyĩ. Gbɛ̃ pì mɛ́ à nà Dikirii gɔrɔ kũ òtɛn pɔ́ ble, à a là gbɛ̃ kũ ani a kpáḿmai. 21Kũ Pita a è, à pì Yesunɛ: Dikiri, gbɛ̃ dí sɔ̃ bi? 22Yesu pìnɛ: Tó má ye àgɔ̃ kú wɛ̃̀ndiio ari màgɔ̃ gɛ́ su, a yã n le máa? Ǹgɔ̃ tɛ́mai dé. 23Akũ yã pìi fã̀kɔ̃a Yesudenɔ tɛ́ kũ ìbaa pì ni garo. Ama Yesu dí onɛ kũ ani ganlo. À pì, tó á ye àgɔ̃ kun ari àgɔ̃ gɛ́ su, a yã a le mámɛɛ?

24Ìbaa pì mɛ́ à yã dínɔ sèeda kɛ̀. Àkũ mɛ́ à takada dí kɛ̃̀, akũ ó dɔ̃ kũ a sèedakɛna náani vĩ.

Mìdɛnaa

25Yesu yã pãndenɔ kɛ̀ dasidasi dɔ. Tó ò kɛ̃̀ takada gũn dodo pínki, matɛn da andunia a zĩdanɛ ni fɔ̃ à takada kũ ò kɛ̃̀ɛ pìnɔ síro.

Currently Selected:

YUHANA 21: BB2005

Highlight

Copy