YUHANA 20

Yesu vunaa

(Mat 28:1-8; Maa 16:1-8; Luk 24:1-12)

1Azumanɛnna zĩ gudɔo Mariama Magadalɛni bò à gɛ̀ɛ mira kĩnaa, akũ à lè gbɛ̀ gona mira lɛ́a. 2Akũ à bàa lɛ̀ à gɛ̀ɛ Simɔ Pita kĩnaa kũ ìba pãnde kũ Yesu yeii pìio à pìńnɛ: Ò Dikiri bò miran, ó dɔ̃ gu kũ ò a dànlo. 3Akũ Pita kũ ìba pãnde pìio fùtɛ ò gɛ̀ɛ mira kĩnaa. 4Ń gbɛ̃nɔn pla ń pínki tɛn bàa lɛ́ lɛɛlɛ, akũ ìba pãnde pìi bà nna de Pitala, à kà mira kĩnaa káaku. 5Kũ à wɛ́ kpàtɛn, akũ à táaru bizanɔ è katɛna, ama adi gɛ̃ a gũnlo. 6Kũ Simɔ Pita kà a gbɛra, akũ à gɛ̃̀ miran. À táaru biza pìi è katɛna 7kũ biza kũ ò fĩ̀fĩ a mìiao. Biza pì pɛkɛrɛna kũ pɔ́lɛ pìnɔoro, à kokona ditɛna adomɛ. 8Akũ ìba kũ à kà mira kĩnaa káaku pìi gɛ̃̀ se. À è, akũ à sì. 9Ari tera odi yã kũ à kɛ̃na Luda yãn dɔ̀rɔ dɔ̃ro kũ ò pì, ani futɛ bona gan. 10Akũ ìba gbɛ̃nɔn pla pìnɔ ɛ̀ra ò tà bɛ.

Yesu bo à suna Mariama Magadalɛninɛ

(Mat 28:9-10; Maa 16:9-11)

11Mariama zɛna mira lɛ́a, àtɛn ɔ́ɔ dɔ. Lákũ àtɛn ɔ́ɔ dɔ nà lɛ, akũ à wɛ́ kpàtɛ miran. 12Akũ à malaika gbɛ̃nɔn planɔ è vutɛna gu kũ ò Yesu gɛ̀ɛ wùtɛn yãaa. A do kú a mì kpa, a do sɔ̃ gbá kpa. Ò uta pura dana. 13Akũ ò a là ò pì: Nɔgbɛ̃, bɔ́ mɛ́ à n le ntɛn ɔ́ɔ dɔɔ? À wèḿma à pì: Ò ma Dikiri sɛ̀ ò tà kãaomɛ, má dɔ̃ gu kũ ò a wùtɛnlo. 14Kũ à ò lɛ, akũ à lìtɛ à Yesu è zɛna, ama adi dɔ̃ kũ Yesunlo. 15Yesu a là à pì: Nɔgbɛ̃, bɔ́ yã mɛ́ à tò ntɛn ɔ́ɔ dɔɔ? Dín ntɛn wɛtɛɛ? Mariama tɛn da karademɛ, akũ à pìnɛ: Mare, tó mɔkɔ̃n mɛ́ n a sɛ̀ n bo kãao, ǹ omɛnɛ gu kũ n a wùtɛn de mà gɛ́ mà a sɛ́. 16Yesu pìnɛ: Mariama! Akũ à arɛ dɔ̀a à pìnɛ kũ Eberu yão: Rabi! Tɔ́ pìi pì Dannɛri. 17Yesu pìnɛ: Ǹsun ɔ namaro, mádi tá ma De kĩnaa kɔ̀ro. Ǹ gɛ́ ǹ o ma gbɛ̃nɔnɛ matɛn tá ma De kũ ń Deo kĩnaa, ma Luda kũ ń Ludao kĩnaa. 18Akũ Mariama Magadalɛni gɛ̀ɛ à a baaruu kpà a ìbanɔnɛ à pì: Ma Dikiri è. Akũ à yã kũ à ònɛɛ bàbańnɛ.

Yesu bo à suna a ìbanɔnɛ

(Mat 28:16-20; Maa 16:9-18; Luk 24:36-49)

19Azumanɛnna birea ɔkɔsi a ìbanɔ kakarana kpɛ́n, ò gbà tàtańlɛ ò mɔ̀nɛ kã̀, kũ òtɛn vĩna kɛ Yuda gbãnadenɔnɛ yãi. Akũ Yesu sù à zɛ̀ ń tɛ́ à pìńnɛ: Àgɔ̃ kun aafia! 20Kũ à ò lɛ, akũ à a ɔnɔ mɔ̀ńnɛ kũ a gbã̀ntɛrɛɛo. Kũ ìbaa pìnɔ Dikiri è, ń pɔ kɛ̀ nna manamana. 21Yesu ɛ̀ra à pìńnɛ: Àgɔ̃ kun aafia! Lákũ ma De ma zĩ nà, lɛn matɛni á zĩ lɛ. 22Kũ à ò lɛ, akũ à ĩa vùḿma kũ lɛ́o à pì: À Luda Nini sí. 23Gbɛ̃ kũ a ń kɛ̃ kũ ń durunnanɔ, à kɛ̃̀ḿman gwe. Gbɛ̃ kũ ádi ń kɛ̃nɛro sɔ̃, ani kɛ̃ḿmaro.

Yesu kũ Tomasio

24Gɔrɔ kũ Yesu sù, Tomasi, a ìba gbɛ̃nɔn kuri awɛɛplanɔ doke kũ òdi pinɛ Sìka kú kũńworo. 25Akũ a ìba kparanɔ pìnɛ: O Dikiri è. Akũ à pìńnɛ: Tó mádi koosa gbɛ̀ e a ɔnɔ gũn ma ɔnɛ pɛ̀nlo, akũsɔ̃ mádi ɔ zɔ̃ a gbã̀ntɛrɛnlo, mani síro. 26A gɔrɔ làa a ìbanɔn kú kpɛ́n dɔ, Tomasi kú kũńwo sà. Ò gbà tàtańlɛ ò mɔ̀nɛ kã̀, akũ Yesu sù à zɛ̀ ń tɛ́ à pì: Àgɔ̃ kun aafia! 27Akũ à pì Tomasinɛ: Ǹ n ɔnɛ pɛ́ ma ɔ gũn la ǹ gwa, ǹ n ɔ zɔ̃ ma gbã̀ntɛrɛɛa. Ǹsun sika kɛ doro. Ǹ ma náani kɛ. 28Tomasi wèa à pì: Ma Dikiri, ma Luda. 29Yesu pìnɛ: Kũ n ma e yãin n ma náani kɛ̀. Arubarikadenɔn gbɛ̃ kũ ò ma náani kɛ̀ ma enaa sarinɔ ũ.

30Yesu daboyã pãndenɔ kɛ̀ dasi a ìbanɔ wɛ́ wára kũ odi kɛ̃ takada dí gũnlo. 31Ama ò adikĩnanɔ kɛ̃̀ de à le à Yesu sí Luda Nɛ́ Arumasihu ũ à wɛ̃̀ndi le a náanikɛnaa gũn yãimɛ.

Currently Selected:

YUHANA 20: BB2005

Highlight

Copy