YUHANA 19

1Akũ Pilati pì, ò Yesu kũ ò a gbɛ̃ kũ flã̀ao. 2Akũ sozanɔ lɛ̀ fùraa tã̀ ò kùnɛ ò arukĩmba tɛ̃ra dànɛ. 3Òtɛn nai dodo òtɛn pi: Fɔɔ, Yudanɔ kína! Akũ òtɛni a sãn kɛkɛ. 4Pilati ɛ̀ra à bò dɔ, akũ à pì gbɛ̃nɔnɛ: À gwa, matɛn booárɛ bàai la de à le à dɔ̃ kũ mádi yãke learo. 5Yesu bò bàai, à lɛ̀ fùraa pì kuna à arukĩmba wɛ́de pì dana. Akũ Pilati pìńnɛ: Gɔ̃gbɛ̃ pìin dí! 6Kũ sa'orikinɔ kũ dogarinɔ a è, ò wiki lɛ̀ ò pì: Ǹ a pá lía! Ǹ a pá lía! Akũ Pilati pìńnɛ: À a kũ à pá lía á zĩda, zaakũ mádi taari ke learo. 7Yuda gbãnade pìnɔ wèa ò pì: Ó doka vĩ, akũsɔ̃ doka pìi pì séde à ga, kũ à a zĩda dìtɛ Luda Nɛ́ ũ yãi.

8Kũ Pilati yã pìi mà, akũ vĩna kɛ̀kɛ à a kũ̀. 9À ɛ̀ra à gɛ̃̀ kũ Yesuo ɔnn dɔ, akũ à a là à pì: N bo máa? Yesu dí wearo, 10akũ Pilati pìnɛ: Ĩni yã o kũmaoroo? Ń dɔ̃ kũ má n gbarɛna iko vĩ, akũsɔ̃ má n pana lía iko vĩroo? 11Yesu wèa à pì: Ń iko ke vĩ ma musuro, sé kũ Luda kpàmma. Abire yãi gbɛ̃ kũ à ma kpamma durunna mɛ́ à zɔ̃kɔ̃. 12Zaa gɔrɔ birea Pilati tɛn zɛ́ wɛtɛ à a gbarɛ, ama Yuda gbãnadenɔ wiki lɛ̀ ò pì: Tó n gbɛ̃ pìi gbàrɛ, Siza gbɛ̃nnamɛ n ũro. Gbɛ̃ kũ à a zĩda dìtɛ kína ũ ibɛrɛɛ sɛ̀ kũ Sizaomɛ. 13Kũ Pilati yã bire mà, à pì ò bo kũ Yesuo bàai. Akũ à vùtɛ a tìntiia gu kũ òdi pi gbɛ̀ gusaran, kũ Eberu yão sɔ̃, Gabata. 14Vĩnla dikpɛ sorukɛzĩmɛ, ifãntɛ̃ kà mìdangura. Akũ Pilati pì Yuda gbãnade pìnɔnɛ: Á kínan dí. 15Akũ òtɛn wiki lɛ́ òtɛn pi: Ǹ a dɛ. Ǹ a dɛ. Ǹ a pá lía. Pilati pìńnɛ: Mani á kína pá lía yá? Sa'orikinɔ pì: Ó kína ke vĩro, Siza baasiro. 16Akũ Pilati Yesu kpàḿma ò a pá lía. Akũ ò a sɛ̀ ò tà kãao.

Yesu pana lía

(Mat 27:32-44; Maa 15:21-32; Luk 23:26-43)

17Yesu bò wɛ̃tɛ gũn à a zĩda lígbãndurukpana sɛna, à gɛ̀ɛ gu kũ òdi pi Mìtokokia, kũ Eberu yão sɔ̃ Gɔgɔta. 18Gwen ò a pà lía kũ gbɛ̃nɔn pla pãndenɔ, gbɛ̃ do a ɔplai gbɛ̃ do a ɔzɛi, akũ Yesu kú ń dagura. 19Pilati takada kɛ̃̀ à nà Yesu lí pìia. Yã kũ à kɛ̃̀ɛ pìin dí:

Yesu Nazɛra, Yudanɔ kína.

20Yudanɔ takada kũ à kɛ̃̀ɛ pì kyó kɛ̀ dasi, zaakũ gu kũ ò Yesu pà lían pìi zã̀ kũ wɛ̃tɛoro. Ò takada pìi kɛ̃̀ kũ Eberu yão kũ Romudenɔ yão kũ Giriki yãomɛ. 21Akũ Yuda sa'orikinɔ pì Pilatinɛ: Ǹsun kɛ̃ ǹ pi Yudanɔ kínaro, ama ǹ kɛ̃ kũ àkũ mɛ́ à pì Yudanɔ kínamɛ a ũ. 22Pilati pì: Yã kũ ma kɛ̃̀n ma kɛ̃̀. 23Kũ sozanɔ Yesu pà lía ò làka, akũ ò a pɔ́kasanɔ sɛ̀tɛ ò kpàatɛ lɛu siikɔ̃ baadi mìia. Ò a utagyaba kũ ò tã̀ nabinaa sari zaa musu ari zĩtɛ sɛ̀ dɔ, 24akũ ò pìkɔ̃nɛ: Òsun uta pì kɛ̃kɛ̃kɔ̃rɛro. Ò kàpa kpá de ògɔ̃ dɔ̃ gbɛ̃ kũ ani gɔ̃nɛ. Ò kɛ̀ lɛ, de yã kũ ò kɛ̃̀ Luda yãn le à papamɛ, kũ ò pì:

Ò ma pɔ́kasanɔ kpàatɛkɔ̃nɛ,

ò kàpaa kpà ma uta yãi.

Abire yãin sozanɔ kɛ̀ lɛ. 25Yesu da kũ a da dakũnao kũ Kolopa nanɔ Mariamao kũ Mariama Magadalɛnio kú lí kũ ò Yesu pàaa sarɛ. 26Kũ Yesu a da è kũ a ìba kũ à yeiio zɛna kɔ̃ sarɛ, à pì a danɛ: Nɔgbɛ̃, n nɛ́n di! 27Akũ à pì ìbaa pìinɛ: N dan di! Zaa zĩ birean ìbaa pìi a sɛ̀ à tà kãao a bɛa.

Yesu ganaa

(Mat 27:45-56; Maa 15:33-41; Luk 23:44-49)

28Abire gbɛra Yesu dɔ̃ kũ a pínki pàpa. De yã kũ à kɛ̃na Luda yãn le à papa akũ à pì: Ími tɛni ma dɛ. 29Lo kú gwe, sèwɛ̃ kpã̀kpã kán pana. Akũ ò sako yàku wɛ̃ pìi gũn ò pɛ̀ sɛ̃̀lia ò dɔ̀ Yesunɛ a lɛ́a. 30Kũ à wɛ̃ pìi mì à pì: Yã làka. Akũ à a mìi pɛ̀tɛ à a wɛ̃̀ndii gbàrɛ.

Yesu zɔ̃na kũ sário

31Kámmabogɔrɔ sorukɛzĩmɛ. Yuda gbãnadenɔn ye gɛ̀nɔ gɔ̃ lía ari kámmabogɔrɔ zĩro, zaakũ kámmabogɔrɔ zĩ pì bi gɔrɔ zɔ̃kɔ̃ɔmɛ. Akũ ò gɛ̀ɛ ò wɛ́ kɛ̀ Pilatia ò ń gbá ɛ́'ɛ ò ń kipa. 32Akũ sozanɔ gɛ̀ɛ ò gbɛ̃ káaku kũ ò pà lía lɛɛlɛ kũ Yesuo gbá ɛ̀'ɛ kũ a plade pɔ́o dɔ. 33Kũ ò kà Yesu kĩnaa, ò è à gĩnakɛ à gà kɔ̀, akũ odi a gbá ɛ́'ɛro. 34Akũ sozanɔ doke Yesu zɔ̃̀ kũ sário a gbã̀ntɛrɛɛa. Gwe gɔ̃̀nɔ aru kũ ío bɔ̀tɛ. 35Gbɛ̃ kũ à yã pìi è kũ wɛ́o mɛ́ a ò. A sèedakɛna yãpura vĩ, à dɔ̃ kũ yãpuran átɛn o, de ákɔ̃nɔ sɔ̃ à le à Yesu náani kɛ. 36Yã birenɔ kɛ̀ de yã kũ à kɛ̃na Luda yãn díkĩna papamɛ, ò pì: Oni a wá ke ɛ́ro. 37À kɛ̃na Luda yãn dɔ ò pì: Oni gbɛ̃ kũ ò a zɔ̃̀ gwa.

Yesu vĩnaa

(Mat 27:57-61; Maa 15:42-47; Luk 23:50-56)

38Abire gbɛra Yusufu Arimatea gɛ̀ɛ à wɛ́ kɛ̀ Pilatia, de à a gba zɛ́ à Yesu gɛ̀ɛ kipa. Yesu ìbaamɛ asiri gũn, kũ àtɛn vĩna kɛ Yuda gbãnadenɔnɛ yãi. Pilati wènɛ, akũ à gɛ̀ɛ à a gɛ̀ɛ sɛ̀ à tào. 39Nikodɛmu kũ à gɛ̀ɛ Yesu kĩnaa gwãani gɛ̀ɛ se kũ lí'ɔo yãkatɛna kũ ɛzɛ kũ àdi tó gɛ̀ vãroo à kà kiloo baraakuri taka bà. 40Akũ ò Yesu gɛ̀ɛ sɛ̀ ò táaru bizanɔ fĩ̀fĩa kũ ɛzɛ pìio, lákũ Yudanɔ dì gɛ̀ kpe ta nà ń futɛokarayã gũn. 41Kara kú gu kũ ò Yesu pà líaa pìn. Gbɛ̀wɛɛ kũ ò sɔ̀ mira ũ dufu kú karaa pìi gũn, odi gbɛ̃ke dan zikiro. 42Gwen ò Yesu wùtɛn, kũ à zã̀ kũńworo, kũ dɔ Yudanɔ kámmabogɔrɔ tɛn ká yãi.

Currently Selected:

YUHANA 19: BB2005

Highlight

Copy