YUHANA 11

Lazaru ganaa

1Gbɛ̃ kũ òdi pinɛ Lazaru tɛn gyã kɛ zaa Bɛtani wɛ̃tɛ kũ Mariama kũ a vĩ̀ni Maatao kún. 2Mariamamɛ nɔgbɛ̃ kũ à nísi gbĩnnade kù Dikiri gbáa à gògo kũ a mìkão ũ. 3Akũ Lazaru dãre pìnɔ lɛ́gbãzã kɛ̀ Yesunɛ ò pì: Dikiri, n gbɛ̃nna tɛn gyã kɛ. 4Kũ Yesu yã pìi mà à pì: Gyã pìi ni láka kũ gaoro. De Luda gakuri bo gupuraa yãimɛ, de Luda Nɛ́ sɔ̃ tɔ́ bo a musu. 5Yesu ye Maatai kũ a dakũnao kũ Lazaruo. 6Kũ à mà Lazaru tɛn gyã kɛ, akũ à gɔ̃̀ gu kũ à kun gĩa gɔrɔ pla. 7Abire gbɛran à pì a ìbanɔnɛ: Ò ɛra ò gɛ́ Yudea. 8Akũ a ìbanɔ pìnɛ: Rabi, gbãnadenɔn ye ò n pápa kũ gbɛ̀ɛo adi gì kɛro, akũ ń ye ò ɛra ò gɛ́ gwe dɔ yá? 9Yesu pì: Fãnantɛ̃ do bi awa kuri awɛɛplanloo? Gbɛ̃ kũ àtɛn kure fãnantɛ̃ dì gɛ̃̀ síro, kũ àtɛn gu e andunia díkĩna gupurai yãi. 10Tó àtɛn kure gwãani, àdi gɛ̃̀ sí kũ à gupura pì vĩro yãi.

11Yã pì onaa gbɛra Yesu pìńnɛ: Ó gbɛ̃nna Lazaru i òmɛ. Mani gɛ́ mà a vu. 12Akũ a ìbanɔ pìnɛ: Dikiri, tó àtɛn i omɛ, ani aafia le. 13Lazaru ga yãn Yesu tɛn ońnɛ, akũ òtɛn da i'onaamɛ yãpura. 14Akũ Yesu òńnɛ swáswa sà à pì: Lazaru gàmɛ. 15Ma pɔ kɛ̀ nna kũ má kú gwero, de à le à ma náani kɛ yãi. Ò gɛ́ a kĩnaa. 16Akũ Tomasi kũ òdi pinɛ Sìka pì a gbɛ̃nɔnɛ: Ò gɛ́ kũ Dikirio ò ga ó pínki.

Yesumɛ gbɛ̃ kũ àdi gɛ̀nɔ vu à wɛ̃̀ndi kpáḿma ũ

17Kũ Yesu kà gwe, à sù à lè ò Lazaru vĩ̀ à gĩnakɛ à kɛ̀ gɔrɔ siikɔ̃ kɔ̀. 18Bɛtani kú kãni kũ Yurusalɛmuo lán kiloo aakɔ̃ bà. 19Yuda gbãnadenɔ bò zaa gwe dasi ò sù Maata kũ Mariamao kĩnaa, de ò sùru kpáńnɛ ń dãgɔ̃ ga yã musu. 20Kũ Maata mà Yesu tɛn su, à bò à gɛ̀ɛ daalɛ, ama Mariama zɛ̀ bɛ. 21Akũ Maata pì Yesunɛ: Dikiri, tó ń kú lamɛ yã, de ma dãgɔ̃ dí garo. 22Bee tera má dɔ̃ kũ yã kũ n gbɛ̀ka Ludaa, ani kɛnnɛ. 23Yesu pìnɛ: N dãgɔ̃ ni vu. 24Maata pìnɛ: Má dɔ̃ kũ ani vu zĩ kũ gɛ̀nɔ ni vu gɔrɔ kpɛde zĩ. 25Yesu pìnɛ: Makũmɛ gbɛ̃ kũ àdi gɛ̀nɔ vu à wɛ̃̀ndi kpáḿma ũ. Bee tó ma náanikɛrii gà, anigɔ̃ kpɛ́ kummɛ. 26Gbɛ̃ kũ à kun, akũ àtɛni ma náani kɛ ni ga zikiro. N abirekũ sì yá? 27Maata pìnɛ: Ee, Dikiri, ma sì kũ Arumasihumɛ n ũ, Luda Nɛ́ kũ ò pì ani su andunia gũn.

Yesu wɛ́'i kàn

28Kũ Maata ò lɛ, akũ à gɛ̀ɛ à a dakũna Mariama sìsi, akũ à pìnɛ asiri gũn à pì: Dannɛri sù àtɛni n gbɛka. 29Kũ Mariama yã pìi mà, à fùtɛ likalika àtɛn gɛ́ a le. 30Yesu dí gĩnakɛ à gɛ̃ wɛ̃tɛ gũn kɔ̀ro, à kpɛ́ kú gu kũ Maata dàalɛn. 31Gbãnade pìnɔn kú kpɛ́n kũ Mariamao, òtɛn sùru kpánɛ. Kũ ò è à fùtɛ likalika à bò, ò bò ò tɛ̀i, zaakũ òtɛn da àtɛn gɛ́ ɔ́ɔ dɔ miraamɛ.

32Kũ Mariama kà gu kũ Yesu kún, kũ à a è, à kùtɛ a gbá sarɛ à pìnɛ: Dikiri, tó ń kú lamɛ yã, de ma dãgɔ̃ dí garo. 33Yesu è àtɛn ɔ́ɔ dɔ, akũ gbãnade kũ ò kú kãao pìnɔ tɛn ɔ́ɔ dɔ dɔ. Akũ à nɛ̀sɛyɔkɔ sì a pɔ yàka. 34Akũ à pì: A a vĩ̀ máa? Ò wèa ò pì: Mare, ǹ mɔ́ ǹ gwa. 35Yesu wɛ́'i kàn. 36Akũ gbãnade pìnɔ pì: À gwa lákũ à yei nà. 37Akũ ń gbɛ̃kenɔ pì: Àkãa kũ à vĩ̀na wɛ́ wɛ̃̀, ani fɔ̃ à gi Lazarunɛ àsun garoo?

Lazaru vunaa

38Kũ Yesu tɛn gɛ́ mira pì kĩnaa, akũ à nɛ̀sɛyɔkɔ sì dɔ. Mira pì bi gbɛ̀wɛɛɛmɛ, gbɛ̀ gbɛ̃̀ntɛ̃ tàtaalɛ́. 39Yesu pì: À gbɛ̀ɛ pì go a lɛ́a. Akũ gbɛ̃ kũ à gàa pì dãre Maata pìnɛ: Dikiri, àtɛn gbĩ sɔ̃, zaakũ à kɛ̀ gɔrɔ siikɔ̃n dí. 40Yesu pìnɛ: Mádi onnɛ kũ tó n ma náani kɛ̀, ĩni Luda gakuri eroo? 41Kũ ò gbɛ̀ɛ pìi gò, akũ Yesu wɛ́ sɛ̀ musu à pì: Baa, ma n sáabu kɛ̀ kũ n ma yã mà. 42Má dɔ̃ kũ ndìgɔ̃ ma yã ma gɔrɔ sĩnda pínki, ama ma ò lɛ pari kũ ò kú lanɔ yãimɛ, de ò le ò sí kũ mɔkɔ̃mmɛ n ma zĩ. 43Kũ à ò lɛ, akũ à pũ̀tã kũ kòto gbãnao à pì: Lazaru, ǹ bo. 44Akũ gbɛ̃ kũ à gàa pìi bò, pɔ́lɛ fĩfĩna a mɛ̀ɛa, biza yĩna a mìia. Yesu pìńnɛ: À pɔ́ poroa à a gbarɛ.

Lɛ́kpakũsũna Yesui

45Yuda gbãnade kũ ò sù Mariama kĩnaa pìnɔ, kũ ò yã kũ Yesu kɛ̀ɛ pìi è, ò a náani kɛ̀ dasi. 46Ama ń gbɛ̃kenɔ gɛ̀ɛ Farisinɔ kĩnaa, ò yã kũ Yesu kɛ̀ɛ gbã̀ńnɛ. 47Akũ sa'orikinɔ kũ Farisi pìnɔ gbãnadenɔ sìsi kɔ̃kakaranaaa ò pì: Gbɛ̃ pì tɛn daboyã kɛ dasi, bɔ́ ótɛn kɛɛ? 48Tó o tò àtɛn kɛ lɛ, baadi ni a náani kɛ, Romudenɔ ni su ò ó Luda kpɛ́ kũ ó burio kakatɛ pínki. 49Akũ Kayafa ń gbɛ̃ mɛ̀n do kũ à de sa'oriki zɔ̃kɔ̃ ũ wɛ̃̀ birea pìńnɛ: Á yãke dɔ̃ro. 50Á dɔ̃ kũ gbɛ̃ mɛ̀n do gana ó pínki gɛ̃nɛ ũ mana de ó buri kakatɛnalaroo? 51Adi yã pì o kũ a zĩda pɔyeinaaoro. Kũ à de sa'oriki zɔ̃kɔ̃ ũ wɛ̃̀ birea yãin à annabikɛyã ò kũ Yesu ni ga Yudanɔ gɛ̃nɛ ũ. 52Adi kɛ Yudanɔ ńtɛ̃nɛnlo, ari kũ Luda nɛ́ kũ ò fãkɔ̃ananɔ dɔ, de à ń kɛ mɛ̀ dokɔ̃nɔ ũ. 53Zaa zĩ birean gbãnade pìnɔ zɛ̀ kũ Yesu dɛnaao. 54Abire yãi Yesu dí bo gupuraa ń tɛ́ doro. Akũ à gɛ̀ɛ lakutu kũ à kú gbáranna sarɛ kũ òdi pi Ɛflaimu. À gɔrɔ pla kɛ̀ gwe kũ a ìbanɔ.

55Yudanɔ Vĩnla dikpɛ kà kãni. Ò bò lakutunɔ gũn dasidasi, ò gɛ̀ɛ Yurusalɛmu gbã̀bona yãi ari dikpɛ pì gɛ́ ká. 56Òtɛn Yesu wɛtɛ, ò zɛna Luda ɔnn, òtɛn kɔ̃ lala òtɛn pi: Átɛn da deramɛɛ? Ani we à su dikpɛ dí kɛ yá? 57Sa'orikinɔ kũ Farisinɔ dìtɛ kũ tó gbɛ̃ke Yesu kúki dɔ̃, à ońnɛ de ò le ò a kũ.

Currently Selected:

YUHANA 11: BB2005

Highlight

Copy