YUHANA 12

Nísi gbĩ nna kuna Yesu gbáa

(Mat 26:6-13; Maa 14:3-9)

1Vĩnla dikpɛ gɔ̃̀ gɔrɔ suddo, akũ Yesu sù Bɛtani, Lazaru kũ à a vù bona gan wɛ̃tɛa. 2Ò pɔ́ble kɛ̀ Yesunɛ gwe. Maata mɛ́ àtɛn pɔ́ble kpaatɛtɛ, Lazaru sɔ̃ à kú pɔ́blerinɔ tɛ́ kũ Yesuo. 3Akũ Mariama nísi buri mana ɔgɔde sɛ̀ à sùo, à kù Yesu gbáa, akũ à a gbá gògo kũ a mìkão. Nísi gbĩ dàgula kpɛ́ pìi gũn. 4Yesu ìbanɔ doke Yudasi Isikariɔti kũ ani Yesu kpáḿma pì: 5Nísi dí ɔgɔ kà andurufu wàa do kpɛ́ basɔɔro. Bɔ́yãi odi yía ò a ɔgɔ kpà takasidenɔaroo? 6Adi kɛ à abirekũ o takasidenɔ wɛ̃ndagwana yãinlo, kũ à de kpãni ũ yãimɛ. Àkũ mɛ́ àdigɔ̃ ɔgɔsɔ̃nɔ kũna àgɔ̃ ɔgɔ fĩnti bo. 7Akũ Yesu pì: Ǹ nɔgbɛ̃ dake tó. Abirekũ dìtɛ ari ma gɛ̀ kɛgɔrɔamɛ. 8Takasidenɔ nigɔ̃ kú kãáo gɔrɔ sĩnda pínki, makũ sɔ̃ manigɔ̃ kú kãáo gɔrɔ pínkiro.

Lɛ́kpakũsũna Lazarui

9Yuda gbãnadenɔ mà kũ Yesu kú Bɛtani, akũ ò gɛ̀ɛ gwe dasidasi. Adi kɛ Yesu yãin ò gɛ̀ɛ adoro, de dɔ ò Lazaru kũ Yesu a vù bona gan e yãimɛ. 10Akũ sa'orikinɔ zɛ̀o ò Lazaru dɛ se dɔ, 11zaakũ a yãin gbãnadenɔ tɛn kɛ̃ḿma dasi, òtɛn Yesu náani kɛ.

Gbãnakɛkpana Yesui zaa Yurusalɛmu

(Mat 21:1-11; Maa 11:1-11; Luk 19:28-40)

12Kũ gu dɔ̀, pari kũ ò sù dikpɛ kɛ Yurusalɛmunɔ mà kũ Yesu tɛn su, 13akũ ò zaa lánɔ zɔ̃̀zɔ̃ ò gɛ̀ɛ daalɛo. Òtɛn wiki lɛ́ òtɛn pi:

Ǹ gbãna kɛ!

Arubarikaden gbɛ̃ kũ àtɛn su kũ Dikiri tɔ́o ũ!

Arubarikaden Isarailanɔ kína ũ!

14Yesu zaaki è à dìa lákũ à kɛ̃na Luda yãn nà ò pì:

15Zaiɔ̃denɔ, àsun vĩna kɛro.

Á kína tɛn su à di zaakinɛ bɔ̀rɔ kpɛ.

16A ìbanɔ dí yã pìi mì dɔ̃ gĩaro. Yesu futɛ à tana gakuri gũn gbɛran ò dɔ̃̀ sà kũ ò yã pìi kɛ̃̀ a musumɛ, akũ mɔ́kɔ̃nɔ mɛ́ ò a pínki kɛ̀nɛ.

17Kũ Yesu Lazaru sìsi à a vù bona miran, gbɛ̃ kũ ò kú kãaonɔ a baaruu kpàkpańnɛ. 18Abire yãin pari gɛ̀ɛ ò dàalɛ, zaakũ ò mà kũ à daboyã pìi kɛ̀. 19Akũ Farisinɔ pìkɔ̃nɛ: A è yá? Óni fɔ̃ ò pɔ́ke woaro. À gwa lákũ andunia bò à tɛ́i nà.

20Girikinɔn kú gbɛ̃ kũ ò sù donyĩ kɛ dikpɛkɛkinɔ tɛ́, 21akũ ò gɛ̀ɛ Filipi kũ à bò Bɛtɛsaida, Galili bùsun kĩnaa, ò wɛ́ kɛ̀a ò pì: Mare, ó ye kɔ̃'enaai kũ Yesuo. 22Filipi gɛ̀ɛ à ò Andurunɛ, akũ ò gɛ̀ɛ ò ò Yesunɛ lɛɛlɛ.

Yesu a ga yã'onaa

23Yesu pìńnɛ: Bisãsiri Nɛ́ tɔ́bogɔrɔ kà. 24Yãpuran matɛn oárɛ, tó pɔ́wɛ dí gɛ̃ bùsuu gũn à fɔ̃̀mbaa bòro, àdigɔ̃ kun adomɛ. Tó à fɔ̃̀mbaa bò sɔ̃, àdi nɛ́ i manamana. 25Gbɛ̃ kũ à ye a wɛ̃̀ndiii ni kurai. Gbɛ̃ kũ à gì a wɛ̃̀ndiii andunia díkĩnan sɔ̃, ade nigɔ̃ kũna ari gɔrɔ sĩnda pínki. 26Tó gbɛ̃ ye à zĩ kɛmɛnɛ, àgɔ̃ tɛ́mai. Ma zĩkɛri pì nigɔ̃ kú gu kũ má kún. Tó gbɛ̃ tɛn zĩ kɛmɛnɛ, ma De ni a kpe ta. 27Tera sà ma pɔ yàka. Bɔ́n mani oo? Mani pi, Baa, ǹ ma bo yã kũ àtɛn suman yá? Oi! Ma su yã kũ àtɛn suma pì yãimɛ. 28Baa, ǹ tɔ́ bo. Akũ kòtoo bò ludambɛ à pì: Ma tɔ́ bò kɔ̀, akũsɔ̃ mani ɛra mà bo dɔ.

29Kũ gbɛ̃ kũ ò kú gwenɔ mà, ò pì: Legũ mɛ́ à pũ̀tã. Gbɛ̃kenɔ pì: Malaika mɛ́ à yã ònɛ. 30Akũ Yesu pìńnɛ: Adi kɛ ma yãin kòtoo pìi bòro, á yãimɛ. 31Yã ni vutɛ andunia díkĩnaa sà. Oni andunia díkĩna kína bo kpatan sà. 32Makũ sɔ̃, tó ò ma sɛ ò ma dɔ musu mani buri sĩnda pínki gátɛ ò su ma kĩnaa.

33Kũ Yesu ò lɛ, à ga kũ ani ga takan à tɛ́a. 34Akũ gbɛ̃nɔ pìnɛ: O mà à kú doka takadan ò pì Arumasihu nigɔ̃ kun gɔrɔ pínkimɛ, akũ n pì oni Bisãsiri Nɛ́ sɛ́ ò dɔ musu sɔ̃ bi? Dímɛ Bisãsiri Nɛ́ pì ũu? 35Yesu wèḿma à pì: Gupura kunna kãáo gɔ̃̀ fítimɛ. Gɔrɔ kũ gupura pì kú kãáo, àgɔ̃ kuren, de gu sún sira kũáwaro yãi. Gbɛ̃ kũ àtɛn kure gusiran dɔ̃ gu kũ àtɛn gɛ́nlo. 36Gɔrɔ kũ á gupura pì vĩ, à gupura pì náani kɛ, de à gɔ̃ gupuradenɔ ũ.

Kũ Yesu ò lɛ, akũ à gɛ̀ɛ à ùtɛńnɛ.

Gbɛ̃nɔ dí Yesu náani kɛro

37Bee kũ daboyã dasi kũ à kɛ̀ ń wáranɔ, odi a náani kɛro, 38de yã kũ annabi Isaya ò le à papa yãi kũ à pì:

Dikiri, gbɛ̃ke dí baaru kũ o kpà síro.

Ò n gbãna è odi dɔ̃ro.

39Odi we ò a náani kɛ̀ro, zaakũ Isaya pì dɔ:

40Luda ń wɛ́ vĩ̀na kũ̀ńnɛ

de òsun gu ero.

À ń kùgbãna kũ̀ńnɛ

de òsun yã ma

ò arɛ dɔa à ń werekɔ̃aro.

41Isaya abirekũ ò kũ à Yesu gakuri è yãimɛ, akũ à a yã ò. 42Bee kũ abireo gbãnade pìnɔ Yesu náani kɛ̀ dasi. Farisinɔ yãin òdigɔ̃ ye ò dɔ̃ḿmaro, de òsun aduakɛkpɛ zɛ́ zɔ̃ńnɛro yãi. 43Zaakũ ò ye bisãsirinɔ ń sáabu kpá de Luda ń sáabu kpála.

44Akũ Yesu pũ̀tã à pì: Gbɛ̃ kũ àtɛni ma náani kɛ, adi kɛ makũn àtɛni náani kɛ adoro, àtɛn gbɛ̃ kũ à ma zĩ náani kɛmɛ se dɔ. 45Gbɛ̃ kũ àtɛni ma e tɛn gbɛ̃ kũ à ma zĩ emɛ se. 46Ma su andunia gũn gupura ũmɛ, de gbɛ̃ kũ àtɛni ma náani kɛ sún gɔ̃ gusiran doro. 47Gbɛ̃ kũ à ma yã mà akũ à kũnaro, adi kɛ makũ mɛ́ mani yã vutɛaro, zaakũ mádi su yã vutɛ andunianlo, ma su andunia sura bamɛ. 48Yãkpatɛkɛna tɛn gbɛ̃ kũ à gìmai adi ma yã síro dã. Yã kũ ma ònɛɛ pì mɛ́ ani vutɛa ziazĩ. 49Zaakũ mádi yãke o kũ ma zĩdaoro. Yã kũ ma ò kũ yã kũ ma dàńnɛo, ma De kũ à ma zĩ mɛ́ à dìtɛmɛnɛ. 50Má dɔ̃ kũ yã kũ à dìtɛmɛnɛ bi wɛ̃̀ndi kũ àdi lákaro yãmɛ. Abire yãi yã kũ matɛn o, matɛn o lákũ ma De dàmɛnɛ nàmɛ.

Currently Selected:

YUHANA 12: BB2005

Highlight

Copy