YUHANA 13

Yesu a ìbanɔ gbá pipinaa

1Ari Vĩnla dikpɛ gɔ̃ gɛ́ ká, Yesu dɔ̃̀ kũ a bona andunia dí gũn tana a De kĩnaa gɔrɔ kà. Lákũ à ye a gbɛ̃nɔi andunia gũn nà, à yeńyĩ ari a wɛ̃̀ndi lɛ́mmɛ. 2Kũ òtɛn ɔkɔsi pɔ́ ble, Ibilisi gĩnakɛ à yã dà Simɔ Isikariɔti nɛ́ Yudasi swɛ̃̀n kɔ̀, de à Yesu kpáḿma. 3Yesu dɔ̃̀ kũ a De pɔ́ sĩnda pínki nàarɛ a ɔĩ. À dɔ̃̀ kũ a bo Luda kĩnaamɛ, akũsɔ̃ áni ɛra à tá a kĩnaamɛ. 4Gɔrɔ kũ òtɛn pɔ́ ble, Yesu fùtɛ à a uta bò à kàtɛ, akũ à tawali sɛ̀ à dɔ̀ a pi. 5Abire gbɛra à í kà ta gũn, akũ à nà a ìbanɔ gbá pípinaaa, àtɛn gogo kũ tawali kũ à dɔ̀ a piaao. 6Kũ à kà Simɔ Pita kĩnaa, Pita pìnɛ: Dikiri, mɔkɔ̃n mɛ́ ĩni ma gbá pípimɛnɛ yá? 7Yesu wèa à pì: Ń yã kũ matɛn kɛ dɔ̃ gĩaro, ama ĩnisũn dɔ̃. 8Pita pìnɛ: Ĩni ma gbá pípimɛnɛro fá! Yesu pìnɛ: Tó mádi n gbá pípiro, n bàka kú kũmao doro. 9Simɔ Pita pìnɛ: Dikiri, adi kɛ ma gbámɛ adoro, ma ɔ kũ ma mìioomɛ dɔ. 10Yesu pìnɛ: Gbɛ̃ kũ à zú òo bàka kú kũ a mɛ̀gu ke pípinaaoro, séde a gbá, zaakũ à punamɛ. Á gbãsĩro, ama adi kɛ á pínkinlo. 11À gbɛ̃ kũ ani a kpáḿma dɔ̃. Abire yãin à pì ò gbãsĩ sari ń pínkiro.

12Kũ à ń gbá pìpińnɛ à làka, à a uta sɛ̀ à dà, akũ à ɛ̀ra a gbɛ̀nh. À pìńnɛ: Á yã kũ ma kɛ̀árɛ dɔ̃ yá? 13Adì ma sísi Dannɛri kesɔ̃ Dikiri. Átɛn o a zɛ́amɛ, zaakũ má de a ũmɛ. 14Lákũ makũ kũ má de á dikiri kũ á dannɛriio ũ á gbá pìpiárɛ nà, àgɔ̃ kɔ̃ gbá pípi lɛ se. 15Ma a taka kɛ̀árɛ. Àgɔ̃ kɛ lákũ ma kɛ̀árɛ nà. 16Yãpuran matɛn oárɛ, zɔ̀blerii dìgɔ̃ de a dikirilaro, zĩ̀rii dìgɔ̃ de gbɛ̃ kũ à a zĩ̀laro.

17Lákũ a yã bire dɔ̃̀ nà, arubarikadenɔn á ũ tó átɛn kɛ lɛ. 18Adi kɛ á pínki yãn matɛn oro. Má gbɛ̃ kũ ma ń sɛ́nɔ dɔ̃. Séde yã kũ à kɛ̃na Luda yãn dí papa kũ ò pì: Gbɛ̃ kũ odì ɔ kakara ta dokɔ̃nɔ gũn mɛ́ à bò ma kpɛ. 19Matɛn oárɛ tera ari à kpɛ́ à su, de tó à sù, áni sí kũ makũmɛ a ũ. 20Yãpuran matɛn oárɛ, gbɛ̃ kũ à ma zĩ̀rii sì ma simɛ. Gbɛ̃ kũ à ma si sɔ̃, ade gbɛ̃ kũ à ma zĩ sìmɛ.

Yesu gĩnakɛ à dɔ̃ yã kũ Yudasi ni kɛ

(Mat 26:20-25; Maa 14:17-21; Luk 22:21-23)

21Kũ Yesu ò lɛ, à nɛ̀sɛyɔkɔ sì, akũ à òńnɛ swáswa à pì: Yãpuran matɛn oárɛ, á gbɛ̃ mɛ̀n do mɛ́ ani ma kpáḿma. 22Akũ a ìbanɔ kɔ̃ wɛ́ gwàgwa ò bídi kɛ̀ gbɛ̃ kũ à tɛ́a. 23Ìba do kũ Yesu yei manamana gɛngɛsɛkɛna a sarɛ. 24Akũ Simɔ Pita lɛ́zuki kɛ̀nɛ à Yesu la tó dín à tɛ́a. 25Akũ ìbaa pìi nà Yesui à a là à pì: Dikiri, dímɛɛ? 26Yesu wèa à pì: Mani loma zɔ̃ dòoa mà kpá adea. Akũ à lomaa zɔ̃̀ dòoa à kpà Simɔ Isikariɔti nɛ́ Yudasia. 27Kũ Yudasi lomaa pìi sì, Setan gɛ̃̀agu gɔ̃̀nɔ. Akũ Yesu pìnɛ: Yã kũ ĩni kɛ ǹ kɛ likalika. 28Gbɛ̃ kũ òtɛn pɔ́ blenɔ ke dí dɔ̃ ke bɔ́yãi Yesu ònɛ lɛro. 29Kũ Yudasi mɛ́ àdigɔ̃ ɔgɔsɔ̃nɔ kũna, akũ gbɛ̃kenɔ tɛn da Yesu pìnɛ à gɛ́ dikpɛ pɔ́ kũ ò yeinɔ lúmɛ ke à gɛ́ pɔ́ke kpá takasidenɔa. 30Kũ Yudasi lomaa pìi sì, à bò gɔ̃̀nɔ. Gwãanimɛ sɔ̃.

Yesu gĩnakɛ à dɔ̃ yã kũ Pita ni kɛ

(Mat 26:31-35; Maa 14:21-27; Luk 22:31-34)

31Kũ Yudasi bò, akũ Yesu pì: Tera sà Bisãsiri Nɛ́ ni tɔ́ bo, Luda sɔ̃ ani tɔ́ bo a yã musu. 32Tó Luda tɔ́ bò a musu sɔ̃, Luda ni a tɔ́ bo a kĩnaa, akũsɔ̃ ani bo gɔ̃̀nɔmɛ. 33Ma nɛ́nɔ, ma kunna kãáo gɔ̃̀ fítimɛ. Áni ma wɛtɛ, ama matɛn oárɛ tera lákũ ma ò gbãnadenɔnɛ nà, áni fɔ̃ à gɛ́ gu kũ matɛn tánlo. 34Matɛn yã dufu ditɛárɛ, àgɔ̃ yekɔ̃i. Lákũ má yeái nà, ákɔ̃nɔ sɔ̃ àgɔ̃ yekɔ̃i lɛ dɔ. 35Tó á yekɔ̃i, baadi ni á dɔ̃ ma ìbanɔ ũ.

36Simɔ Pita a là à pì: Dikiri, ntɛn tá máa? Yesu wèa à pì: Gu kũ matɛn tán, ĩni fɔ̃ ǹ tɛ́mai gĩaro, ama ĩni láka ǹ su. 37Pita pìnɛ: Dikiri, bɔ́yãi mani fɔ̃ mà tɛ́nyĩ teraroo? Mani gí ma wɛ̃̀ndiii n yãi. 38Yesu pì: Ĩni gí n wɛ̃̀ndiii ma yãi sɔ̃ yá? Yãpuran matɛn onnɛ, ari ko gɔ̃ gɛ́ lɛ́ zu, ĩni ledi kpámai gɛ̃̀n aakɔ̃.

Currently Selected:

YUHANA 13: BB2005

Highlight

Copy