Vilinga 20
20
Paulu mwaya kuMasetonya nakuHelase
1Omu chize chizungo chakumine, Paulu asanyikile tumbaji#20:1 Nge ngwavo vaka-kufwelela, mwomwo vosena vapwa tumbaji twaMwata. nakuvazamikisa. Kaha avasalishile, vasunwine wato nakuya kuMasetonya.
2Ahichile mujingalila jize nakuzamikisa vaka-kufwelela namazu amavulu, kaha ahetele nakuHelase,
3atwamine kuze tukweji vatatu. Omu asakile kuya muwato ku Sulya, hakwivwa ngwavo vaYuleya vanamutwame punga, alumwine vishinganyeka nakukinduluka mujila yakupulasana cheka muMasetonya.
4Kaha ayile hamwe naSopate mwana Pulusu wakuMbeleya, naAlishitaku naSekundu vakuTesolonyika, naNgayu wakuNdeleve, naChimoteu naTukiku naTolofwimu vakuAja.
5Oloze vakiko valivangile kulutwe, kaha vatuvandaminyine#20:5 Hamazu awa, vatuvandaminyine, tunahase kutachikiza ngwetu Luka, muka-kusoneka, alinungile navo hakachi kajila yize. kuTolowa.
6Kaha omu ahichile makumbi achiwanyino chaJimbolo jakuzeneka Chimbalwila, twasunwine kufuma kuFwilipi, kaha mumakumbi atanu twahetele kuli vakwetu kuTolowa, kuze twatwamineko makumbi atanu naavali.
Paulu mwalishika navaka-Tolowa
7Jino halikumbi lyatete muchalumingo, omu twakungulukile#20:7 Nge ngwavo, omu Kalunga akungulwile liuka vahase kupuzula mbolo, Paulu navosena apwile navo valinungile navo nakuzata milimo yaKalunga. nakupuzula mbolo, Paulu avambulilile mazu mwomwo ajinyine kukatuka nachimene, kaha atwalilileho nakwambulula mazu namukachi kaufuku.
8Muze mukapete wahelu twákungulukilile, mwapwile manongo amavulu.
9Munjanena mwatwamine mwanalunga, lijina lyenyi Yutuku, ayile mutulo twatuvulu. Kaha Paulu hakutwalililaho kwambulula, Yutuku tulo twamulemenene chikuma, aholokele hamavu kufuma muze mukapete wahelu wamuchitatu, kaha vamumbachile wakufwa.
10Paulu asulukile, amuulumanyine nakumukwata mukapanga, ambile ngwenyi, Kanda mulizuzukilako, wamutonyi.
11Kaha akandukile cheka muzuvo, alile vyakulya#20:11 MuchiHelase ngwavo, apuzwile mbolo nakulya. Kulya kana kachapwile chakumwanuka Mwatako, oloze chapwile vyakulya kaha., kaha atwalilileho nakushimutwila navo nakukucha, kaha avasezele.
12Uze mwanalunga vamutwalile kwimbo wamutonyi, ocho kachapwile nge kuvendejeka chachindendeko.
Paulu mwaya kuMiletu
13Jino etu twalivangile kukatuka, kaha twasunwine wato nakuya kuAso, mangana ngwetu Paulu akanyinyine kuze, mwomwo atushikile ngocho, mwomwo ivene asakile kuya yatunda.
14Omu atuwanyine kuAso, twamumbachile muwato nakuya kuMitulene.
15Twasunwine wato nakufuma kuze, kaha lyacheleko twahetele kuze kwalitalasana naKiyose, kaha halikumbi lyamuchitatu twahetele kuSamose, halikumbi lyamuchiwana twahetele kuMiletu.
16Mwomwo Paulu asakwile kukondoloka Efwesu, mangana azeneke kushimbula kuAja, mwomwo apwile nakwanguhwisa mangana nge chinahase, ahete kuYelusalema halikumbi lya Pendekoseta#20:16 Likumbi lyaPendekoseta lyapwa Chiwanyino chavaYuleya vavuluka nawa ngwavo Chiwanyino chavyalumingo, mukulava makumbi makumi atanu (50) kufuma kuChiwanyino chaKuzomboka..
Paulu mwazamikisa vakulwane vakuEfwesu
17Jino hakupwa kuMiletu, atumine umwe kuEfwesu nakusanyika vakulwane vamuliuka.
18Kaha omu vejile kuli ikiye, avambile ngwenyi,
Enu munatachikiza muze ngwatwaminenga nayenu makumbi osena, kufuma kulikumbi lyatete ngwahetele kuAja,
19nomu ngwamuzachililenga Mwata nakulinyisa chosena namasoji, namuvyeseko vyavivulu vyángusolokelelenga hakungutwama-twama jipunga kuli vaYuleya,
20nomu ngwazenekele kwivwa woma wakumisolwela chipwe chimwe chakumikafwako, hakuminangulanga kumeso avatu vosena, nakuzuvo hizuvo,
21nakulumbunwina vaYuleya navaHelase unjiho wamazu ngwami kuvanga vakunyuke hashili nakwalumukila kuli Kalunga nakufwelela Mwata wetu Yesu Kulishitu.
22Kaha jino talenu, ami nguli nakuya kuYelusalema nguwakukashiwa muli Shipilitu, vize navikanguwana kuze kangwavitachikijileko,
23oloze mulimbo hilimbo#20:23 MuchiHelase ngwavo, mulimbo hilimbo lyakembwe. nguli nakuhita Shipilitu Wajila ali nakungulweza ngwenyi oku nguli nakuya kunanguvandamina malenge namakava.
24Chipwe ngocho, kangweshi kuzakama mwono wami nakuumona ngwami waulemuko, chikalu kungunakumisa kulaha chami namulimo ngwatambula kuli Mwata Yesu, wakwambulula unjiho wamujimbu wamwaza walikoji lyaKalunga.
25Jino ivwililenu, ngunatachikiza ngwami, mukachi kayenu muvosena ngunatambwojokela nakumyambulila Wangana waKalunga, kakweshi umwe mwakangumona chekako.
26Shikaho, ngunalumbununa unjiho wami likumbi lyalelo ngwami, Ngunatomo kumanyinga avatu vosena,
27mwomwo, kangwevwile woma wakumisolwela mwosena mwaya punga yaKalungako.
28Jino, lilamenunga enu vavene, mulamenga nawa utanga wamikoko wosena muukiko namilingisa Shipilitu Wajila kupwa mutulama, mangana mufungenga liuka lyaKalunga eli álanjile namanyinga aMwanenyi.
29Ami ngunatachikiza ngwami, omu nangumiseza, muli enu namukengila tungunge vaka-kutanya, kaha utanga wamikoko kaveshi kukautetelako.
30Kaha nawa, namuli enu vavene namukakatuka malunga vamwe vaka-kuhanjika vyakulisepasana mangana vakakoke tumbaji#20:30 Nge ngwavo vaka-kufwelela, mwomwo vosena vapwa tumbaji twaMwata. vakavakavangizenga.
31Shikaho tonenunga, anukenunga ngwenu, mumyaka yitatu kangwalitwaminyine kuhuhumuna mutu himutu namasoji — namusana naufukuko.
32Kaha jino nguli nakumikunjika kuli Kalunga nakumazu alikoji lyenyi, akiko nawahasa kumitunga nakumihana uswana kana uli muli vosena vajilika.
33 Kangwapwile nalwiso lwapalata chipwe ulu chipwe uvwalo waumweko.
34Enu vavene munatachikiza omu ngwazachilenga namavoko ami awa, mangana nguwane vize ngwakalikijile, nevi vyavaze ngwapwilenga navo.
35Mwosena ngwalingilenga, ngwamihanyine chakutalilaho, ngwami hakukilikita ngana mwatela kukafwangako vaka-kuhehela. Anukenunga mazu aMwata Yesu aze ambile ngwenyi, Kuhana chatwama nakutokwa chikuma kuhambakana kutambula.
36Kaha omu akumishile kuhanjika, vosena vafukamine, kaha alombele.
37Vosena valilile chikuma, kaha vamukwachile Paulu mukasamba nakumusweswenya chikuma.
38Vanyengetelele chikuma halizu lize ambile ngwenyi, Kamweshi kukangumona chekako. Kaha vamushinjikijile nakuwato.
Currently Selected:
Vilinga 20: LUE
Highlight
Share
Copy
Want to have your highlights saved across all your devices? Sign up or sign in
Bible Society of Zambia
