Vilinga 21
21
Paulu mwaya kuYelusalema
1Kaha omu twalihandunwine, twasunwine wato, twasungamishile nakuheta kuKose. Omu kwachele twayile kuLotese, kaha omu lyacheleko cheka twahetele kuPatala.
2Kaha omu twawanyine wato wapwile nakuya musali muFwenyisha, twengililemo nakuya.
3Omu twamwene litungu lyaKupulusu, twalisezele kumutamba wachimoswe, twasungamishile ku Sulya nakusulika kuTule, mwomwo kukiko vasakile kulongolwela viteli vyapwile muwato.
4Kaha hakwihwojola twawanyine tumbaji#21:4 Nge ngwavo vaka-kufwelela, mwomwo vosena vapwa tumbaji twaMwata. kuze, twatwamine navo makumbi atanu naavali. Vakiko, hakuvasolwelacho kuli Shipilitu, vapwilenga nakulweza Paulu ngwavo azeneke kuya kuYelusalema.
5Omu makumbi etu akutwama kuze akumine, twakatukile nakutwalililaho ungeji wetu. Kaha vakiko vosena, namapwevo navana vavo, vatushinjikijileko nakusali yalimbo lize lyakembwe. Kaha twafukamine kungenge yakalungalwiji nakulomba.
6Omu twalisalishile navo, twengilile muwato nakuya, kaha vakiko vakindulukile kumembo avo.
7Omu twakumishile ungeji wakufuma kuTule, twahetele kuTolemai. Kaha twamenekele vandumbwetu nakutwama navo likumbi limwe.
8Omu kwachele, twasunwine wato nakuheta kuKesaliya. Kaha twengilile muzuvo yaFwilipu, uze muka-kwambulula mujimbu wamwaza, umwe wavaze vatanu navavali vatongwele kuzachilanga vaka-kufwelela, kaha twatwamine nenyi.
9Ikiye apwile navana venyi vawana vamapwevo kanda lyehi valimoneho nalunga, vaka-kupolofweta.
10Omu twashimbwile kuze makumbi amavulu, kwejile kapolofweto umwe áfumine kuYuleya, lijina lyenyi Angavu.
11Ejile kuli etu, akasunwine muhya waPaulu nakulikasawo kumavoko nakumahinji nakwamba ngwenyi, Mukiko nambe Shipilitu Wajila ngwenyi, Omu mukiko vaYuleya navakakasa lunga, mwenya-muhya ou, kuYelusalema, kaha navakamuhana kumavoko avaka-mafuchi.
12Omu twevwile ngocho, nayetu navenyembo twamulembelelele ngwetu azeneke kukanduka kuYelusalema.
13Paulu akumbulwile ngwenyi, Ikaze muli nakulilila nakuzeyesa muchima wami? Mwomwo ami, ngunalizánge lyehi, keshi nge kungukasa kahako, oloze chipwe kufwa tuhu kuYelusalema halijina lyaMwata Yesu.
14Omu ázenekele kukunyuka, twaholele kulu nakwamba ngwetu, Mwaya muchima waMwata mulingiwe.
15Omu aze makumbi áhichile, twalongejekele nakukanduka kuYelusalema.
16Tumbaji#21:16 Nge ngwavo vaka-kufwelela, mwomwo vosena vapwa tumbaji twaMwata. vamwe vakuKesaliya nawa twayile navo hamwe, kaha vatutwalile kuzuvo yaNasone wakuKupulusu, kambaji#21:16 Nge ngwavo muka-kufwelela, mwomwo vosena vapwa tumbaji twaMwata. umwe wavaze vakulivanga kufwelela, mangana tutwame nenyi.
VaYuleya navemanyina Paulu nakole kuYelusalema
17Omu twahetele kuYelusalema, vandumbwetu vatutambwile nakuwahilila.
18Omu kwachele, twengilile naPaulu hamwe muze apwile Yakova, kaha vakulwane vosena muvapwile.
19Kaha Paulu hakukumisa kuvameneka, avahichililemo mumilimo yenyi hachuma hachuma chize álingile Kalunga muli vaka-mafuchi.
20Omu vachivwile valishile Kalunga haupahu wenyi. Kaha vamwambile ngwavo,
Ove ndumbwetu, unamono omu vihita navihita vyavaYuleya vanafwelela, vosena ava vafwila chikuma vilika vyakuJishimbi#21:20 VaYuleya ava vákufwila vilika vyakuJishimbi, vapwile vaka-kufwelela Kulishitu, vakutambula ulwilo hakumufwelela, oloze vasakile kulama vilika vyakuchisemwa chavo vize vyapandama kukujihana nakukulya, nakukutambuka mwaya Jishimbi..
21Oloze vavalwezanga vyamakuli ngwavo, Ove weji kunangulanga vaYuleya vosena vatwama muli vaka-mafuchi ngwove valikange naMose, nakuvalweza nawa ngwove vazeneke kujihana vana vavo, chipwe kulinga mwaya vilika vyetu.
22Kaha jino natulinga muka? Mwomwo nachivwakana vene ngwavo uneza.
23Shikaho, linga omu natukulweza. Tuli namalunga vawana vanalishingi kumeso aKalunga.
24Yako, ukalitomesa navo, ukavafwetele ovyo navasaka mangana vateule kawewe, kaha vosena navatachikiza ngwavo kumana, vize vávalwezanga vyakukuvuluka ove, kavyeshi vyamuchanoko, oloze nayove nawa wayoya ngana omu jaya Jishimbi.
25Oloze, hakuvuluka vaka-mafuchi vanafwelela, tunavasonekela nakuvalweza ngwetu valihendenga kutunyama vanavatwila makombelo#21:25 Vaka-mafuchi amwe likombelo apwa kalunga kavo., nakumanyinga, nakutunyama vakunyotolola hakuvajiha#21:25 Nge ngwavo, kutunyama vakuzeneka kuvatula miliu hakuvajiha., nakuujila.
26Kaha omu kwachele Paulu ayile navaze malunga nakulitomesa navo, engilile muTembele, kaha alwezele vapilishitu kukuma chamakumbi akulijilika, nomu navakahana mulambu hali mutu himutu.
27Omu aze makumbi atanu naavali apwile hakamwihi nakukuma, vaze vaYuleya vakuAja hakumumona muTembele, vasowangijile lizavu lyavatu lyosena, kaha vamukwachile,
28vatambakanyine ngwavo,
Enu malunga vaIsalele, tukafwenuko! Ou ikiye mutu áli nakunangula vosena kwosena chihande chakwimanyina vaYuleya naJishimbi, nachihela chino nakole, kaha chikwavo nawa, nengisa lyehi vaHelase muTembele, hakulinga ngocho najilulula lyehi omu mwajila.
29Mwomwo likumbi lyeka vamwene Tolofwimu wakuEfwesu hamwe naikiye munganda, kaha vashinganyekele ngwavo pamo Paulu amwingishile muTembele.
30Munganda mwosena mwapwile pindangano, kaha vatu valundumukile nakukwata Paulu nakumukokela kuweluka waTembele, hahaze vene vasokele kuvikolo vyaTembele.
VaLoma navakwata Paulu
31Omu vasakile kumujiha, mujimbu wahetele kuli mukulwane wamaswalale javaLoma ngwavo muYelusalema mwosena muli pindangano.
32Kaha hahaze vene ambachile maswalale natupitau nakulahilako. Omu vamwene uze mukulwane wamaswalale navaze maswalale, vechele kuveta Paulu.
33Haze vene uze mukulwane wamaswalale apandamineko nakumukwata, avalwezele vamukase malenge avali. Avahulishile ngwenyi, Iyaze ou? Nalingi ika?
34Kaha vatu vamwe vamulizavu vatambakanyine namwavo, vakwavo nawa namwavo. Omu ahonene kwivwa kanawa chize chihande mwomwo wachize chizungo, avalwezele ngwenyi vamwingise mukembwe yamaswalale.
35Jino omu ahetele kujindondelo jakunyinyina nakwingila mukembwe, maswalale vamuzundwile hautenu walize lizavu,
36mwomwo lize liyongomena lyavakavangijile nakutambakana ngwalyo, Jihenuyo!
37Omu hasalile hahandende nakumwingisa mukembwe yamaswalale, Paulu ahulishile uze mukulwane wamaswalale ngwenyi, Naungwitavisa nguhanjike nayove? Ikiye akumbulwile ngwenyi, Kumana, watachikiza chiHelase?
38Keshi yoveko uze kaEjipitu ákatwile jita yakufumbukila fulumende nakutwaminyina vaze malunga makombakaji awana (4,000) vaka-kujiha vatu nakuvatwala mupamboko?
39Oloze Paulu ambile ngwenyi, Ami ngukaYuleya wamulimbo lyakembwe lyaTalasu, mungalila yaShilisha, ngwapwa ngukaLoma wamulimbo lyapuho. Ngunakulembelela, ngwitaviseko nguhanjike navatu ava.
40Kaha amwitavishile. Paulu emanyine hajindondelo jakunyinyina, avaholesele vaze vatu nalivoko. Kaha omu vaholele kulu, ahanjikile kuli vakiko mulilimi lyachiHepeleu, ngwenyi,
Currently Selected:
Vilinga 21: LUE
Highlight
Share
Copy
Want to have your highlights saved across all your devices? Sign up or sign in
Bible Society of Zambia
