Vilinga 22
22
Paulu mwalihakwila kumeso avatu
1Enu malunga, enu vandumbwami vaYuleya nayenu vatata, ivwililenu jino kulihakwila chami.
2Jino omu vevwile ali nakuhanjika muchiHepeleu vaholele kulu. Kaha ambile ngwenyi,
3Ami ngukaYuleya, ngwasemukilile kuTalasu, mungalila yaShilisha, oloze ngunakolela muno munganda, vangunangwilile kutungi yaNgamalyele mwosena mwaya Jishimbi javakakuluka jetu, kaha ngwapwa ngumuka-kusungwila Kalunga nge omu muli enu muvosena likumbi lyalelo.
4 Kaha ngwayanjishilenga vaka-Jila eyi swi-i nakukuvajiha, ngwakashilenga namalunga namapwevo nakuvatwala kukamenga,
5nakapilishitu wakulitulaho nazango yosena yavakulwane javaYuleya vanahase kupwa vinjiho jami. Ngwatambwile mikanda kuli vakiko yakutwala kuli vandumbwetu vaYuleya#22:5 Vapwile vausoko wenyi kuchisemwa chavo chauYuleya. Keshi vaka-kufwelelako. kuNdamashiku, mangana navaze vapwile kuze nawa ngukavakase nakuvaneha kuYelusalema vavazangamise.
Paulu mwavalweza omu akunyukile hashili
(Vili 9:1-19; 26:12-18)
6Jino omu ngwapwile nakuya, hakuheta kwakamwihi na Ndamashiku kafwe hamulungu#22:6 Ha12.00., kukasumuka, kumunyika chachinene chakufuma mwilu chinangujingilika chelele ndo.
7Kaha ngwaholokele hamavu#22:7 MuchiHelase lizu linalumbunuka ngwavo vaholokele kufuma helu. Shikaho vapwile hatuvalu., hinangwivwa lizu ngwenyi, Ove Saulu, ove Saulu, uli nakunguyanjishila ika?
8Kaha ami ngwakumbulwile ngwami, Ove Mwata, yove iya? Kaha angukumbulwile ngwenyi, Yami vene Yesu wakuNazaleta uli nakuyanjisa.
9Vaze ngwapwile navo vamwene chize kumunyika, oloze lizu lyayaUze apwile nakuhanjika nayami kalyavalumbunukilileko.
10Kaha ngwamuhulishile ngwami, Ove Mwata, ngulinge muka? Kaha Mwata angwambile ngwenyi, Katuka, yako muNdamashiku, kaha muze navakulweza vyosena ovyo vanakutongwela kulinga.
11Jino omu kawili kangukwachile, hakutohwa chachize kumunyika, vangukwachile kulivoko kuli vaze ngwapwile navo nakungutwala namuNdamashiku.
12Jino mutu umwe, lijina lyenyi Ananyiya, lunga wakuzakama Kalunga nge omu jaya Jishimbi, wapuho yamwaza muli vaYuleya vosena vatwaminenga kuze —
13ejile nakwimana kwakamwihi nayami nakwamba ngwenyi, Ove ndumbwami Saulu, tona. Kaha hahaze vene ngwatonene, kaha ngwamumwene.
14Kaha ambile ngwenyi, Kalunga kavakakuluka jetu nakutongola mangana utachikize mwaya muchima wenyi, umone Uze Muka-kwoloka nakwivwa lizu lyamukanwa kenyi.
15Mwomwo naupwanga uchinjiho chenyi kuli vatu vosena havyevi unamono nevi unevu.
16Kaha jino, uli nakuvandamina ika? Katuka vakujimike, utome#22:16 VaYuleya nge Paulu, hakwitavila kumujimika, vapwile nakwitavila hatoma ngwavo, Tunalombo lukonekelo hamulonga wakukana Yesu Kulishitu nakumupapalila hakulusu. kumilonga yove yashili hakusanyika Mwata halijina lyenyi.
17Jino omu ngwakindulukile kuYelusalema, ngwapwile muTembele nakulomba, kaha ngwalezukilile mutulo.
18Kaha ngwamwene Mwata mwangwamba ngwenyi, Anguhwa ufume washi muYelusalema, mwomwo unjiho wove wakuvuluka Ami kaveshi kuwitavilako.
19Kaha ngwambile ngwami, Ove Mwata, vavene vaYuleya vanatachikiza omu ngwayilenga musunangonga hisunangonga nakukwata vaka-kukufwelela nakuvatwala kukamenga nakuvaveta.
20 Kaha omu vamwangile manyinga achinjiho chove Setefwano, nayami vene kungwapwile, ngwalikundwijile navo nakulama uvwalo wahelu wavaze vamujihile.
21Kaha angwambile ngwenyi, Yako mwomwo nangukutuma kwakusuku kuli vaka-mafuchi.
22Jino vamwivwililile swi-i nakulizu eli lyakuvuluka vaka-mafuchi, kaha vatambakanyine ngwavo, Ou wakufwana ngana jihenuyo mwomwo katela kuyoyako!
Mukulwane wamaswalale mwasaka kwipula Paulu
23Shimbu vapwilenga nakutambakana nakuzula uvwalo wavo wahelu nakufundula lukungu mupeho,
24uze mukulwane wamaswalale avalwezele vengise Paulu muze mwimbo lyamaswalale, vamwipule nakumushinjisa mangana awane chuma vali nakutambakanyina ngana hali ikiye.
25Oloze omu vamutachikile mangana vamwipule, Paulu ahulishile uze kapitau kamaswalale emanyine kwakamwihi ngwenyi, Kumana choloka kwipula kaLoma ou kanda vawanyine mulonga?
26Kaha uze kapitau kamaswalale hakwivwa ngocho, ayile kuli mukulwane wamaswalale nakumulweza ngwenyi, Nausaka kulinga muka? Mwomwo ou mutu apwa kaLoma.
27Shikaho uze mukulwane wamaswalale ayile nakuhulisa Paulu ngwenyi, Ngulweze, ove ukaLoma tahi? Kaha amukumbulwile ngwenyi, Eyo.
28Kaha uze mukulwane wamaswalale amukumbulwile ngwenyi, Ami ngwalanjile ou uLoma nandando yayinene. Kaha Paulu ambile ngwenyi, Oloze ami ngwasemukile ngukaLoma.
29Hahaze vene vaze vasakile kumwipula nakumushinjisa vafumineko, kaha nauze mukulwane wamaswalale nawa evwile woma hakutachikiza ngwenyi nakase kaLoma.
Paulu mwemana kumeso avaka-zango
30Omu kwachele, mukulwane wamaswalale hakusaka kutachikiza kanawa ocho vanamutwikila mulonga vaYuleya, amukasunwine, alwezele vapilishitu vavalemu nazango yavaYuleya#22:30 Tala ha4:15. yosena ngwenyi vakunguluke, kaha atwalile Paulu nakumwimika kumeso avo.
Currently Selected:
Vilinga 22: LUE
Highlight
Share
Copy
Want to have your highlights saved across all your devices? Sign up or sign in
Bible Society of Zambia
