Vilinga 23
23
1Paulu ashishikile vaka-zango#23:1 MuchiHelase ngwavo, Sunendeline. yavaYuleya, ambile ngwenyi, Enu malunga vandumbwami vaYuleya, ami ngunatwame kumeso aKalunga nachivezu chamwenemwene nakulikumbi lyalelo.
2Kaha uze kapilishitu wakulitulaho Ananyiya alwezele vaze vemanyine kwakamwihi naPaulu ngwenyi, Muvetenu kukanwa!
3Haze vene Paulu himwamwamba ngwenyi, Ove nawa Kalunga mwakuveta, ove mbango yakukwita pemba! Ove unatwame nakungusopesa mwaya Jishimbi, kaha kumana kawazombokele Jishimbiko hakuvalweza ngwove muvetenu?
4Vaze vemanyine kwakamwihi vambile ngwavo, Ove kumana utukane kapilishitu wakulitulaho waKalunga?
5Kaha Paulu ambile ngwenyi, Enu malunga vandumbwami vaYuleya, kangwatachikizanga ngwami ikiye kapilishitu wakulitulahoko, mwomwo vasoneka ngwavo,
Kanda mukavuluka muka-kuyula vatu jove mwamupiko.
6Jino omu Paulu átachikijile ngwenyi vamwe vaSatuse kaha vakwavo vaFwaliseu, atambakanyine muzango#23:6 MuchiHelase ngwavo, MuSunendeline. yavaYuleya ngwenyi, Enu malunga vandumbwami vaYuleya, ami ngukaFwaliseu, ngumwana kaFwaliseu. Ami vali nakungusopesela halutalililo nahakusanguka chavafu.
7Jino omu ahanjikile ngocho, vikokojola vyakatukile mukachi kavaFwaliseu navaSatuse, kaha lize liyongomena lyalihandunwine.
8Mwomwo vaSatuse veji kwambanga ngwavo, Kakweshi kukapwa kusangukako, kakwatwama kangeloko chipwe shipilitu. Oloze vaFwaliseu vetavila ngwavo evi vyosena kuvyatwama.
9Jino kwakatukile chizungo chachinene. Vaka-kusoneka vamwe vakuchihanda chavaFwaliseu vémanyine nakulipula jipami chikuma navakwavo, vambile ngwavo, Katwawanyine kuhenga muli ou mutuko. Nyi nge shipilitu chipwe kangelo ahanjikile nenyi, kaha ika?
10Kaha omu vikokojola vyatohwele, mukulwane wamaswalale evwile woma, ngwenyi pamo Paulu navamusanyuna. Shikaho alwezele maswalale vashikumuke nakumufumisa nangolo mukachi kavo nakumwingisa cheka mwimbo lyamaswalale.
11Jino naufuku, Mwata emanyine kwakamwihi naPaulu nakumwamba ngwenyi, Kanda wivwa womako, mwomwo ngana muze unambulula unjiho wakunguvuluka muYelusalema, mwomumwe nawa kuvanga ukangulumbunune naunjiho namuLoma
Paulu navamutwama punga
12Jino namusana vaYuleya vamukwachile punga, valikashile nakulishinga ngwavo, Katweshi kulya chipwe kunwako, kuvanga Paulu tunajihiyo.
13Vaze valifumbile vahambakanyine makumi awana (40).
14Vakiko vayile kuli vapilishitu vavalemu navakulwane javaYuleya nakwamba ngwavo, Tunalikase nakulishinga ngwetu katweshi kumakila vyakulyako, kuvanga Paulu tunajihiyo.
15Shikaho jino, enu hamwe navaka-zango yavaYuleya lwezenu mukulwane wamaswalale amineheleyo, chisoloke nge munasake kumulohwelela kanawa. Kaha etu tunalizange kumujiha shimbu kanda ahete mwakamwihi.
16Jino muhya waPaulu walunga hakwivwa ngwavo vaka-kole vanamuswaminyina vamulukuke, ayile nakwingila mwimbo lyamaswalale nakulweza Paulu.
17Paulu asanyikile umwe wavaze tupitau twamaswalale nakumulweza ngwenyi, Twala mwanalunga ou kuli mukulwane wamaswalale mwomwo ali nachuma mwamulweza.
18Shikaho amutwalile nakumuhetesa kuli uze mukulwane wamaswalale nakumulweza ngwenyi, Uze funge Paulu angusanyikanga nakungulomba ngwenyi ngunehe ou mwanalunga kuli ove, mwomwo ali nachuma mwakulweza.
19Kaha uze mukulwane wamaswalale amukwachile kulivoko, ayile nenyi kwakuhengama nakumuhulisa ngwenyi, Chuma muka nausaka kungulweza?
20Kaha amulwezele ngwenyi, VaYuleya vanalivwasana lyehi ngwavo vakulombe mangana hamene ukanehe Paulu kuzango yavaYuleya#23:20 Tala ha4:15., chisoloke nge navasaka kumwihwojola kanawa vyachihande chenyi.
21Oloze kanda navakakushinjilako, mwomwo malunga vakuhambakana makumi awana (40) vanamuswaminyina lyehi, vanalikase nakulishinga ngwavo kaveshi kulya chipwe kunwako, kuvanga vanamujihi. Kaha oholili vanalizange lyehi, vali nakuvandamina ove uvahane lisesa.
22Shikaho uze mukulwane wamaswalale amusuwile uze mwanalunga nakumulweza ngwenyi, Kanda ukalweza naumwe ngwove unangulwezeko.
Navatwala Paulu kuli nguvulu Fwelise
23Kaha asanyikile tupitau vavali vamaswalale nakuvalweza ngwenyi, Longesenu maswalale makulukaji avali (200), navaka-tuvalu makumi atanu naavali (70) navaka-makunga makulukaji avali (200), mangana muyenga kuKesaliya halwola lwamuchitatu lwaufuku#23:23 Ha21:00..
24Kaha mulizange nawa natuvalu mangana mumunyinyiseho Paulu nakumuhetesa kanawa kuli nguvulu Fwelise.
25Kaha asonekele mukanda ngana:
26Ami Kolochiu Lushase,
Kuli nguvulu walema chikuma Fwelise,
Ngunameneka mwane.
27Lunga ou vamukwatanga kuli vaYuleya kaha vasakanga kumujiha. Kaha ami ngwezanga nachendo chamaswalale nakumupululula hakwivwa ngwavo ikiye kaLoma.
28Kaha hakusaka kutachikiza mulonga vamutwikanga, ngwamutwalanga kuzango yavakiko vaYuleya.
29Ngwawananga ngwami vanasake kumuhana mulonga kweseka nakulipika chavo hajishimbi javo. Oloze kaweshi mulonga wakutela kufwilaho chipwe kumuhaka mukamengako.
30Kaha omu vangulwezanga ngwavo lunga kana vanamutwame lyehi punga yakumujiha, hakiko vene ngunamutumina washi kuli ove. Ngunalweze nawa venya-chihande vambulule mulonga vanamuwane nawo kumeso ove.
31Jino vaze maswalale valingile muze vavalwezele, vambachile Paulu nakumutwala naufuku kuAndepatale#23:31 Vatambukile hamavu jikilomita 55 nakuheta kuAndepatale..
32Kaha omu kwachele vaka-tuvalu vayilenga nenyi hamwe, oloze maswalale vakwavo vakindulukile kulimbo lyavo lyamaswalale.
33Omu vahetele kuKesaliya vahanyine uze mukanda kuli uze nguvulu nakuluula nawa Paulu kuli ikiye.
34Kaha nguvulu hakuutanga, ahulishile kungalila nafumu. Omu atachikijile ngwenyi nafumu kuShilisha,
35ambile ngwenyi, Omu naveza venya-chihande, numba ngutale hachihande chove. Kaha avalwezele vamulamine muzuvo yawangana#23:35 MuchiHelase ngwavo, Peletolyume. atungishile Helote.
Currently Selected:
Vilinga 23: LUE
Highlight
Share
Copy
Want to have your highlights saved across all your devices? Sign up or sign in
Bible Society of Zambia
