Vilinga 5
5
Kwonga chaAnanyiya naSafwila
1Jino lunga umwe lijina lyenyi Ananyiya, ukwechi pwevo lyenyi Safwila, alanjishile mavu enyi amwe,
2kaha aswekele jimbongo jimwe hajize awanyine, himwaneha jikwavo kuli vaposetolo#5:2 MuchiHelase ngwavo, nakujitumbika kumahinji avaposetolo. — pwevo lyenyi nawa achitachikijile.
3Oloze Petulu ambile ngwenyi, Ove Ananyiya, mwomwo ika Satana nazalisa muchima wove numba uhanjike vyamakuli kuli Shipilitu Wajila nakuswekaho jimbongo jimwe hajize walanjisanga mavu ove?
4Shimbu kanda uwalanjise, kumana kaapwanga oveko numba? Hakuwalanjisa, ndando yawo nawa kayapwanga mungolo joveko numba? Nyi mwomwo ika watakanga chuma kana mumuchima wove? Kawahanjikile makuli kuli vatuko, oloze kuli Kalunga!
5Ananyiya hakwivwa mazu awa, alimbukile nakufwa. Kaha vosena vaze vachivwile vevwile woma waunene.
6Vakweze vakatukile nakumujingila halihina, kaha vamutwalile nakumufunda.
7Jino omu mwahichile kafwe jiola jitatu, pwevo lyenyi engililemo chakuzeneka kutachikiza chize chinasoloka.
8Kaha Petulu amuhulishile ngwenyi, Ngulweze nge mwalanjisanga mavu enu nandando yanganji. Ikiye etavile ngwenyi, Eyo, nandando kana vene.
9Oloze Petulu amwambile ngwenyi, Mwomwo ika mwalivwasananga kweseka Shipilitu yaMwata? Tala, mahinji avaze vanafundu lunga lyove ali kuchikolo, kaha nayove nawa navakumbata nakukulovola.
10Kaha hahaze vene alimbukile kumahinji aPetulu nakufwa. Vaze vakweze vengililemo, vamuwanyine nafu lyehi, kaha vamutwalile nakumufunda kwakamwihi nalunga lyenyi.
11Kaha liuka lyosena lyevwile woma waunene, navaze vosena váchivwile.
Vaposetolo navalinga vinjikizo navyakukomwesa
12Jino vinjikizo vyavivulu navyakukomwesa vyalingiwilenga kumavoko avaposetolo mukachi kavatu. Kaha vaka-kufwelela vosena vakungulukilenga namuchima umwe musenge yaSolomone.
13Kaha vaze kavafweleleko naumwe wauchi ahasukile kulinunga navo, oloze vavavumbikilenga chikuma kaha.
14Kaha kuli Mwata vahakilileko vaka-kufwelela vavavulu chikuma, mayongomena amalunga namapwevo.
15Shikaho vatu vatwalilenga vaveji javo kumikwakwa nakuvasavalika hamisela nahavisalo mangana Petulu hakuhita, chipwe muvwimbimbi wenyi kaha, ukwate hali vaveji vamwe.
16Kaha nawa liyongomena lyavatu vakumembo-akembwe alihata naYelusalema lyakungulukile nakuneha vaka-kuviza navaze vapwilenga nakuyanda navashipilitu vaunyengwe, kaha vavahindwilenga vosena.
Navahaka vaposetolo mukamenga
17Jino kapilishitu wakulitulaho, navosena vaze apwile navo (vápwile vakumukana wavaSatuse), hakuzala nalisungu
18vakwachile vaposetolo nakuvahaka mukamenga.
19Oloze naufuku, kangelo kaMwata asokolwele kuvikolo vyakamenga nakuvalovolamo nakwamba ngwenyi,
20Yenu mukemane muTembele nakwambulila vatu mazu osena amwono uno.
21Kaha omu vachivwile, vengilile muTembele chimenemene nakunangula. Jino kapilishitu wakulitulaho ejile kuzango navaze vosena apwile navo, kaha vasanyikile zango yavaIsalele#5:21 MuchiHelase ngwavo, vaka-sunendeline. yosena navakulwane javana vaIsalele vosena vakunguluke, kaha vatumine vatu kukamenga vavanehe.
22Oloze omu vaze vaka-kulama Tembele vahetele kukamenga, kavavawanyinemoko, kaha vakindulukile nakuvalweza ngwavo,
23Kamenga tunakawane kakusoka kanawa, navaka-kulamako nawa hanga vanemanyina kuvikolo. Oloze etu hakusokololako, katwawanyinemo naumweko.
24Kaha omu mukulwane wavaka-kulama Tembele navapilishitu vavalemu vachivwile, vafwile chishima nakulizakamina mujila nachikumina chihande kana!
25Jino kwejile umwe nakuvalweza ngwenyi, Ehe-e, vaze malunga mwahakanga mukamenga vanemana muTembele nakunangula vatu.
26Kaha haze vene uze mukulwane ayile hamwe navaka-kulama Tembele nakuvaneha chakuzeneka utenu, mwomwo vevwile woma wavatu ngwavo navavasa malolwa.
27Kaha omu vavanehele, vavemikile kumeso azango yavaYuleya. Kaha Kapilishitu wakulitulaho avahulishile ngwenyi,
28 Kumana katwamikanjile chikuma ngwetu, Kanda mukanangula vatu mulijina eliko? Kaha talenu, munatanjisa lyehi kunangula chenu muYelusalema, jino muli nakusaka kuhaka mulonga wamanyinga ayOu Mutu hali etu.
29Oloze Petulu navakwavo vaposetolo vakumbulwile ngwavo, Etu kuvanga twononokenga Kalunga, kuhambakana vatu.
30 Kalunga kavakakuluka jetu asangula Yesu mwájihile hakumutachika hachitondo.
31Kalunga amuzezula kulivoko lyenyi lyachilyo, kupwa Twamina, Mulwilo, mangana ahane vaIsalele muchima wakukunyuka hashili nakwalumuka, mangana avakonekele milonga yavo yashili.
32Kaha etu tuvinjiho havyuma evi, naShipilitu Wajila nawa, Ou náhane Kalunga vaze vamwononoka#5:32 Hakwivwa mujimbu wamwaza mutu mwononoka Kalunga hakufwelela Mwata Yesu Kulishitu hikutambula Shipilitu Wajila. Tala Efwe 1:13-14..
33Omu vevwile ngocho, vapihililile chikuma kaha vajinyine kuvajiha.
34Jino kaFwaliseu umwe, lijina lyenyi Ngamalyele, muka-kunangula Jishimbi, uze vahanyinenga kavumbi vatu vosena, ikiye akatukile nakwimana muzango yavaYuleya#5:34 MuchiHelase ngwavo, musunendeline nakuvalweza vavalovole vaze vatu hatando yayindende.
35Kaha avambile ngwenyi, Enu malunga vaIsalele, zangamenu nachuma echi namusaka kulinga hali vatu ava.
36Mwomwo, shimbu kanda makumbi awa ahete, kwakatukile Teuta, uze alimwene kupwa mutu wamulemu, kaha malunga vakuheta kafwe makulukaji awana (400) valinungile nenyi. Ikiye vamujihile, kaha vosena vaze valinungile nenyi valimwangile, kaha chakumine.
37Kufuma hali ikiye, kwakatukile Yuta wakuNgalileya hamakumbi aze akulisonekesa, kaha akokele vatu vavavulu mangana vafumbukile chiyulo. Naikiye nawa anongele, kaha vosena vaze valinungile nenyi valimwangile.
38Oloze jino hali vatu ava, nangumyamba ngwami, fumisenuho mavoko enu, vechenu. Mwomwo punga eyi chipwe milimo eyi, nge yakufuma kuli vatu, kaha nayikuma.
39Oloze nge yakufuma kuli Kalunga, kaha kamweshi kuhasa kuyihonesako, navamiwana kupwa muvaka-kole jaKalunga! Kaha avakunywine.
40Kaha omu vasanyikile cheka vaposetolo mukachi, vavepwile vikote nakuvakanda vazeneke kuhanjika cheka mulijina lyaYesu, kaha vavechele.
41Oloze vakiko vafumine kuzango yavaYuleya#5:41 MuchiHelase ngwavo, vaka-sunendeline. nakuwahilila, mwomwo Kalunga avamwene ngwenyi vatela kusaukila halijina lyaYesu.
42Kaha hakumbi hakumbi kavalitwaminyine kunangula nakwambulula muze muTembele nakuzuvo hizuvoko, ngwavo Yesu Ikiye Kulishitu.
Currently Selected:
Vilinga 5: LUE
Highlight
Share
Copy
Want to have your highlights saved across all your devices? Sign up or sign in
Bible Society of Zambia
