Genese 14
14
1Hanyaka hadiŋi niAmirafweli mwanta wakuShinari, niAriyoki mwanta wakuElasari, niKedolawoma mwanta wakuElami, niTidali mwanta wakuGoyimi, 2hiyakudasa njita naBera mwanta wakuSodoma, naBirisha mwanta wakuGomora, naShinabi mwanta wakuAdima, naShemebi mwanta wakuZeboyimi, namwanta wakuBela diyi Zowari. 3Wenawa wejima wawu adibombeleli muchinekineki chakuSidimi, doduŋiya Damuŋwa. 4Amulambwili Kedolawoma nyaka ikumi nayiyedi, hamwaka wekumi namuchisatu adikaŋili. 5Mwaka wekumi namuchiwana Kedolawoma hakushika, nianyanta adibombeliyi nawu, hakutapani aRefwa muAsheteroti Karanayimi, niaZuzi muHami, niaEmi muShave Kiriyatayimi, 6niaHori kumpidi yawu yakuSeyiri, tapee nikuEliparani, kwakwihi nesaŋa. 7Afunta nikufunta, ashika nikuEnimishipati, kwoku kuKadeshi, atapa niituŋa dejima dawaAmaleki, atapa niaAmori, ashakamini muHazazoni Tamari. 8Nimwanta wakuSodoma, nimwantawa kuGomora, nimwanta wakuAdima, nimwanta wakuZeboyimi, nimwanta wakuBela diwu Zowari, anyamuka nikunyamuka; ayitanjika ninyikankayanjita muchinekineki chakuSidimi; 9njita yakudasa naKedola woma mwanta wakuElami, naTidali mwanta wakuGoyimi, naAmira fweli mwanta wakuShinari, naAriyoki mwanta wakuElasari; anyanta awanahiyakulwa nawanyanta atanu. 10Hakwila ochu chinekineki chakuSidimi chadiŋi chejima kwamachiŋi chiŋi hohu; anyanta akuSodoma nakuGomora hiyakutemuka, hiyakudimbukila kwenoku, anashali hiyakutemukila kumpidi. 11Apupa niyuma yejima yamuSodoma niya muGomora, niyakudya yawuyejima, hiyakudiyila kwawu. 12Akwata niLoti mwana kamana kwaAbarama niyuma yindi, aya nikuya.
13Kwayili muntu wumu wapulukih, hakuya nakuleja Abarama kaHeberu; yena dinu wadiŋi nakushakama kunyikula yakaAmori Mamiri, mana kwaEshikoli, mana kwaAneri; wenawa adiŋi adikwata wubwambu naAbarama. 14Abarama chachitiyiliyi nawu mukwawu anamukwati, hakutwala antu indi amayala afundishayi dehi njita, avwalikili hamukala windi, amayala makulakaji asatu namayala ikumi natanu nasatu, hakuyilondela lufuchi nikuDani. 15Niyena ni ambuŋindi adambwili nawufuku nakuyilotokela, ayitapa nikuyitapa, hiyakuyihaŋa hape-e nikuHoba, wekala hambadi yaDamakasa yachikasa chachimunswa. 16Waleteli cheŋi yuma yejima, waleteli cheŋi nimana kwindi Loti, niyuma yindi, niambanda niantu.
17Mwanta wakuSodoma wayili nakumukinkilila chafuntiliyi kwayili yinakutapa niKedolawoma nawanyanta adiŋiyi nawu, kuchinekineki chakuShave, dichi chinekineki chaMwanta. 18Melekizedeki mwanta wakuSalema wedishili nidinkendi nivinyu; yena diyi wadiŋi kapristu kaNzambi, Nzambi Wabadika Kwiwulu. 19Yena wamukiswilili Abarama nkisu, nindi, Abarama amukiswili kudi Nzambi Wabadika Kwiwulu, diyi wahetani mawulu nimaseki; 20Kisu kisu Nzambi Wabadika Kwiwulu, nahanikudeyi akwankunyi neyi. Niyena wa ambwili yuma yejima mumaseka ikumi, wamwinkeluku iseka dimu. 21Mwanta wakuSodoma wamwilili Abarama, nindi, Nyinkami antu, hakwila eyi wutambuluku yuma. 22Abarama wamwilili mwanta wakuSodoma, nindi, Ami nololi chikasachami kwiwulu nenyiki kudi Yehova, diyi Nzambi Wabadika Kwiwulu, diyi waheta nimawulu nimaseki, 23nami, Ami hinukutambula hela kawanda, hela kamwonji kakunkwabilu, hela kachuma keyi kamuku, wakandakela neyi, Ami yami namuhetesheli Abarama; 24chiŋa yoyina yanaduwu anyikwenzi, niyakwinkahu amayala inayili nawu, wowu aAneri naEshikoli naMamiri, wena atambuli mwaka yanzaŋenawu.
Currently Selected:
Genese 14: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
