Luka 16
16
1Wadiŋi nakalama kindi; yena kalama hiyakumushimuna kudi akwawu, nawu wudi nakukisaŋana yuma yambala yamwanta windi. 2Yena hakumutambi ka, hakumwila nindi, Iyi nsaŋu yeyi yinidi nakutiya yanka? Lumbululaku mwahita wulama weyi; muloŋa wulama weyi wunakumi dehi. 3Owu kalama hakwila mumuchima windi nindi, Ichi chakuntambulayi mwanta wami wulama wami, nukwila ŋahi? Ŋovu jakudima kwosi; kulomba chi kweti nsonyi. 4Neluki dehi chinukwila, kulonda chakunfumishawu muwulama akantambuli mumatalawu. 5Hakutambika akwanyikudi yamwanta windi ejima; hakumwihula watachi nindi, Mukudi weyi namwanta wami washika mudihi? 6Yena nindi, Manji akweseka ngungungu nkulakaji. Hakumwila nindi, Nonaku mukanda weyi wamukudi, shakamaku swayi wusoneki makumi atanu. 7Hakumwihula mukwawu nawa nindi, Indi eyi mukudi weyi namwanta wami washika mudihi? Yena nindi, Yesekelu yatidiku nkulakaji. Hakumwila nindi, Nonaku mukanda weyi wamukudi, wusoneki makumi atanu nasatu. 8Mwanta windi hakumuhameka owu kalama waheŋa chababeliyi; muloŋa antu ampata yamunu mwishina amakonu, anabadiki akwachejeji kubabala. 9Ami nukuyileja nami, yikwatilenu amabwambu hela namaheta akuheŋa, kulonda chiyakamana akayitambuli mwakushakama haya nyaka.
10Muntu wukushinshika nakachuma kasweja kukeha, wukushinshika nawa ninayuma yayivulu; muntu wukuheŋa nakachuma kasweja kukeha, wukuheŋa nawa ninayuma yayivulu. 11Dichi neyi munabuli kushinshikila maheta akuheŋa, wukuyishila kuhemba maheta alala hinyi? 12Neyi munabuli kushinshikila chuma chamukwenu, wukukwinka cheyeyi aweni hinyi? 13Ŋambanyi wukutwesha kukalakela anyanta ayedi? Chiŋa yohelahu wumu, yokeŋa mukwawu; hela yokalakela wumu, yodiwula mukwawu. Himunatweshi kukalakela niNzambi nimahetaku.
14AFwarisi adiŋi akwalwisu, chanatiyuwu yuma yejimiyi hiyakumuseha. 15Hakuyila nindi, Enu yenu mwadishimunaŋa kudi antu nenu twaloŋa; ilaŋa Nzambi neluki nyichima yenu muloŋa chuma chalemeshaŋawu kudi antu, kumesu aNzambi hichishimashima.
16Nshimbi niatuprofwetu anakumini hadi Yowanu, ilaŋa kufuma henohu ashimunaŋa nsaŋu yawanta waNzambi yayiwahi, niantu ejima hiyakwijila mu naŋovu. 17Chapepela iwulu nimaseki kuhita, chakala kuholoka kamufunda kakunshimbi kamu.
18Muntu wukuseŋa Iŋodindi asumbula wacheŋi, neli wuvumbi; wukusumbula mumbanda anaseŋuwu kudi nfumwindi neli wuvumbi.
19Kwadiŋi mukwakuheta wumu wavwelaŋa mahina amawahi achinana niatooka, washakaminaŋa nakuluŋa hefuku hefuku. 20Kwadiŋi nawa kazweŋi, ijina dindi Lazaru, amukamikilaŋa kuchisu chindi, mujimba wejima kwayilonda hohu; 21wakeŋa elaŋa nindi amudiishaŋa nkúuku jikuholokaŋa kumesa yanowu mukwakuheta; chalala niatuwa hiyakwinzaŋa nakulasha hayilonda yindi. 22Owu kazweŋi hakufwa, amweleka nikudi aŋelu, amutwala nihantulu yaAbarahama. Mukwakuheta niyena hakufwa, amujiika nikumujiika. 23Hakufumbwila mesu mukaluŋa mwadiŋiyi, hakukaba nankashi, hakumumwena Abarahama kwakulehi, niLazaru wudi hantulu yindi. 24Hakubilela nindi, Tata Abarahama, antiyili luwi, atemeshi Lazaru atumpi insa yamunu windi mumeji, enzi awundishi idimi dami; ami nidi nakumona yihuŋu mumuzuzu iwu. 25Kutiya Abarahama nindi, Eyi mwanami, anukaku eyi chiwadiŋi mumi, watambwilaŋa yuma yeyi yayiwahi, chochadiŋi nakutambulayi Lazaru yuma yindi yatama; hakwinzichi yena anamukundeji dehi, eyi hiwukumona yihuŋu. 26Hadi nichuma chikwawu; hakachi ketu nanenu ashahu ikela dasweja, kulonda muntu wukukeŋa kufuma kunu enzi kudenu, akakaŋanyi; hela muntu wukukeŋa kufuma oku amotokeli kudetu, akapanyi nawa. 27Yena nindi, Komana neyi ochu, nalembi tata, mutemeshi kwitala datata yami; 28muloŋa ni kweti ana kwami atanu; ayi akayileji, kuchina niwena kwinza munu mwakukaba nankashi. 29Ilaŋa Abarahama nindi, Akweti nyikanda yaMosi niyawatuprofwetu, ayitiyi. 30Ilaŋa yena nindi, Nehi tata Abarahama, neyi muntu afuma mudi afu aya kudi wena, akabalumuka munyichima. 31Abarahama hakumwila nindi, Neyi ákubula kutiya Mosi niatuprofwetu, hela muntu wukusaŋuka mudi afu hiyaketiya nihantuku.
Currently Selected:
Luka 16: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
