Luka 15
15
1Ansonkeshi ejima niakwanshidi hiyakukundama kwakwihi nayena kulonda amutiyi. 2AFwarisi nawansoneki hiyakutoba nawu, Iwu muntu watambulaŋa akwanshidi, hakudya nawu. 3Hakuyitila chishimu ichi, 4nindi, Mwinenwinyi wukwila neyi wukweti nkulakaji yanyikoku, hajimbala wumu, wukubula kushiya owu makumi atanu nawana nanyikoku yitanu nayiwana mwisaŋa, hakuya nakukeŋakeŋa owu najimbali, keŋe-e nichakumuwanayi? 5Chakumuwanayi, wukumusha hamafwiji nakuzaŋalala. 6Chakushikayi kwiindi, hakutambika amabwambu jindi ni akwawu atuŋayi nawu kwakwihi, hakuyila nindi, Tuzaŋalalenu enu akwetu, mukoku wami wajimbala namuwani dehi. 7Nukuyileja nami, mwiwulu, neyi akumona mukwanshidi wumu nabalumuki mumuchima, mukwi kala muzaŋalu wakubaaika muzaŋalu wakuzaŋalala namakumi atanu nawana natanu nawana awantu aloŋa anabuli nsaŋu yakubalumuka mumuchima.
8Hela mumbandanyi wukwila neyi wukweti ikumi damali, neyi ajimbeshahu idali dimu, wukubula kubutula inoŋu, akombakomba mwitala, nakukeŋakeŋa chacheni nichakudiwanayi? 9Chakudiwanayi hakutambika amabwambu jindi ni akwawu atuŋayi nawu kwakwihi, hakwila nindi, Tuzaŋalalenu enu akwetu, nawani idali dinajimbesheli. 10Nukuyileja nami, kumesu awaŋelu aNzambi kwekalaŋa muzaŋalu hansaŋu yamukwanyiloŋa wumu nabalumuki mumuchima.
11Hakwila nawa nindi, Kwadiŋi muntu wumu wadiŋi nawanyanindi amayala ayedi. 12Wakansi wamwilili tata yindi nindi, Tata, nyinki iseka dayuma yinakeŋa kudya. Hakuyipaŋila yuma yindi yakudihandisha nachu. 13Hakadi nikuleha mafuku, owu mwana wakansi hakupompesha yuma yejima, hakudiyila kwindi kwituŋa dakwakulehi, kwenoku hakukisaŋana mahetindi nakwenda nakubajama. 14Chanamanishiyi yuma yejima, mwituŋa odu muholoka ninzala yeneni, hakutachika kufwa nzala. 15Hakuya nakushakama namwenimbu wetuŋiodu; yena hakumutemesha mumahindi adiishi aŋulu. 16Wakeŋeli nankashi kwikuta namafulu adiilaŋa aŋulu, hikwadiŋi muntu wakumwinka chuma, hela wumuku. 17Chanawundishiyi mumesu, hakwila nindi, Aŋamba jatata o kuvula akweti yakudya yayivulu, enda ashiyahu, hakwila ami kunu hinukufwa nanzala. 18Nukunyamuka kwami niyi kudi tata, nakamwili nami, Tata, navulumuni Nzambi wamwiwulu, navulumuni nineyi nawa; 19hinateli kwami kuntena cheŋi nawu mwaneyuku; aŋiteji mwani kwikala neyi ŋamba yeyi wumu. 20Anyamuka nikunyamuka, aya nikudi tata yindi. Ilaŋa hadiŋiyi wuchidi maaya, tata yindi hakumumona, hakutiya wushona, hakuya lufuchi, hakumukumbata kunshiŋu, hakumupwepujola. 21Mwanindi hakumwila nindi, Tata navulumuni Nzambi wamwiwulu, navulumuni nineyi nawa; hinateli kwami kuntena cheŋi nawu mwaneyuku. 22Ilaŋa tata yindi hakuyila anduŋu jindi nindi, Letenu swayi chi kovwelu chachilehi chochasweja kuwaha, mumuvwikichu; mumushi nikazeya kumunu windi, nimasapatu kunyendu yindi. 23Letenu mwana kaŋombi wamanji, mumujahi; tudyenu, tuluŋenu; 24muloŋa iwu mwanami iwu wafwili, nahandi cheŋi; wajimbeli, namwekani. Atachika nikuluŋa.
25Ilaŋa mwanindi wamukulumpi wadiŋi mwiha. Chadiŋi nakwinzayi, hakushika kwakwihi netala hakutiya nikwimba nikuhaŋana. 26Hakutambika mukwenzi weyala wumu, hakumwihula nindi, Kunasoŋidi? 27Yena hakumwakula nindi, Mana kweyi nenzi dehi; tata yeyi namujahili dehi mwana kaŋombi wamanji, nanichi chanamutambuliyi cheŋi wamuwenyi, wakola ngu. 28Ilaŋa yena hakuzuwa, kwonti kwindi kwijila mu. Tata yindi hakwidika, hakumulembelela. 29Ilaŋa yena hakumwakula nindi, Nyaka yejimiyi nakukalakelaŋa ho-o, kanda dehi nimotokuhu izu deyi; eyi kunyinka hela mwana kampembi, kulonda niluŋi chimu nawamabwambu jami, nehi. 30Hakwila chanenziyi iwu mwaneyi iwu, wakisaŋana dehi yuma yeyi yakudihandisha nachu nawayivumbi, hiwukumujahila ni mwana kaŋombi wamanji. 31Yena hakumwila nindi, Eyi mwanami, twekala neyi mafuku ejima, yuma yami yejima yeyeyi hohu. 32Twadi kwila ŋahi? Tubuli kuluŋa nikuzaŋalala? Iwu mana kweyi wafwili, nahandi cheŋi; wajimbeli, namwekani.
Currently Selected:
Luka 15: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
