Luka 14
14
1Hasabata yimu, cheŋililiyi mwitala danyuli yawaFwarisi wumu adiyi nindi, hiyakumushinshika swi-i. 2Kwatalishiliyi mesu indi kudi muntu wukweti musoŋu wandondu. 3Yesu hakuhosha nawakwanshimbi nawaFwarisi nindi, Kúuka hasabata chaloŋa, tahindi nehi? 4Wena chochamwenawu kwazo-o. Hakumukwata, hakumúuka, hakumwila nindi, Yaŋa kweyi. 5Hakuyila nindi, Mwinenwinyi wukwila neyi wukweti chimbulu hela ŋombi, aholokela mwishima hasabata, alabajala nakumukokamu? 6Hiyamweni mwakumwakwila cheŋi mazu awaku.
7Chamweniyi owu antu atambikiluwu hiyakutonda kushakama halema hohu, 8hakuyitila chishimu nindi, Neyi anakutambiki kumawija akusumbwisha, bayi wutonda kushakama halemaku, hamwaha anatambiki dehi muntu wabadikeyi kulema; 9chakwinzayi owu natambiki nineyi niyenowu, hakukwila nindi, Aha hambala haniwu. Chiwukutachika kuya habula kulema, o jinsonyi! 10Neyi anakutambiki, sambilaku kushakama habula kulema; chakwinzayi owu nakutambiki akwili nindi, Eyi ibwambu dami, inzaku wushakami hanu halema; akakumona kulema kudi akwenu ejima wunashakami nawu nakudya. 11Muloŋa muntu wukuditohesha akamukehesha; nimuntu wukudikehesha akamutohesha.
12Hakumwila owu muntu wamutambi kili, nindi, Neyi wukuteleka chawija chamwaana hela chamelela, bayi wutambika amabwambu jeyi hela ana kweyi hela awusoku weyi, hela akwenu ahetaku; akenda kakutambika nineyi nawa, akakuhiŋishilamu. 13Neyi wukuteleka chawija cheyi, katambiki atuzweŋi, niayifwayi, niakwakubalakata, niamputamesu, 14kulonda wukooleki; muloŋa wena hiyakweti yakukuhiŋishilamuku, akakuhiŋishilamu hamba kasaŋuka akwakuloŋa.
15Mazu awa chanayitiyuwu kudi muntu wumu, wadiŋi hamu nawenowu ashakaminiyi nawu nakudya, hakumwila nindi, Muntu wakadya muwanta waNzambi nakooleki. 16Yesu hakumwila nindi, Muntu wumu watelekeli chawija cheneni, hakushiikashiika antu amavulu. 17Mpinji yakudya chawija chiyinashiki, hakutemesha nduŋu yindi nindi, Yaŋa wutambiki ashiikawu dehi neyi, Inzenuŋa, yuma yejima aloŋesha dehi. 18Wejima wawu hiyakutachika kuleyaleya namuchima wawu wumu hohu. Watachi nindi, Nalandi iha dami, nakeŋi niyi nakuditala; aŋiteji mwani kushala. 19Mukwawu nawa nindi, Nalandi ikumi daŋombi jakudimisha, nakeŋi niyi nakujeseka; aŋiteji mwani kushala. 20Mukwawu nawa nindi, Nasumbuli iŋodami, hinukutwesha kuyaku. 21Owu nduŋu hakwinza, hakumuleja nkaka yindi yumiyi. Owu mwanta wetala hakuzuwa, hakumwila nduŋu yindi nindi, Yaku swayi munyikwakwa ninamutujila twamumukala, wuletaleti atuzweŋi, niayifwayi, niamputamesu, niakwakubalakata, wuyijiŋumu. 22Owu nduŋu hakumwila nkaka yindi nindi, Mwanta, neli dehi muwunanleji, ilaŋa munashali mwakushakama antu amakwawu. 23Mwanta hakumwila nduŋu yindi nindi, Yaku munjila jakula, ninamutunyilamba, wuyikanjikiji eŋilumu, kulonda mwitala dami mwinzali to-o. 24Mulona nukuyileja nami, awa antu ashiikiluwu, hosi niwumu wakatompa kuchawija chamuku.
25Mwadiŋi nakuyayi himukuya nimazaza awantu amavulu; yena hakushetumuka, 26hakuyila nindi, Muntu wukwinza kudami chakadi kuhela tata yindi, nimama yindi, niŋodindi, ni anyanindi, niana kwindi, niahelindi, eŋa, hela wumi windi yomweni, hakutwesha kwikala kambanji kamuku. 27Muntu wukubula kusenda kulusu yindi nakunlondami, hakutwesha kwikala kambanji kamuku. 28Mwinenwinyi wukwila neyi wukukeŋa kutuŋa itala deneni, wukubula kusambila kusnakama nakuchinda mali achidi kochu, atali neyi wukweti mali akudimanisha nachu? 29Wamba kela wukwala kwachikuku hohu, kumanisha nehi, antu ejima akutalaku hiyakutachika kumuseha, 30nawu, Iwu muntu wakuminini dakutachika kutuŋa hohu, kumanisha nehi. 31Hela mwantanyi wukwila neyi wukukeŋa kuya nakulwa njita namwanta mukwawu, wukubula kusambila kushakama nakutoŋojoka nindi, ami nidi namakombakaji ikumi hohu; nukutwesha kuya nakumonaŋana namwantowu wudi nakwinza namakombakaji makumi ayedi kwaamu, tahindi? 32Neyi hanatweshuku, wukunyakala kutemeshaŋahu dehi atuŋanda akwihula mwakuvu mbikilawu ikala, hohachidiyi mukwawu kwakulehi nankashi. 33Dichi nimwinenu wukubula kuleka yadiyi nayu yejima, hakutwesha kwikala kambanji kamuku.
34Muŋwa wawuwahi; neyi muŋwa wuneli dehi wasamuka, akutwesha kuwutoweja cheŋi nanka? 35Hiwukutelela nawa cheŋi hamaseki hela hezeleluku, akuwunata tuhu. Yowu wukweti matu akutiya atiyi.
Currently Selected:
Luka 14: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
