Luka 13
13
1Chena chilaakochu, antu amu amulejeli nsaŋu yawaŊaliliya abombashaniniyi Pilatu mashi awu hamu namashi ayimuna yawu yaketwiluwu. 2Yena hakuyakula nindi, Enu munatoŋojoki nenu awa aŊaliliya adiŋi akwanshidi abadika aŊaliliya ejima, nanochu chakabiluwu yumiyi tahindi? 3Nukuyileja nami, nehi; chiŋa mubalumuka munyichima yenu; neyi nehi, dichi mwamba kanoŋa ninenu nawa. 4Kela antu awa ikumi natanu nasatu aholokeleluwu kudi kaposhi kamuSilowami hikakuyijaha, enu munatoŋojoki nenu kuluwa kwawu kwabadikili kuluwa kwawantu ejima ashakama muYerusalema, tahindi? 5Nukuyileja nami, nehi; chiŋa mubalumuka munyichima yenu; neyi nehi, dichi mwamba kanoŋa ninenu nawa.
6Hakuyitila chishimu ichi nindi, Muntu wumu watumbili mutondu wachikuyu mwitempa dindi danyivinyu; hakwinza nakukeŋakeŋaku nyikabu, kuwana kwosi. 7Hakumwila mukwakuhemba nyivinyu nindi, Nyaka yejima yisatu iyi nenzaŋa nakukeŋakeŋaku nyikabu kumutondu iwu wachikuyu, kuyiwanaŋa nehi; wutemumu, indi wuvumbishaŋa tuhu kwawu heseki? 8Yena hakwakula nindi, Mwanta, wuleki mwaka wunu nichipachipuku, ninkuku wushi; 9neyi wukusoŋa chikuwaha, neyi kusoŋa nehi wakawutemi kweyi.
10Hasabata wadiŋi nakuleja antu mushikola yimu. 11Kutala mudi mumbanda wedikaŋa demoni wawufwayi wanyaka ikumi nayitanu nayisatu; wakuminaŋa dakubandaŋila hohu, kutwesha kubanduka hela chanti nehi. 12Yesu chanamumoniyi, hakumutambi ka nindi, Eyi mumbanda, wufwayi weyi wunakusubuki dehi. 13Hakumunaŋika makasindi, hohenohu oloka nikwoloka, hakumulemesha Nzambi. 14Nyuli yashikola hakutiya kutama nankashi nanochu chokiluwu muntu kudi Yesu hasabata; hakwila izaza dawantu nindi, Mafuku akukalakalaŋawu antu nyidimu yawu atanu nadimu, diwu mwadi kwinzaŋa nakuyuka, bayi hasabataku. 15Mwanta hakuyakula nindi, Enu anfwikiji! Komana enu himwasubulaŋa ŋombi yenu, hela chimbulu chenu mwitaŋa, mumutwala nakumunwisha meji hasabataku? 16Indi iwu mwana kaAbarahama wamumbanda, anakasuwu kudi Satana nyaka ikumi nayitanu nayisatu yejimiyi, chitami kumukasununa munyonji hasabata? 17Chanahoshiyi mazu awa, akwankunyi nindi atiya ninsonyi; izaza dawantu dejima hidikuzaŋalala nayuma yalema yeliliyi yejima.
18Dichi hakuhosha cheŋi nindi, Wanta waNzambi wunafwani neyi chumanyi? Nukuwufwikŋa nachumanyi? 19Wunafwani neyi kalubutu kamostadi katumbiliyi muntu mwitempa dindi; hikakukula, hikakwikala chiputa chacheni; atujila ahaluzwizu hiyakutuntama kunyitayi yachu.
20Hakwila cheŋi nindi, Wanta waNzambi nukuwufwikija nachumanyi?
21Wunafwani neyi iluŋi danonenuwu kudi mumbanda, hakusha mumabaŋu awuŋa asatu, wuŋa wejima wiŋila niiluŋi.
22Aholokela nimunjila yakuya kuYerusalema; hiyakuya nakuhitahita nimunyikala yamaneni, nimunyikala yanyanya, nakuleja antu ho-o. 23Mimtu wumu hakumwila nindi, Eyi Mwanta, antu akuhandishawu antesha hohu, tahindi? 24Yena hakuyila nindi, Kabilenu kwijila kuchisu chanyanya; nukuyileja nami amavulu amba kakeŋa kwijila mu, amba kakaŋanya. 25Chamba kela mwanta wetala nanyamuki dehi, nenzeli dehi chenzelu, enu mwakatachika kwimana kuchisu hanzi nakudondomwena, nakubidika nenu, Mwanta twenzulwiluku. Yena wakayakula nindi, Ami kwami kuyiluka nehi, hela kumwafuma. 26Himwakatachika kuhosha nenu, Twadiŋi nakudya nakunwa kumesu eyi, eyi nawa wadiŋi nakutuleja munyikala yetu. 27Yena wakayila nindi, Nukuyileja nami, ami kwami kuyiluka nehi, hela kumwafuma. Nfumenu, enu akwakuluwa ejima. 28Kwamba kekala kudila nikudisumona kumaji himwamba kamona Abarahama naIsaka naYakoba niatuprofwetu ejima muwanta waNzambi, hakwilenu anayumbili dehi hanzi. 29Antu akumusela niakumujika niakukabeta nakabeta, amba kenza nakushakama muwanta waNzambi. 30Tiyenu, akukuminina diwu akekala akusambila; akusambila diwu akekala akukuminina.
31AFwarisi amakwawu hiyakwinza nakumwila yena mpinji oyu nawu, Fumaku kunu, yaku kwacheŋi; muloŋa Herodi wudi nakukufunyina kukujaha. 32Hakuyila nindi, Yenu mwakamuleji mumbu ona nenu, Yena neli nindi Talenu, nukufumisha ademoni nikuuka nilelu nikumadiki, ifuku dakalondelamu didakamanishawu nsaŋu jami jonsu. 33Njila yami chiŋa niyenda lelu nikumadiki nikwifuku di kwawu, muloŋa kaprofwetu kumujahila kwacheŋi kutwesha nehi, chiŋa muYerusalema hohu. 34Eyi Yerusalema, Yerusalema! Wajahaŋa atuprofwetu, waasaŋa malola awa akutemeshelaŋawu! O mafuku kuvula inakeŋaŋa nami nikuŋwŋi anyaneyi mumpuula, neyi chakuŋwijaŋayi chaadi anyanindi mumpuula jindi yomweni, enu kwenu kwonti kwenu! 35Talenu, itala denu anayishiyilidu dineli dehi ihembi hohu. Nukuyileja nami, kunmona cheŋi chiŋa kwifuku dimwakela nenu, Kisu kisu iwu wukwinza mwijina daYehova.
Currently Selected:
Luka 13: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
