Luka 5

1Chelili izaza dawantu hidikudishinjekela hadi yena nawu atiyi mazu aNzambi, yena wadiŋi wemana kwijiva daGenesareta. 2Hakumona maatu ayedi anayikuŋiki kuchi kumu chejiya; yibindayanshi anafumumu dehi, adi nakukosa mawandawu. 3Hakwijila muwatu waShimona, hakumwila nindi swŋiaku kwakulehi chanti nachikumu. Hakushakama, hakuleja mazaza awantu mwenomu muwatu. 4Chanakumishiyi kuhosha, hakumwila Shimona nindi, Swŋienu kwakunama, mulalumuni mawandenu, mukwati inshi. 5Shimona hakumwakula nindi, Mwanta, tunakabakani wufuku wejima, kabakane-e, kukwata nehi, ilaŋa ichi chiwunahosheyi nukukumina dakulalumuna mawanda. 6Chaneluwu mwenimu, apompeshelelumu ilembu danshi dadeni; nimawandawu hiyakukeŋa kuketuka. 7Hiyakuyikobola akwawu ayibinda nawu adiŋi muwatu wukwawu, nawu enzi ayikwashuku. Hiyakwinza, hiyakwinzesha maatu ejima ayedi, hiyakutachika nikujiya. 8Shimona Petulu chanachimoniyi, hakudinata kumanuŋu aYesu nindi, Mwanta, afumi mwani kudami, muloŋa ami nimukwanshidi. 9Muloŋa niyena ninowu akwawu adiŋiyi nawu ahayamini anshi akwatiluwu kuvula; 10akwawu ayibinda nayena Shimona, wowu anyana kaZebedewu aYakoba naYowanu, ahayamini. Yesu hakumwila Shimona nindi, Bayi wutiyawomaku; kufumisha hanu wukwi kala chibinda chawantu. 11Chanashikijuwu maatu awu kuchi kumu, hiyakushiya yuma yejima hiyakumulonda.

12Chadiŋiyi mumukala weneni wumu, kutala iyala wumu wazemoka dehi namusoŋu wambumba; yenowu chanamumoniyi Yesu, hakudinata chamesu heseki, hakumulembelela nindi, Mwanta, neyi wuneteji, wukutwesha kuntookesha. 13Yesu hakwolola chikasa chindi, hakumukunka nindi, Neteji, tookaku. Hohenohu musoŋu windi wambumba wumufuma nikumufuma. 14Hakumukonkomwena naŋovu nindi, Bayi wulejamu muntuku; yaku wudimwekeshi kudi kapristu wuhani mushiŋa wayilejeluwu kudi Mosi, kulonda kuyishimwina nachu. 15Mpuhu yindi yisweja nikutiyakana; mazaza amaneni hiyakupompela kudi yena nakutiya nikuyuka yikatu yawu. 16Yena hakuwombolokela mwisaŋa nakulomba.

17Wena mafuku owu, ifuku dimu wadiŋi nakuleja antu; kwadiŋi kwashakama aFwarisi niankuluŋaŋa janshimbi, anafumi kunyikala yakuŊaliliya yejima, nikuYudeya, nikuYerusalema; Ŋovu yaYehova yakuuka yadiŋi hadi yena. 18Kutala amayala hiyakuleta mukwakalepa hakadidi, hiyakukeŋa nawu amwiŋiji amukamiki kumesu indi. 19Chanakaŋanyuwu kumona hawiŋijilu nansaŋu yezaza dadiŋuku, hiyakukandama hewulu detala, amuzelumuni mukachi kawu, chakumuhanwisha hamatiya, nichikaŋa chindi nikadidi kindi hamu, ashiki kumesu aYesu. 20Yesu chanamoniyi kukuhwelela kwawu hakwila nindi, Eyi iyala, anakwanakeni nyiloŋa yeyi. 21Ansoneki nawaFwarisi hiyakutachika kudihujola nawu, Yeniwu wudi nakutuka Nzambi hinyi? Natweshi kwanakena nyiloŋa yawantu hinyi? HiNzambi hohuku? 22Yesu welukili mwadiŋi nakudihujolawu, hakuyakula nindi, Mukudihujoleladi munyichima yenu? 23Chaswayi kumwila muntu nami, Anakwanakeni nyiloŋa yeyi, tahindi chaswayi kumwila nami, Hinaukaku, wendi? 24Nalondi mwiluki nenu Mwana kamuntu wukweti Ŋovu yakwanakena antu nyiloŋa hanu hamaseki; hakumwila mukwakalepa nindi, Nakwili nami hindukaku, wunyamuni kadidi keyi, wuyi kwitala deyi.

25Hohenohu yonyamuka nikunyamuka kumesu awu wejima wawu, hakunona niniyi yakaminiyi, hakuya nikwitala dindi nakuhameka Nzambi.

26Antu ejima hiyakuhayama, hiyakutiya woma nankashi nawu, Lelu tunamoni yuma yacheŋi.

27Kulondela hayumiyi, hakwidika hanzi, hakumona nsonkeshi wumu, ijina dindi Levi, nashakami kwakutambwila nyombu; hakumwila nindi, Nlondaŋa. 28Yena hakushiya yuma yejima, hakunyamuka, hakumulonda.

29Levi hakumutelekela chawija chenenimwitala dindi; himukwikala izaza dawansonkeshi deneni, niantu amakwawu ashakaminuwu nawu nakudya. 30AFwarisi nawansoneki jawu hiyakutobela atumbanji twindi nawu, Mwadiilaŋadi nakunwa nawansonkeshi niakwanshidi? 31Yesu hakuyakula nindi, Akola hiyakeŋakeŋaŋa chimbukuku, chiŋa akata. 32Hinenzi nakutambika aloŋaku, nenzi nakutambika akwanshidi abalumuki munyichima.

33Hiyakumwila nawu, Atumbanji twaYowanu asweja kujiŋojoka nanzala yakuleka kudya, nansaŋu yakulembelela; niatumbanji twawaFwarisi hamu; hakwila atumbanji tweyeyi, kwakudya hohu nakunwa. 34Yesu hakuyila nindi, Amayala adi nansumbuli akutwesha ŋahi kuleka kudya hachiduwu nansumbuli? 35Mafuku akenza akafumishawu nsumbuli kudi wena, dihu hakajiŋojokaŋawu nanzala yakuleka kudya. 36Hakuyitila chishimu nindi, Kwosi muntu wukutabula chitabu kuchikovwelu chachiha achisha kuchikovwelu chachikuluku. Neyi wukwila chochochu, wukutabula nichachiha nichachikulu, chitabu chikufuma kuchikovwelu chachiha hichikuya mumu nachachikuluku. 37Kwosi muntu wukuloŋa vinyu yayiha munjeki jayitembi yayikuluku. Neyi wukwila chochochu, vinyu yikubuza yitembi, nivinyu yayeni yikumwaŋala, niyitembi yikufwila kumu. 38Vinyu yayiha chiŋa ayiloŋa munjeki jayitembi yayiha. 39Kwosi muntu wukwila nanwi dehi vinyu yayikulu akeŋa yayihaku; nindi, Yayikulu diyi yayiwahi.

Currently Selected:

Luka 5: MW62

Highlight

Copy