Luka 7
7
1Chelili nakumishi dehi kuhosha yihosha yindi yejima kumatu awantu, hakuya muKaperinawu. 2Senturinu wumu wadiŋi nanduŋu yindi aswejeliyi kukeŋayi nankashi, wakatili hakukeŋa kufwa. 3Chanatiyiyi mpuhu yaYesu, hakumutemeshela awakulumpi jawaYudeya, kulonda enzi nakumuhandisha nduŋu yindi. 4Wena chanashikuwu kudi Yesu, hiyakumulembelela nankashi nawu, 5Himuntu watela kumwilila chumichi kudeyi; muloŋa wakeŋa a muza wetu, diyi nawa watutuŋilili shikola yetu. 6Yesu hakuya nawu. Chanashikiyi kwakwihi netala, owu senturinu hakutemeshaku amabwambu jindi akamwili nawu, Eyi Mwanta, bayi wudikabakeshaku, muloŋa ami hinimuntu wakutela kwiŋileyi mwitala damuku. 7Dichi chinabuli kwinza ami aweni kudeyi, nadimoni nami ami hinimuntu wakutela kwinza kudeyuku; dichi ahoshi mwani kwezu hohu, mukwenzi wami wukukola. 8Muloŋa ninami nawa nimuntu ni kweti anyanta jami, hela ami aweni ni kweti mashidika aŋovwahilaŋa. Nelaŋa iwu nami, Yaŋa; hakuya. Mukwawu nami, Inzaŋa; hakwinza. Nduŋu yami nami, Ilaku chumichi; hakuchila. 9Yesu chanatiyiyi yumiyi hakumuhayama, hakushetumuka, hakwila izaza dadiŋi nakumulondela nindi, Nayileji nami, kanda nimonaŋahu dehi kukuhwelela kwasweja chi kuma hanichuku, hela muIsarela mwamweni. 10Owu atemesheluwu, chanafuntuwu kwitala, hiyakuwana owu nduŋu nakoli dehi.
11Chihanalehi chanti, hakuya kumukala wumu ijina dawu Nena; wayili niatumbanji twindi, niizaza deneni. 12Chanashikiyi kwakwihi nachisu chamukala, kutala anatembeki mufu, himwana weyala wasemuka kanka windi, mama yindi wadiŋi nfwila nawa; hiyakumutwalaku kudi antu amavulu ahamukalowu. 13Mwanta chanamumoniyi, hakumutiyila wushona, hakumwila nindi, Bayi wudilaku. 14Hakuswila kwakwihi hakukunka kumutembu; atembekeli hiyakwimana ku-ka. Hakwila nindi, Eyi mukwenzi, nakwili nami hindukaku. 15Owu wafwili ashakama nikushakama, atachika nikuhosha; hakumwinkayi mama yindi. 16Woma wuyikwata niwejima wawu; hiyakumuhameka Nzambi nawu, Mukachi ketu munamwekani dehi kaprofwetu muneni. Cheŋi nawa nawu, Nzambi nenzi dehi nakutala antu indi. 17Mpuhu yindi yitiyakana nimwahita Yudeya yejima, nikumutamba wejimowu.
18Atumbanji twaYowanu hiyakumuleja Yowanu yuma yejimiyi. 19Yowanu hakutambika atumbanji twindi ayedi, hakuyitemesha kudi Mwanta amwihuli nawu, Eyi yeyi elaŋawu nawu wakenza, tahindi tutalili wacheŋi? 20Wenowu amayala chanashikuwu kudi Yesu, hiyakumwila nawu, Yowanu Mpapatishu natutemeshi nakukwihuleyi nindi, Yeyi elaŋawu nawu wakenza, tahindi tutalili wacheŋi? 21Yena mpinji oyu hakukolesha niantu amavulu adiŋi nanyisoŋu, niadiŋi nayipupu, niadiŋi nawademoni, hakutonesha niamputamesu amavulu. 22Yesu hakuyakula nindi, Yenu mwakamuleji Yowanu yuma yimunamoni niniyi yimunatiyi; amputamesu hiyakutona, akwakubalakata hiyakwenda chachiwahi, akwambumba hiyakutooka, ajika matu hiyakutiya, afu hiyakuyisaŋula, atuzweŋi hiyakuyishimwina nsaŋu yayiwahi. 23Muntu nabuli kumona mudami nsaŋu yakudimbwisha nakooleki.
24Chineli antemesha jaYowanu anayi dehi, hakutachika kuhosha namazaza awantu nsaŋu yaYowanu nindi, Mwayili nakutaladi mwisaŋa? Iteti datepokaŋa nampepela, tahindi? 25Mwayili nenu mwakamonidi? Muntu navwali mahina amawahi, tahindi? Avwalaŋa yawanta, aleŋana, wowu ekalaŋa muyipaŋu yawanyanta ankanu. 26Mwayili nenu mwakamonidi? Kaprofwetu, tahindi? Eŋa, nayileji nami hikaprofwetu wabadika nankashi atuprofwetu ejima. 27Diyi yeniwu asonekeluwu nawu, Tiya, nukutemesha ntemesha yami kuwukuya, akaloŋeshaŋahu dehi njila yeyi kumbidi kuwakaya.
28Tiyenu niyileji, anavwaliki kudi ambanda, hosi niwumu wamubadika Yowanuku; ilaŋa muntu nakehi muwanta waNzambi namubadiki yena.
29Chanachitiyuwu, antu ejima niansonkeshi apapatishawu dehi nachipapatishu chaYowanu, hiyakumwiteja Nzambi nawu waloŋa. 30Hakwila aFwarisi nawakwanshimbi, chalekeluwu kuyipapatisha kudi Yowanu, alekeli mpùŋa yayifuukwililuwu kudi Nzambi.
31Yena nindi, Awa antu achisakichi nukuyifwikija neyi anyi? Anafwani neyi anyi? 32Anafwani neyi atwansi ashakama kuwulandilu akuditambeka nawu, Tunayimbili mahululu, enu kuhaŋana nehi; tunatumpi, enu kudila nehi. 33Muloŋa Yowanu Mpapatishu nenzi chakadi kudya mankendi, hela kunwa vinyu, enu nenu wukweti demoni. 34Mwana kamuntu nenzi nakudya nakunwa, enu nenu. Talenu, muntu wafwa hakudya, wanwaŋa vinyu, ibwambu dawansonkeshi nawakwanshidi. 35Dichi maana ayiyiŋishaŋa kudi anyanawu ejima.
36KaFwarisi wumu wakeŋa eli Yesu adiyi nindi. Yesu hakwijila mwitala danowu kaFwarisi, hakushakama nakudya. 37Kumukalowu kwadiŋi mumbanda mukwanshidi, chelukiliyi nindi Yesu nashakami nakudya mwitala dakaFwarisi, hakuleta malasha amuchipunda chelola dalubanji. 38Hakwimana nakudila kunyendu yaYesu kunyima, hakutachika kuzowesha kunyendu yaYesu namadilu indi, hakuyikombola nansuki jakunamutu windi, hakupwepujola kunyendu yindi, hakuyiwayisha wenowu malasha. 39Chanachimoniyi owu kaFwarisi wamutambi kili, hakuhosha mumuchima windi nindi, Iwu neyi hikaprofwetu, mutenowu neluki chadiyi iwu mumbanda mukwanshidi namukunki. 40Yesu hakumwakula nindi, Eyi Shimona, nidi nakadizu kakuhosha neyi. Yena nindi, Hoshaŋa Nkulupaŋa. 41Nindi, Kwadiŋi akwanyikudi ayedi adiili yambala yamukwakusondamisha wumu; iwu wadiili mukudi wamakulakaji amali atanu, mukwawu wamakumi atanu. 42Mwayedi wawu chanakaŋanyuwu jakufuta, hakuyanakena tuhu kwindi. Wukubadika kumukeŋa nankashi wumwodihi? 43Shimona hakumwakula nindi Natoŋojoki nami owu aanakeneniyi yayivulu. Yesu hakumwila nindi, Wunahoshi mwalala. 44Hakushetumukila kwadiŋi owu mumbanda, hakumwila Shimona nindi, Wunamoni iwu mumbanda? Ami nepili mwitala deyi, eyi kunyinka meji akunwelesha kunyendu yami nehi, hakwila iwu mumbanda nazoweshi kunyendu yami namadilu indi, nayikomboli nansuki jindi. 45Eyi kumpwepula nehi, hakwila iwu mumbanda, kufumisha hineŋila hanaleki kupwepujola kunyendu yamuku. 46Eyi kunwayisha manji kunamutu wami nehi, hakwila iwu mumbanda nawayishi nyendu yami malasha. 47Dichi nukukuleja nami nyiloŋa yindi yayivulu anamwanakeniyi; dihu hanafumi kunkeŋa nankashi. Hakwila muntu aanakenuwu nyiloŋa yantesha, wukunkeŋa nawa chantesha. 48Hakumwila owu mumbanda nindi, Nyiloŋa yeyi anakwanakeniyi. 49Antu ashakamini nakudya, hiyakutachika kuhosha munyichima yawu nawu, Iwu muntu wukwanakena antu nyiloŋa, diyinyi? 50Yena hakumwila owu mumbanda nindi, Kukuhwelela kweyi kunakuhandishi dehi; yaloŋa nakuwunda.
Currently Selected:
Luka 7: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
