Shitatiko 14
14
Abulama ukulamwina Lote
1Ha matena ayo, Amalafwele mwene waku Mbambiloniya na Aliyoki waku Elasha na Kendolawoma mwene waku Elamu na Tindale mwene waku Ngoyima, 2Bayile ku nzita mu kulwisha bamyene mutanu, Mbela mwene waku Shondoma na Mbisha mwene waku Ngomola na Shinambi mwene waku Andima na Shememba mwene waku Zemboyima na mwene waku Mbela, (lwatumbiwile kami ngayi Zowa) 3Aba bamyene mutanu bafungilile bakanzita babo hamo mu tungulungwa twa Shindimi na (lwatumbiwile kami ngayi Liwate lya Mushele). 4Batendelelenga milimo Kendolawoma ha myaka likumi na yibili, ngoboni ha mwaka wa likumi na yihatu bamufutulukilile. 5Mu mwaka wa likumi na yinaa, Kendolawoma na bamyene bezile na bakanzita babo, pe bakomene Balefwayima mu Ashiteloti Kiliyatayimu na Bazuzima mu Hamu na Baemima mu mbuwa ya Kiliyatayimu, 6Bakomene na Baholi mu mapili a Sheya, babatandile kukuma naku Elipalani na kunkumo ya libelelengwa. 7Niho babokele na kukuma ku Kandeshi (lyatumbiwile kami ngayi Eni Mishipati). Pe bakomene litunga nimwalyo lya Baamaleki hamo na Baamoli aba bazikilenga mu Hazazoni Tamale.
8Niho bamyene ba ku Shondoma na Ngomola na Andima na Zemboyima na Mbela bakwatile bakanzita babo na kulwila mu mukulo wa Shindimi, (lwatumbiwile kami ngayi Zowa) 9balwishile bamyene ba Elamu na Ngoyima na Amulafwele waku Shimina na Aliyoki mwene waku Elasha. Bamyene mutanu balwishile bamyene banaa. 10Mu mukulo wa Shindimi mwekalile mateke a lingongwe, pe oho bamyene ba ku Shondoma na Ngomola bezekele kutina ngayi bafume ku nzita na bamo bawilililemo. Ngoboni bamina batininine ku mapili. 11Niho baya bamyene banaa bapukwile byuma nimwabyo mu Shondoma na Ngomola, hamo na byakulya, pe bayile. 12Bapukwilile kumo na Lote mwipa Abulama ou wazikilenga mu Shondoma na wuheti wendi nimwawo.
13Muntu wamina ou washilile wezile kuli Abulama ou wengile Kahebelu, wamutongwezele nimwabyo byatendiwile. Abulama wazikilenga hahepi na mitondo ya kutulila ya Oka yaku Mamele wa Kaamoli. Bakonzo ba Eshikolu na Anela, aba bengile shikonzi na bakanzita ya Abulama. 14Oho Abulama ayuvwile ngayi mwipa wendi wakwatiwakale, wehanine hamo bakakulwa 318 ha ntanda yendi, pe bakonkele obo bamyene banaa kukakuma naku Ndani. 15Oho akumine kuyo Abulama watapulwile bantu bendi mu matanga, babashintikizile wushiku, pe babakomene. Babatandile kuka bakumisha naku Homba naku ncelele ya Ndamashika. 16Pe wabweshele wuheti nimwawo uya bapukwile, wabweshele kami na Lote mwipa wendi, hamo na bambuyama na bantapwa bamina.
Mekeluzindeki ukutandalisha Abulama
17Abulama oho abokelenga kufuma mu kukona Kendolawoma na bamyene bamina ekalile nabo na mwene wa Shondoma wayile mu kumushimbawila ku mukulo wa Shave (Uya watumbiwile kami ngayi Mukulo wa Mwene). 18#Bah 7:1-10. Melukizendeki mwene waku Shalema na mukankombela wa Nyambi Wakukangana, waletele mankende na waine kuli Abulama. 19Watandalishile Abulama ngayi,
“Nyambi Wakukangana,
ou walengele liyilu na hanci,
mwanga afuywele Abulama.
20Nyambi Wakukangana mwanga ayemeziwe,
ou wakupanikile ngovu za kukoma bamalamo bobe.”
Niho Abulama apanikile Mekeluzindeki sha wulikumi sha lipuku lya byuma apukwile. 21Niho mwene waku Shondoma ambile kuli Abulama ngayi, “Tenteka lipuku nimwalyo, ngoboni mbweshele tuhu bantu bami.”
22Abulama wamukumbwile ngayi, “Nikulibeza kuli Nyambi ya Ngula, Wakukangana, walengele liyilu na hanci 23ngayi nifwako kukashimba ku byuma byobe hingebene kawutonge, hinge kamushulo kakuncangwa. Kutina ukamba ngayi, ‘Ami naheteshele Abulama.’ 24Nifwako kukatola shuma shimo. Nikatambula tuhu biya banali bantu bami. Ngoboni shinafwanini kutapila baya nayile nabo, Anela na Eshikolu na Mamele, bashimbeko shitapilo shabo.”
Currently Selected:
Shitatiko 14: LLK
Highlight
Share
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
