Shitatiko 15
15
Kulimama kwa Nyambi na Abulama
1Kunyima yanebye lizu lya Nyambi ya Ngula lyezile kuli Abulama mushimonekesho ngayi, “Abulama hinga wutina. Ami nengi likebo lyobe na ncuungu yobe yikenga yayinene.”
2Ngoboni Abulama wambile ngayi, “Obe mwene Nyambi ya Ngula, ami bana nifwabo, pe ncuungu yobe yika nyavwa bishini? Ncwana yami ndele Eliyeza waku Ndamashika. 3Shilolo umpane bana, nohobene umo ku bandungo bami ukakona wuheti wami.” 4Nyambi ya Ngula niho ambile ngayi, “Ou ndungo yobe Eliyeza kukakona wuheti wobe wufwako, mwanobe wakulibelekela niye ukenga ncwana.” 5#Lom 4:18; Bah 11:12. Nyambi ya Ngula wamututwishile ha munkanda na kumutongweza ngayi, “Tilamina kuyilu, ezeka kulaba nyenye, ndi ukutwesha kuzilaba. Pe bazukulyobe bakenga babengi ngonehe eze nyenye.”
6 #
Lom 4:3; Nga 3:6; Yako 2:23. Abulama wakulupilile Nyambi ya Ngula, pe ndaba ya kukulupila Nyambi ya Ngula wamutambwile kwinga wakulunga.
7Nyambi ya Ngula niho ambile kukwendi ngayi, “Ami Nyambi ya Ngula, ou wakufumishile ku Ule mu Mbambiloni ngayi mwanga nikupane litunga lino linge likona lyobe.”
8Ngoboni Abulama wambile ngayi, “Obe Mwene Nyambi ya Ngula, nikalimuka nahiti ngayi likenga lyami?”
9Nyambi ya Ngula wambile ngayi, “Ndetele namani wa shitole wa myaka yihatu na mpongo wa myaka yihatu na shikungwe wa mbelele wa myaka yihatu na litela na mwana nkilimba.” 10Niho Abulama aletele ebye bimuna nimwabyo kuli Nyambi na kubiketola hakati, pe wayakile bimamo mu kuliyahikiza shimo na shamina mu mihoko yibili, ngoboni kaliha waketwile tuyoni. 11Makubi oho ezile mu kutulila hanebye bimamo, Abulama wawatukishileho.
12 #
Yobo 4:13-14. Oho mutena wayilenga mu kulela, Abulama wekalile mutulo twa ngonzi, kami bowa na mutentu byezile hahendi. 13#Kut 1:1-14; Mil 7:6. Nyambi ya Ngula wambile kuli Abulama ngayi, “Bazukulyobe bakenga bayeni mu litunga lya bashenge, bakenga bandungo kuyo kami bakayandishiwa mu myaka 400. 14#Kut 12:40-41; Mil 7:7. Ngoboni ni ka shushula litunga liya bakatendela milimo, ku nyima ya nebye bakafuma mu litunga liyo baka shimbamo na wuheti wawingi. 15Ngoboni obe ukayoya shikati shashitali, pe ukafwa mu ku mwena. Ukafundiwa hinga wakembala shikuma. 16Mu mukoka wawunaa bazukulyobe bakaboka kuno, ndaba kukatanda nifwako Baamoli hantu banabipishi shikuma ngayi bashushuliwe.”
17Oho mutena walelakale, kami kwengakale mincimpwe, hohobene kwamonekele nyungu ya mundilo hamo na mumuni wakungelema, pe byapitile mukati ka bimamo bya tuya tuyamana. 18#Mil 7:5. Ha mutena uyo Nyambi ya Ngula walimamine na Abulama ngayi, “Nikukulupisha ngayi nikupana litunga elye nimwalyo ku bazukulyobe, kubalikila ku nginza ya Engepita kutwala naku Mushinzi wawunene wa Yufuleti, 19litunga lya Bakenaani na Bakenezi na Bakandimonati, 20na Bahita na Bapelizi na Balefwayima, 21na Baamoli na Bakenaani na Bangilingashi na Bayembushi.”
Currently Selected:
Shitatiko 15: LLK
Highlight
Share
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
