MAWUTO HA WASU 6
6
1Kyasia walya wa kiloshyonyi mfoe fowo wekihenda ifo mnu kukaamka-ho mununuwo fo Wagriki fonunuwya Waebri kipfa waka wawo walya wapfie mii walewa mohadimo ipfo kipfuṟukanyonyi kya orio mfiri. 2Nalyo walya ikumi na wawi wakalaha mkambo fulya fo wa kiloshyonyi handu hamu wakahamba, “Chi kichihiṟye so lude ihamba idedo lya Ruwa na ihenda iringa shidembo sha kandopfo. 3Nkyo kimaduma le wanawawama, kekusambuṟyenyi ipfo kiidi kyanu sa wawode kiṟumi kicha waichuṟe Mumuyo Mwele wai na waṟango kundu luwadambikye kiṟundyo ki. 4Natso lukae-ho lochiringa shiterewo na ipfuṟukanya idedo lilya.” 5Kyasia kidedo ki kikachihia mkambo fulya fose, wakasambuṟa Stefano nyio mwidiki msanze menyi Mumuyo Mwele, na Filipo na Pirokoro na Nyikanori na Timon na Parmena na Nyikolao ahalukye kiyuda o kulya Antiokia. 6Wakawahoṟotsa oshangunyi lo wasu. Nawo wakawaterewya wakawahekya mawoko. 7Nahong'u idedo lya Ruwa likadung'ana, mtalie fo wa kiloshyonyi fukapfumbuka mnu kulya Yerusalemu, na wakohanyi wafoi wakahaluka wechiidikya.
Stefano awado
8Stefano kaichuṟo wutonga na pfinya ya Ruwa kawa mowuta ṟiho na shichano shing'anyi ipfo wandunyi. 9Kya indi waata wa kisomyo kelaho nyi kya Malibertino na kya Wakirene na kya Waalekisanderia na kya walya wa Kilikia na Asia wakakure wakawesana na Stefano kya kirekyano. 10Nawo walaidime iwingana na wuṟango woke ma na Mumuyo ulya awodo nyio echideda. 11Wakatana wahenda itewa wandu wache ihamba, “Loicho mndu chu kechideda madedo heruma Mose kemsanza na Ruwa.” 12Wakaamtsa wandu na wameku na walaanyi wa shitapu wakahenda imwaala wakambada wakamduo kulya njamenyi ing'anyi. 13Wakahoṟotsa-ho wangochi wehamba sha wongo wahambe, “Mndu chu ekeda aladeda madedo hesutsa hando ha haele na njowawasopfo. 14Cha kipfa lulemwicho kehamba ke Yesu cho Mnasareti nyi echinyamaṟa hando ha na ilacha shido shadu lui wainenge nyi Mose.” 15Na walya wadamye ipfo njamenyi ing'nyi wakamwambuya wose wakawona oshangu loke lui cha lo malaika.
Muongoye fo Stefano
Currently Selected:
MAWUTO HA WASU 6: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
