MAWUTO HA WASU 7
7
1Kyasia Mkohanyi ulya ang'anyi kahamba, “A ngesa na wudo kii?” 2 Stefano kahamba, “Wanawawama wako na wawandie wako, kenjiadanyenyi! Ruwa chu menyi wuitoṟi alewonekya mku chu odu Abrahamu lyamandi ei kulya Mesopotamia alamehenda kulya Haranyi. 3Kambia, ‘Kure kunu orukenyi lopfo na kowashari wapfo uhende isamya isangenyi kundo njechikuloṟa.’ 4 Nalyong'u kasama kulya orukenyi lo Wakalidayo kacha ikaa Haranyi, kakure-pfo numa ndee amepfa, Ruwa kamsamiṟa-pfo kamsamiṟya sanga li mu-lee-ho nyo wulalu. 5 Nao alemnenga-ho kyedeya mndu kyoṟa ma hando ha ochayo lumupfo na kamteṟya ke nyi echimneenga luwe lo wuchili woke na oshari loke lo numa nao lawewode mana mandi hopfo. 6 Ruwa kahamba, ‘Adi ke oshari loke nyi wechisamia orukenyi lo wandu wengi, nawo nyi wechiwatana masinga hawo na iwawutya shiwicho hando ha maka mahanna haana. 7 Na mkambo fulya fo wandu wechiwatana masinga, inyi njechifuanduya, nyio Ruwa ahambye ado. Kikamewa ikyo wawukeng'u-pfo, nawo wache injipfuṟukanya hando ha.’ 8 Kamnenga mkundana fo odino, Kikamewa ikyo Abrahamu kafee Isaki kamdina mkonu fo nyanya. Isaki kafee Yakobo kawemdina. Yakobo kafee waku walya wadu, walya ikumi na wawi kawewawutia ado.” 9 “Waku walya wadu wakanyenyia Yosefu wakamkumba wuhuru nadao Misiri. Ruwa kamkayapfo, 10 kambuta mawukiwenyi hake hose kamkundishya Farao ulya mangi ya Misiri kechimsumba wuṟango. Nao kambika mokalya Misiri yose na mba yake yose. 11 Kyasia kukacha njaa orukenyi lo Misiri lose na Kanaanyi na mawukiwa hang'anyi mnu, nawo waku walawone kindo kelya. 12Kukashika Yakobo kekiicho ke Misiri kwipfo Ngano kaduma-pfo waku walya wadu kyaṟo kya kuwoka. 13 Na kyaṟo kya kawi Yosefu kakumanyisha ko wanawamae kukawemanyikya na Farao kiparika kya Yosefu. 14 Yosefu kaduma ke ndee o Yakobo nahende endo hamu na kishari kyose washikye wandu makumi mfungade na watanu. 15 Yakobo kasoka na Misiri wakapfia-pfo wo na waku walya wadu. 16 Wakadao wakashitso Shekemu wakaṟiko kulya kipfunyi kilya Abrahamu ehuṟa na fesa yake ko wana wa Emori kulya Shekemu.”
17 “Kyasia kiheri kilya Ruwa eteṟyana na Abrahamu kekishika itikiria kufui wandu walya wakapfumbuka na yengeṟeka mnu kulya Misiri. 18Itane kokure-pfo mangi ingi sa alaweichi kya Yosefu. 19 Mangi chu kawutya waku wadu sha mtambo na iwatanya shiwicho kechiwawawasa ke wawihitse shiwana shawo shitutu kundu shilakae na moo. 20 Kiheri kyo Mose kafeo nao nyi awekundo nyi Ruwa kalelo na iringo hando ha meri iṟaṟu kanyi ko ndee. 21 Kekiwihitso mana o Farao o waka kamwira kamduo kamlela nawe cha mana oke. 22Mose kalosho wuṟango wo Misiri wose kawa mbahanyi o madedo na mawuto.”
23 “Mose kekimaa maka makumi haana kaitiko nyi ngoo yake kehenda yambuya wanawamae wandu wa Israeli. 24Kawona umu aweituṟo kamkaya kamtaya kirache kawaha Misiri ulya. 25Nyi alekusaṟa ke lako wanawamae nyi wechimanya ke Ruwa nyi awainengye okiio kui owoko loke, kya indi walemanyapfo. 26Ili lya ngama kawache-se kakoya wawi wechiloyana kakunda iwasansa na iwika-ho ofoṟo kewawia, ‘Lanye womi mui wana wa mka, nyi kiili muiwutiana kilasumhanyi?’ 27Kya indi ulya moafinyia odoe kamkumbalya mbai kambia, ‘Nyi o wu akuwikye nowe mwitoṟi moluchilia so? 28Alae nyi ukundi injiwaha chando ule-waha Mmisiri ulya wukowu?’ 29 Mose kadicha kitewe nyi idedo li kakaa ai msami orukenyi lo Wamadiamu kafee-pfo wana wawi.”
30 “Koikisia maka makumi haana malaika o Mndumii kambonekya kulya nuka ya Sinai ai olewonyi lo modo ipfo kingeṟenyi. 31Mose kekimbona kaṟihyo kiwonesyo kilya nao kechitikiṟia afui ke nambuye kukaichyo ṟu lya Mndumii lyehamba. 32‘Inyi nyi njii Ruwa o waku wapfo, njii Ruwa o Abrahamu na o Isaki na o Yakobo.’ Mose kadedema nalakarye yambuya-ho. 33Mndumii kambia, ‘Wuta shadu sho shapfo cha kipfa iya hando uhoṟoki-ho nyi hando haele. 34Nyi ngamewona kituro kya wandu wako kulya Misiri, ngaweicho na msumukyo fowo ngasoka njiche njiwawuteho. Na wulalu kendeng'u, njikuduma nohende kulya Misiri.’ 35 Nyio Mose cho walewoka imleha wehamba ke o ku akuwikye nowe mwitoṟi moluchilia, nyiong'u aledumo nyi Ruwa nawe mwitoṟi moletsa wandu kui owoko lo malaika ulya alembonekya alya kingeṟenyi kilya. 36 Icho nyiong'u alewawuta kechitana ṟiho na shichano kulya orukenyi lo Misiri na kulya ipalyipalyinyi lya malale na kulya nuka hando ha maka makumi haana. 37 Mose cho nyio alewia wandu wa Israeli, ‘Ruwa echimwamtsya mwikimbi cha inyi ipfo kiidi kya wanawamanu.’ 38 O nyio awerianyi na malaika ulya ipfo siṟinyi ya kulya nuka ulya ededa nao kulya fumvu-hu lya Sinai na waku walya wadu. Nyio aleambya madedo hawode moo naluinenge so.”
39“Mndu chu waku wadu walekunda imwidikyapfo, kya indi nyi walemkunahya mbai wakawuya idosa macha ha Misiri ipfo ngoonyi tsawo. 40 Wakawia Aron, ‘Lutsanye ma-ruwa helusongoya, cha kipfa Mose cho aleluwuta kulya Misiri lulaichi kindo kimtowokepfo.’ 41 Mafiri halya wakatsana mfano fo ihache wakafuendye shidaso wakachihio nyi kilya wakiwikye na mawoko hawo wawenyi.” 42 Kyasia Ruwa kahamba, “Samanya kawada wapfurukanye matorito ha nginehu chando kii kiṟehye kitapunyi kya waikimbi, ‘Alae mulenjikoṟya inyi shemaya modonyi na njodambiko maka iya makumi haana kulya nuka lanye wasoṟo wa Israeli! 43Ote, nyi hema lya Moloki muleliira-se na nyenyeri ya Ruwa lyanu Romfa; ntso njofano muletsana muwenyi kundu mutsioloke wanda. Na inyi njechimusamiṟa muhende kuleshe mutano moshika Babilon.’ 44 Shiheri shilya waku wadu wawei kulya nuka nyi wawewode hema lilya lya kiṟingishyo liwei chando ulya ededa na Mose awawasye ke wasungusie likeri cha ofano lulya aleluwona. 45 Nalyo nyilyo waku wadu walya wawei na Yosua waleliambya wakaliitsa na ipfo sangenyi lya mkambo ya wandu Ruwa alewafuna wechidicha oshangu lo waku wadu. Na wudo liwekaa shika mafiṟi ha Dawidi. 46 Nao akundikye Ruwa katerewa momu fowonya Ruwa o Yakobo handu hekaa.”
47 Kya indi nyio Solomon aleshika imbikya mba, 48“Kya indi ichu ai huya shose ekekaa mba tsii njiwike na mawokopfo chando mwikimbi ahambye. 49 Ruwehu nyi oloṟika loko lo wuitoṟi na wanda ii nyi hando hako hehekya madende hako. Mndumii ahambye, ‘Nyi mba njiki mochinjiwikya? Nyi handu haki inyi njechiidima yonyonya-ho? 50Chi owoko loko luwikye isho shose?’ 51 Nyo nyi mui mudi na okuchu mulunganyi ilehya Mumuyo Mwele mulai wadine ngoo manya madu; chandu waku wanu wawewutye nanyo na wudo da. 52Nyi ku kuwei mwikimbi waku wanu wakada walamterengya. Ee lae na iwaha wakawewaha walya weesongwo ihamba mbonyi tsa macheenyi ha ichu mhorotsu, ichu nyo mlewa wulalu watwaṟi wake na wawahi. 53Njowawaso nyi muletsiambya kui kitutumyo kya wamalaika manya mulatsiwade.”
Stefano awooho
54Kyasia wekiicho madedo halya wakahya ipfo ngoonyi wakamwimadya maheho. 55Nao Stefano aichuo Mumuyo Mwele kaambuya kulya ruwehu kawona wuitoṟi wo Ruwa na Yesu ahoṟoki kuwoko ko kulyo ko Ruwa. 56Kahamba, “Ambuya, njiwonyi kulya ruwehu kuṟuhukye na Mana ulya o mndu ahoṟoki ipfo ora lo kulyo lo Ruwa.” 57Nawo wakasambahada mnu na ṟu ling'anyi wakapfinyika na madu hawo wakamrundukya wose wai na mhio fumu. 58Wakamkunahya nja ya mṟi wakambaha wemkumbya maho. Na wangochi walya wakaleṟya nguo tsawo tsa huye alya madendenyi ha msoṟo o rika lya wandu awekeri-ho elaho rina lyake nyi Saulo. 59Wakakumbya Stefano maho nao katerewa kahamba, “Hoi Mndumii Yesu, ambya mumuyo foko!” 60Kapfiria ndi kalaha na ṟu ling'anyi kahamba “Hoi Mndumii! Ma kulawapfungiṟye-wo wunyamaṟi wu!” Kekihamba ado donyi kadonyikya madonyi kapfa.
Currently Selected:
MAWUTO HA WASU 7: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
