MAWUTO HA WASU 8
8
1Nao Saulo awei umu o walya walemdumbuya kyake ke nawoho. Mfiri fulya kukaamka kiterengyo king'anyi keterengya siṟi kulya Yerusalemu. Wose wakarahanyikya kulya shihongonyi sha Yudaya na Samaria. Wandu wedeo Yerusalemu na wasu.
Siṟi yaliso wukiwa
2Indi wandu weowuo Ruwa wakaira mnying'a fo Stefano wakahenda imṟika necha wakamkapya kilio king'any. 3 Saulo kawutya siṟi shifoi sheinyamara kechiida mba kui mba na ikuruo-pfo womi na waka na ihenda iwashingya mba ya wapfungo.
Ndumi ya sia kulya Samaria
4Na walya walerahanyikya ipfo na ipfo wakahenda wechiongwo idedo lilya. 5Kyasia na Filipo kasoka kashika kulya mṟinyi fulya fo Samaria kawaongoya kya Kristo. 6Wandu walya mamwingi wakakuwada mnu na shilya shileongoyo nyi Filipo wechiadanya na mrima msanze ili wawona na ṟiho tsilya tsechiwuto nyio. 7Kyamba wandu wafoi wawewodo nyi mṟufu mbicho walehenda iletso ikawuka-ho yechifihiṟa mnu, na wahuli wafoi na wawetiliwanyi shiwungo wakahenda ichiṟo. 8Kulya mṟinyi fulya kukakaa-pfo sia ing'anyi mnu. 9Kukawekaa-pfo mndu ipfo mṟiny ewio rina lyake nyi Simon, awode wuhanga, nyi aweṟihishye mnu wandu wa oshari lo Wasamaria kechihamba ke nyio ai mnene. 10Nao nyio aleadanyio nyi wose wokia mtutu itane ang'anyi wechihamba, “Simon nyi awode wuidimi wo Ruwa wulya wung'anyi.” 11Na kitewe wamwadanye wado nyi kipfa nyi kiheri sa kileshe awemeṟihisha wandu na wuhanga woke. 12Nahong'u wekiidikya Filipo kechiongwo ndumi ya sia ya wumangi wo Ruwa kui rina lya Yesu Kristo wakahenda ikupatisyo-ho womi na waka. 13Nao Simon amonyi aleidikya kapatiso kakuwada na Filipo kaṟihisho mnu awona shichano na riho tsilya tsing'anyi tsiweiwutika. 14Na wasu walya wei kulya Yerusalemu wekiicho ke Samaria yameidikya na yambya ideṟdo lya Ruwa wakawadumya Petro na Yohane. 15Wakasokya napfo wakawaterewya waambye Mumuyo Mwele. 16Cha kipfa alawemewasoke ma umu owo shile nyi walepatisyo rina lya Mndumii Yesu. 17Oweṟe nalo ili walewahekya mawoko nawo wakaambya Mumuyo Mwele. 18Na Simon kekiwona ke wandu nyi wainengo Mumuyo Mwele kui ihekyo mawoko ha wasu kawaendie fesa. 19Kahamba, “Njinengenyiwo na inyi pfinya yo kundu orio mndu ngamhekya mawoko naambye Mumuyo Mwele.” 20Petro kambia, “Fesa yapfo ihende ideka kimu na iyo ilindi ohia ke kisumbo kya Ruwa kechihuṟo na masaa. 21Uwode ohawi ma kiteeno kya kindo kipfo cha kipfa ngoo yapfo iwode wuhoṟotsu oshangunyi lo Ruwapfo. 22Kyasia wikang'u matumatu kya owicho lu lopfo noterewe Mndumii-Ruwa, kundu kokoya kechiwa noloheṟo kya makusaṟo ha ha ngoo yapfo. 23Cha kipfa njikuwonyi nyi uichuo mawawyo cha nduu uweimfunge sha mkika cha mhanda fo ngu.” 24Simon kahalwo kahamba, “Kenjiterewenyi nyo ko Mndumii-kundu isho ohamba shilanjihoye ma kimu.” 25Nawo wekimaa iṟingishya na yongwo idedo lya Mndumii wakawuya na Yerusalemu wechiongwo ndumi ya sia ya okio shihongonyi sha ko Wasamaria sa shifoi.
Filipo apatisa msoṟo o Uhabeshi
26Kyasia malaika o Mndumii kacha ideda na Filipo kambia, “Kureho nohende kulya-kya ora lo kosoko kulya mkuwalenyi fusoke fuwuka Yerusalemu fukahenda soka na kulya Gaza, nyi kundo kuwode olele.” 27Nao kakure-pfo kakuhendya napfo Naho adi a ulya mndu Mhabeshi ai mnzenge mheki o mangi iya mka Kandake o kulya Habeshi ai na mnjama oke awemdambikye kisa kyake kyose nakikalye. Nao awecheye kulya Yerusalemu iterewa-pfo. 28Nao nyi iwuyang'u ai adamye igarinyi lyake kechisoma kitapu kya mwikimbi Yesaya. 29Kyasia Mumuyo kawia Filipo, “Tikiria hafui na igari li nohendesane nalyo.” 30Filipo kechisembelya naho kaicho kesoma kitapu kya mwikimbi Yesaya kambia, “Alae kyawekutambalahalukya ikyo uisoma?” 31Nao kahamba, “A njiidime njida kulawode mndu echinloṟa njia?” Katerewa Filipo nadoye kulya igarinyi nadamye-pfo kimu nao. 32 Na kifunjo kya mṟeho awei ikisoma nyikyo iki, “Nyi aledao kishinjyonyi cha ichondi lilechifuha oshangunyi lo molioda, nyi wudo nao ma nalatambaṟuo dumbu lyake. 33Ipfo kundo awekunyiṟye adi mondu foke fukaangatso. Nyi o wu echitichya kipaṟika kyake? Cha kipfa moo foke nyi fui mwire fulakae kunu shi.” 34Mnzenge ulya kahalwo kawia Filipo, “Ngakuterewa njiwia, mwikimbi chu adeda madedo ha nyi kya wu ahamba; nyi mbonyi tsake o amony ang'u nyi kya mndu ungi?” 35Nalyo Filipo katambaṟuo dumbu lyake kawoka alya kyasyonyi kya mṟeho fu kamwongoya ndumi ya sia ya Yesu. 36Kyasia wechihenda wadi ipfo njienyi wakashika ikoya kundo ko mṟingenyi. Mnzenge ulya kahamba, “Ambuya aifu mṟinga, nyi kiki kyechinjiima njilapatso?” [ 37Filipo kahamba “Kombona amekuidikya kui mrima fopfo fose na kwipfo momu.” Nao kahalwo. “Ngaidikya Mana o Ruwa ke nyio Yesu Kristo.”] 38Kawawasa igari litirimisho. Wakasokya kulya mṟingeny wo wa wawi o Filipo na Mnzenge ulya, kahenda impatisa. 39Kikasia wekiwuka kulya mṟingenyi malaika o Mndumii kaira-ho Filipo kemmeṟutsa msenge ulya nalakimbone-se, kawada njia tsake a mchihie. 40Filipo kawono kulya Azoto, nao kawa moidaida ipfo keongwo ndumi ya sia ya okiio mṟinyi yose katana ashika Kaisaria.
Currently Selected:
MAWUTO HA WASU 8: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
