IWUKA 13

Iheṟemtsa wana wawee

1Mndumii-Ruwa kadeda na Mose, kambia, 2 “Njiheṟemtsia inyi wana wawee wose wa kisoṟo, orio mopfunguo wusu kiidi kya wana wa Waisraeli, o mndu o wandu na o shuma; nyi shako.”

Mfuho fo mkate ilanjitarang'ashe

3Mose kawia wanduwo, “Kumbuonyi mkonu fu, mulewuka orukenyi lo Misri; kuwuka mmbenyi ya wusinga; cha kipfa Mndumii-Ruwa, nalemuwuta handu ho kui pfinya ya owoko loke; ma kulalyio mkate fumtarang'ashe. 4Nyo muikure inu kiidi kya meri fo Abibu . 5Na kechiwa ili Mndumii-Ruwa, echimuduo mṟasa orukenyi lo Wakanaani, na Wahiti, na Wahivi, na Wayebusi, orukalo aleliia wandeanu nyamu ke nechikuinenga iyo, nyi oruka luwode maruwa na wuki, nlyondi mochiwada kiṟundio ki kiidi kya merifu. 6Mochilya mkate ilantarang'ashe yechilio mkonuyo mfungade; na mkonu fo mfungade fochiwa foana Mndumii. 7Mkate fumtarang'ashe fulawono kopfo, manya mtarang'ao fulawono kopfo, kiidi kya oṟiho lopfo lose. 8Na iyo nochiwia mana opfo mkonufo, nohambe, ‘Nyi kipfa kya isho Mndumii-Ruwa alenjiwutia mandi njilewuka Misri.’ 9Nakyo kechiwa kichano kopfo kiidi kya owoko lopfo, na kui ngumbuo mesonyi hapfo, kundu ke iwawaso lya Mndumii-Ruwa lyikae dumbunyi lyapfo; kipfa Mndumii-Ruwa nalekuwuta nowuke Misri kui owoko luwode pfiinya. 10Ko ikyo nochiringa iwawasolyi kui kiheri kyalyo orio maka kui maka.”

Mbonyi tsa wufee wo kuwoka

11Kechiwa ilyi Mndumii-Ruwa echikuende na orukenyi lo Wakanaani, chando alekuliia nyamu iyo na wande wapfo, na ikuinenga, 12 nlyondi ochiinenga Mndumii-Ruwa orio mana mmbee uwode, na kikifee nyi shuma sha kuwoka, isho sha kisoṟo shechiwa nyi sha Mndumii-Ruwa. 13Orio ihache lya nzoi lyiwee nochitalaa na ichondi; na kokoya kulakundi ilitalaa, nochilifunja nzingo; na orio mana mmbee o wandu kiidi kya wana wapfo nochimtalaa, 14Nahong'u kechiwa ili mana opfo echikuwesa ili lya ngama, kechihamba, “Kudi nki ki?” Nochimmbia Mndumii-Ruwa naleluwuta Misri; kuwuka kulya mmbenyi ya wusinga, kui pfinya ya owoko loke; 15nahong'u kiwekeri ili Farao alekuumiṟa mrima foke, alaluinenge momu fokurepfo, Mndumii-Ruwa kakapa wawee wose wawei orukenyi lo Misri, wa wandu na wa shuma; kui kipfa kya ikyo njekeinenga Mndumii-Ruwa wawee wose, kokoya nyiwa kisoṟo; kyaindi wana wawee wose wa wana wako njekewatalaa. 16Mbonyitso tsechiwa kichano owokonyi lopfo, na kindo kemasa o makidi hawi ha mesoho hapfo; cha kipfa Mndumii-Ruwa naleluwuta kulya Misri kui pfinya ya owoko loke.

Ngo ya modo na ya ipuchi

17Kiwei kiherikyo Farao amelekia wanduwo wakuhendie kowo, Ruwa alewaduo kui njia ya orukenyi lo Wafilisti-pfo, manya chando iwei ya kufui; kyamba Ruwa nalehamba, “Wandu wo walashike ialachika ili wechikoyana na shida, wawuye na Misri.” 18Kyaindi Ruwa kawatengesha wanduwo nuka ya msanga njia ya wambaṟa ya ipalyipalyi lya Shamu; wana wa Waisraeli wakado wawuka orukenyi lo Misri waṟee shisha. 19 Mose kaduo mafuo halya ha Yosefu handu hamu nao; kyamba nawelisiṟie mnu nyamu wanawo wa Waisraeli, kechihamba, “Na kikaki Ruwa nechimuchea nanyo mochiduo mafuo hako handu hamu nanyo kuwuka iya.” 20Nawo wakaira kyaṟo kuwuka Sukothi, wakasia moo Ethamu, mṟasenyi fo nuka iya. 21Nao Mndumii-Ruwa kawasongoya mfiri kiidi kya ipuchi lii cha ngo, kundu nawateteṟe njia; na kio, kiidi kya modo fui cha ngo, kundu nawainenge sa; waidime ichumia kio na mfiri; 22ngo iya ya ipuchi ilelekana nawo mfiripfo manya ngo iya ya modo ilelekana nawo kiopfo.

Currently Selected:

IWUKA 13: KIM2

Highlight

Compare

Copy