IWUKA 14

Waisraeli waambada ipalyipalyi lya Shamu

1Mndumii-Ruwa kadeda na Mose, kambia, 2“Wia wana wa Waisraeli, ke wawuye wasie moo kufui na Pi-hahirothi, makidi hawi ha Migdoli na ipalyipalyi, iambuyana na Baali-Sefoni; mochikuala oshangunyi loke kufui na ipalyipalyi. 3Nao Farao nechideda kya mbonyi tsa wana wa Waisraeli, Waleṟumbaṟumba kulya-nuka ya msanga iya ilewaima walawukepfo. 4Na inyi njechiumiṟa mrima fo Farao, nao namuoshe numa, inyi njii Mndumii-Ruwa.” Kyasia wakawuta wado. 5Mangi ya Misri kawio ke wandu walya wamedicha; na mrima fo Farao, na mrima ya waṟundi wake ikahalutso ilawe cha ya wanduwo, nawo wakahamba, “Nki ki ikyo lowuta, lukalekia wana wa Waisraeli wahende walaluṟundiese?” 6Kaṟeheṟa ikari lyake, kaduo wandu wake hamu nao; 7Kairase makari masambuṟe mahana haṟandaṟu (600), makari hose ha Misri, na wachili huye ya makari ho hose. 8Mndumii-Ruwa kahaluo mrima fo Farao mangi ya Misri fukauma, nao kaosha wana wa Waisraeli; kipfa wana wa Waisraeli walewukapfo kui wutimbiri. 9Wamisri wakawaosha numa yawo, frasi tsose na makari hose ha Farao, na waskari wake wechumia na frasi, na itorito lyake, nawo wakawakoya wasiiye moo kufui na ipalyipalyi, kufui na Pi-hahirothi kuambuyanyi na Baal-sefoni.

10Na Farao kekiafukia, wana wa Waisraeli wakairia meso hawo, ambuya, Wamisri wakeri icha numa yawo; wakaowuo mnu. Wana wa Waisraeli wakafihiṟia Mndumii-Ruwa. 11Wakawia Mose, “Ngesa! Kipfa kya ili kulaweipfo shipfu kulya Misri noluwutapfo kundu lupfiiye kunu nuka ya msanga? Nki ilyi kuleluwutia kudi, iluwuta orukenyi lo Misri? 12Idedolyi chilyo lulekuwia kulya Misri, lukahamba, kudeye lusingie Wamisri? Kyamba nyi nanga iṟundia Wamisri kota lochipfia kunu nuka ya msanga.” 13Mose kawia wandu, “Mulaowuo, hoṟokenyi tupu muwone okiṟo lo Mndumii-Ruwa echimuwutia inu; cha kipfa Wamisri wa muwawonyi inu mochiwawonase mlunganapfo. 14Mndumii-Ruwa nechimkapanyia nyo, nanyo mochitsia sau.”

15Mndumii-Ruwa kawia Mose, “Nki ilyi uinjieṟeṟia inyi? Wia wana wa Waisraeli wahende mbele. 16Na iyo iria ndichi yapfo, nahoṟoye owoko lopfo huya ipalyipalyi, na ilyidumbutsana; na wana wa Waisraeli wechiida makidi hawi ha ipalyipalyi handu hahadutsu. 17Na inyi, njechiumiṟa mrima ya Wamisri, nawo wechimuosha waide napfo, na inyi njechikuwonyia, kiṟumi ko Farao, na ko itorito lyake lyose ko makari hake na ko walya wake wekedoya frasi. 18Na Wamisri wechimanya ke Inyi njii Mndumii-Ruwa ilyi njechikuwonyia kiṟumi ko Farao, na makari hake, na wedoya frasi tsake.”

19Nahong'u malaika ulya o Ruwa, awesongoya itorito lya Waisraeli mbele, kakure kawuya na numa yawo; na ngo iya ya ipuchi ikakure alya kusonguo kowo, ikahoṟoka numa yawo; 20Ikakaa makidi hawi ha itorito lya Misri na itorito lya Waisraeli; kyaindi ipuchi lilya liwewuta ngeela ko Waisraeli kiheri kya kio, na mema ko Wamisiri, nawo walaidime isembelia Waisraeli kio taṟaṟaa. 21Mose kahoṟuo owoko loke huya ipalyipalyi; Mndumii-Ruwa katana ipalyipalyi lyiwuye na numa kui otanu sa luapfinya luwuka ora lo ngamenyi, kio taṟaṟaa, katana handu hahadutsu kulya ipalyipalyinyi, mṟinga fukahawukana. 22 Wana wa Waisraeli wakaida kiidi kya ipalyipalyi handu hahadutsu na mṟinga fuwei omombo ora lowo lo kulyo na ora lowo lo kumoso. 23Na Wamisri walya wakawaituma numa, wakaida na kiidi kya ipalyipalyi, frasi tsose tsa Farao, na makari hake, na walya wedooya frasi. 24Kiheri kya aheṟa Mndumii-Ruwa kaimehia ichekeṟo lya Wamisri kulya ngonyi ya modo na ya ipuchi kahataṟa ichekeṟo lilya lya Wamisri. 25Kawutapfo shidenga shilya sha makari hawo, tane hahenda kyombuho; Wamisri wakahamba, “Ludichie kulya kusonguo ko Waisraeli; cha kipfa Mndumii-Ruwa naiwakapanyia.”

26Mndumii-Ruwa kawia Mose, “Hoṟoya owoko lopfo huya ipalyipalyi, kundu mṟinga fuwuyese huya Wamisri, huya makari hawo, na huya frasi tsawo.” 27Mose kahoṟuo owoko loke huya ipalyipalyi na koikitambaṟuka ipalyipalyui lyikawuya kui pfinya yalyo; Wamisri wakadichia kusonguo kolyo, na Mndumii-Ruwa kawaarisia Wamisri kuleshe ipalyipalyinyi. 28Mṟinga fulya fukawuya fukafihisuo makari na wedoya frasi, na ichekeṟo lyose lya Farao lyileida na ipalyipalyinyi numa yawo; kuletsuhaa mndu ma umupfo. 29Kyaindi wana wa Waisraeli wakachumia handu hahadutsu makidi hawi ha ipalyipalyi; na mṟingafo fuwei nyi njomombo ora lowo lo kulyo na ora lowo lo kumoso. 30Nyi wudo Mndumii-Ruwa aleashuo wana wa Waisraeli mkonu fulya mawokonyi ha Wamisri; Waisraeli wakawona Wamisri mbai ya ipalyipalyi, wapfiie. 31Waisraeli wakawona iṟunda lilya lying'anyi Mndumii-Ruwa alewutia Wamisri, nlyondi wanduwo waleichika Mndumii-Ruwa, wakaidikia Mndumii-Ruwa, na mṟundi oke Mose.

Currently Selected:

IWUKA 14: KIM2

Highlight

Compare

Copy