IWUKA 15

Kiimbo kya Mose

1 Nahong'u Mose na wana wa Waisraeli wakaimbia Mndumii-Ruwa

kiimboki wakadeda, wehamba,

“Njechiimbia Mndumii-Ruwa, kyamba nawode kiṟumi king'anyi,

Frasi na modoya frasi nalewakumba ipalyipalyinyi.

2 Mndumii-Ruwa nyi pfinya tsako, na kiimbo kyako;

Nao nawei okiṟo loko,

O nyi Ruwa oko, na inyi njechimṟumisha;

Nyi Ruwa o wande oko, na inyi njechimwichimbiṟa.

3Mndumii-Ruwa, nyi mndu o shida,

Mndumii-Ruwa, nlyo rina lyake.

4Makari ha Farao na ichekeṟo lyake nalewakumba

ipalyipalyinyi, wachili wake wasambuṟe

walesoṟowia ipalyipalyinyi lya Shamu.

5Mfu fukawashikia,

Walesoṟowiapfo cha iho.

6Mndumii-Ruwa, owoko lopfo lo kulyo luleinengo kiṟumi na

wuidimi,

Mndumii-Ruwa, owoko lopfo lo kulyo luipoṟipotsa wakituwa.

7Kui mfoeṟa fo wunene wopfo nokeombotsa

wandu iwo wekekutengetia;

Nokedika nyashi yapfo, nayo ikakombetsa cha

masaho maumu.

8Kui otanu lo shiwale shambuo tsapfo mṟinga fulehoṟotso,

Mṟinga fukahoṟoka cha sohu,

Kundu kuṟungukie kukawadana oṟoonyi lo ipalyipalyi.

9Mkituwa kahamba, “Njechiwaosha, njechiwawada,

njechihawa shilya ngaende shidenyi,

Mrima foko fochiihutso nyiwo;

Njechisomuo oshu loko, owoko loko lochiwakombetsa.

10Kuledihina kui otanu lopfo, ipalyipalyi

lyikawapfinyikia.

Wakasoṟowia cha mboro kiidi kya mṟinga fufoi.

11“Ee wo Mndumii-Ruwa, kiidi kya maruwa nyiu ai cha iyo?

Nyiu ai cha iyo, mwele kiidi waele.

Msa aoweshie kiidi kya kiṟumi kyapfo, mowuta maṟiho?

12Kulehoṟuo owoko lopfo lo kulyo,

Oruka lukawameṟa,

13lyo kui isaṟia lyapfo kuleteteṟa wandu kulewakiṟa.

Kui wuidimi wopfo kulewaloṟa mṟasa handu hapfo haele.

14Mkambo ya wandu waleicho, waidedema,

Wekekaa Ufilisti okooṟa lulewawada.

15Nalyo wasu wa Edomu wakaṟihio,

Wandu wa Moabu wawode pfinya idedema

lyikawawada, Wandu wose wekekaa Kanaani wakasalaa.

16Wuowu na fowa shilewaolokia;

kui wuidimi wo owoko lopfo watsie sau cha iho;

itane wandu wapfo wechiambada, Hoi Mndumii-Ruwa,

Itane wandu wapfo wechiambada iwo kulewahuṟa.

17Nochiwaitsa napfo, na iwadonga fumvuhu lya kyoṟa

kyapfo;

Hando halya kulekusungusia, Hoi Mndumii-Ruwa, kundu

nokukaieho,

Alya haele kulehaikara, Mndumii-Ruwa, kui mawoko hapfo,

18Mndumii-Ruwa, nechiikolonyia mlungana na mlungana.”

19Kyamba frasi tsa Farao na makari hake na wedoya frasi wake waleida na ipalyipalyinyi, Mndumii-Ruwa, kawihiṟa mṟinga fo ipalyipalyi huyawo; kya indi wana wa Waisraeli walechumia handu hahadutsu kulya ipalyipalyinyi.

Kiimbo kya Miriamu

20Na Miriamu mwikimbi o kika, mshiki o Aroni, kaira ipalu owokonyi loke; waka wose wakakure wakaosha numa yake, wawode mapalu wechishina. 21Miriamu kaimba nawo wakamiidikia,

“Imbienyi Mndumii-Ruwa, kyamba nalewinza kui kiṟumi,

Frasi na wedoya frasi nalewakumba ipalyipalyinyi.”

Mṟinga mbawo fo Mara

22Mose kaduo Waisraeli wahende mbele kuwuka ipalyipalyinyi lya Shamu nawo wakachea nuka ya msanga ya Shuri; wakachumia kyaṟo kya mkonu iṟaṟu walawone mṟinga. 23Wekishika handu kokelaho nyi Mara walaidime inyo mṟinga fo Mara, cha kipfa fuweiwawa; kui kipfa kya ikyo rina lya handu halya kukalaho nyi Mara. 24Nalyo wandu wakanunuwia Mose, wehamba, “Lunyo ki ki?” 25Nao kaeṟeṟia Mndumii-Ruwa ; Mndumii-Ruwa, kamloṟa ikidi, kaliwika kulya mṟingenyi, mṟinga fukaloda. Kyasia, kawawikiapfo iwawaso na mdumbuye, kawaheshiapfo; 26Kawawia, “Kokoya mochiadanyia ṟu lya Mndumii-Ruwa, onu kui pfinya tsose na iwuta shisumhanyi oshangunyi loke, nodehe madu hapfo uicho mawawaso hake, na iwada mawawaso hake, Inyi njechiende ndaṟe tsilya njileendie Wamisripfo; huyapfo pfo kyamba Inyi njii Mndumii-Ruwa njekekukiṟa.”

27Wakaafukia Elimu, kuwode soka tsa mṟinga ikumi na tsiwi na makangachi makumi mfungade; wakahoṟotsa mahema hawo kufui na mṟinga.

Currently Selected:

IWUKA 15: KIM2

Highlight

Compare

Copy