IWUKA 16

Mkate fuwukie Ruwehu

1Kyasia, wakachumia kuwokia Elimu, na wandu wose wa wana wa Waisraeli wakaafukia nuka ya msanga ya Sini, ii kiidi kya Elimu na Sinai, mkonu fo ikumi na katanu fo meri fo kawi wokia wawuka orukenyi lo Misri. 2Mamingi fose fo wana wa Waisraeli fukanunuwia Mose na Aroni kulya nuka ya msanga. 3Wana wa Waisraeli wakawawia, “Akima lulekupfia kui owoko lo Mndumii-Ruwa, kulya orukenyi lo Misri, mandi luwedamie kufui na nungu tsilya tsa nyama, lochilya shelya mṟasa lukaihuda; kipfa muleluwutapfo na iluende na kunu nuka, kundu muluwaahe na njaa mamiingifu fose.” 4 Naalyo Mndumii-Ruwa, kawia Mose, “Ambuya, Inyi njechimuendie nyo mkate kuwuka ruwehu; na wandu wo wechiida na nja idoduo orio mkonu kiheo kya mkonu; kundu njiwuteho iwahesha, kokoya wechichumia sumhana na iwawaso lyako, ang'u ote. 5Naho kechiwa mkonu fo kaṟandaru, ke wechiteseheṟa isho wechiende na mba, nasho shechifo kota sha mkonu fumu shechiwa sha mkonu iwi.” 6Mose na Aroni wakawia wana wose wa Waisraeli, “Kyukanyi nlyondi mochimanya ke Mndumii-Ruwa amewawuta orukenyi lo Misri; 7na ngamenyi nlyondi mochiwona kiṟumi kya Mndumii-Ruwa; kyamba naicho inunuwa lyanu mlemnunuwia Mndumii-Ruwa; ‘a so nyi waki, tane molununuwia?’” 8Mose kadeda, “Nkyo kechiwa, ili Mndumii-Ruwa echimuinenga nyama kiheri kya kyukanyi mulye, na ngamenyi mkate tane mopeleko; kyamba Mndumii-Ruwa ameicho inunuwa lyanu mulemnunuwia o; a so nyi waki? Inunuwa lyanu chi molununuwia sopfo, kyaindi monunuwia Mndumii-Ruwa.” 9Mose kawia Aroni, “Dedang'u, na mamingi fu fose fo wana wa Waisraeli, njonyi hafui oshangunyi lo Mndumii-Ruwa; kyamba naleadanyia mnunuwo fonu.” 10Kiwei lilya mandi Aroni alededa na kisanzio kyose kya wana wa Waisraeli, wakaambuya ora lo nuka ya msanga, ambuya, kiṟumi kya Mndumii-Ruwa kikawoneka kulya ipuchinyi.

11Mndumii-Ruwa kadeda na Mose kehamba, 12“Njileicho mnunuwo fo wana wa Waisraeli; dedang'u nawo, nowawie, ‘Kiheri kya kyukanyi mochilya nyama, na kiheri kya ngamenyi mochiihuda mkate; nanyo mochimanya ke Inyi njii Mndumii-Ruwa onu.’” 13Kikashika kiheri kya kyukanyi, makura hakacha, hakapfumba alya handu wawekuumbie na kiheri kya ngamenyi mlewi fuweichuo orukenyi njora tsose tsa handu wawei. 14Na lilya mandi mlewi fulewuka orukenyi, ate! Huya teri kulya nuka ya msanga aiki kindo kitutu cha kidenga kitutu cha iwala. 15 Wana wa Waisraeli weikikiwona, wakawiana, “Nki ki iki?” Kyamba walalemanya nki ki. Mose kawawia, “Nyifo mkate fulya Mndumii-Ruwa amuinenga mukulie.” 16Idedolyi nyilyo Mndumii-Ruwa alewawasia, “Doduonyi nyo kindoki orio mndu na mliie foke; mdo fo mndu umu nyi mboṟiko, chandu itala lya wandu wanu lii; wudo mochidodou orio mndu kipfa kya iwo wai ipfo ihemenyi lyake.” 17Wana wa Waisraeli wakawuta wado, wakadoduo wengi shifoi, na wengi shiangu. 18 Nawo wekishiwika mboṟikonyi ulya aledoduo shifoi aletsuhaṟio kindopfo, na ulya aledoduo shiangu aleuṟa kindopfo; wakadoduo orio mndu kihianyi na mliie fo foke chandu fukeri. 19Mose kawawia, “Mndu ose nalatsuhaṟe mṟasa ngamenyi.” 20Indi wala adanyie Mose; wengi kiidi kyawo wakakitsuhaṟa tane ngamenyi, nakyo kikadaa na iṟeheṟa mashinu; Mose kawado nyi nyashi mnu kipfa kyawo. 21Kyasia, wakadoduo ngamenyi kui ngamenyi, orio mndu chandu mliie foke fuwei; na kiheri mbaṟi fulewaa mnu kikasalaa. 22Kyasia, mkonu fo kaṟandaṟu wakadoduo kelya kilya kya mkonu iwi, orio mndu mboṟiko tsiwi; na wameku wose wa mamingi fulya wakahenda iwia Mose. 23 Mbonyi tso Mose kawawia, “Nlyo idedo Mndumii-Ruwa alededa, ‘Ngama nyi mkonu mwele fosia moo, Sabato njiele ko Mndumii-Ruwa; kahaṟenyi sa mochikahaṟa, koṟenyi sa mochikoṟa na ikyo kechitsuhaa suṟumenyi necha mṟasa ngamenyi.’” 24Kyasia, wakakisuṟuma mṟasa ilyi lya ngama ngamenyi, chandu Mose ewawawasa; nakyo kiladae ma iṟeheṟa mashinu. 25Mose kahamba, “Lyenying'u iki inu; kipfa inu nyi sabato ya Mndumii-Ruwa, inu mochikiwona ipfo nja mademenyipfo. 26Mkonu iṟandaṟu mochidoduo; kyaindi mkonu fo mfungade nyi Sabato, mkonufo kechiwonekapfo.” 27Nalyo mkonu fo mfungade wengi wakakure ihenda ikidoduo, walakiwone. 28Mndumii-Ruwa kawia Mose, “Mochileha iwada wuikimbi woko na mawawaso hako mṟasa indi? 29Ambuyenyi, kyamba Mndumii-Ruwa nalemwinenga nyo sabatoyo, kipfa kya ili amunengie mkonu fo kaṟandaṟu kelya kya mkonu iwi; orio mndu nakae handu hake, mndu oose nalakure o handu hake mkonu fo mfungade.” 30Kyasia, wanduwo wakasia moo mkonu fo mfungade. 31 Na mba ya Waisraeli wakadumbuya kindokyo rina lyakyo Mana; nakyo kifananyi na mchele, kikiili; na mlodie fokyo fuwei cha mlodo fo mandasi masise hamasungusie na wuki. 32Mose kahamba, “llyi nyi idedo Mndumii-Ruwa alewawasa, mboṟiko imu ya kindoki kikeleṟio kipfa kya luwa lyanu; kundu nawo waidime iwona kelya kilya ndemuihutsa nyo kulya nuka ya msanga, mandi njilemuende kuwuka Misri.” 33 Kyasia, Mose kawia Aroni, “Ira ikopo, nowikepfo mboṟiko imu ya Mana, nolileṟie oshangunyi lo Mndumii-Ruwa, liringo kipfa kya luwa lyanu.” 34Chandu Mndumii-Ruwa, alewawasia Mose nyi wudo Aroni alewika oshangunyi lo waṟingishi, kundu kiringo. 35 Na wana wa Waisraeli walelya Mana maka makumi haana (40), tane washikia oruka luwode wandu wakalya Mana iya, mṟasa waleshika mṟasenyi fo oruka lo Kanaani. 36(Omeri yo nyi kienga kya ikumi kya efa).

Currently Selected:

IWUKA 16: KIM2

Highlight

Compare

Copy