IWUKA 20

Mawawaso ikumi ha Ruwa

(Uwa 5:1-21)

1Ruwa kadeda madedoha hose kahamba, 2“Inyi nyi Mndumii-Ruwa, Ruwa opfo njilekuwuta orukenyi lo Misri, mmbenyi ya wusinga. 3Kulawade Ruwa ungi shile na inyi.

4 “Ulakusungusie ofano lo pacha, manya ofano lo kindo kyose kii huye ruwehu, manya kindo kii wanda orukenyi, manya kii mṟingenyi wanda ya oruka, 5 kulashiindie manya ishiṟundia; kyamba inyi Mndumii-Ruwa, Ruwa opfo nyi Ruwa njiwode wunyenyi, njekewuwuya njonyamaṟo tsa wandee wa wandu ipfo ko wana wawo, mṟasa kishari kya kaṟaṟu na kya kaana kya iwo wanjisuo, 6na inyi njekesaṟia shiku ka shiku iwo wanjikundi, na iwada mawawasoho hako.

7 “Kulasende rina lya Mndumii-Ruwa, Ruwa opfo kya maai, cha kipfa Mndumii-Ruwa alechida alakapa ichu masenda rina lyake kya maai. 8 Manya mkonu fo Ruwa nofutane mwele. 9 Mkonu iṟandaṟu ṟunda shiṟundio, noachikie shindo shapfo shose; 10kyaindi mkonu fo mfungade nyi sabato ya Mndumii-Ruwa, Ruwa opfo, mkonufo kulaṟunde iṟunda lyose, iyo, manya mana opfo, manya mana opfo okika, manya isinga lyapfo, manya mṟundi mka, manya shuma shapfo, manya mhenu akeri ipfo mṟinyi fopfo. 11 Kyamba mkonu iṟandaṟu Mndumii-Ruwa nalewika ruwehu na oruka, na ipalyipalyi, na shose shiipfo, kasia moo mkonu fo mfungade; ko ikyo Mndumii-Ruwa kawikia mkonu, fo sabato mboṟa kafuheṟemtsa:

12 “India ndeo na mayo; mkonu yapfo iengeṟeke

kiidi kya oruka ochiinengo nyi Mndumii-Ruwa, Ruwa opfo.

13 Kulawaahe.

14 Kulaṟuhuye.

15 Kulaiwe.

16 Kulahambeho sha wongo kundu nowonyie odoo owingo,

17 kulalange mba ya odoo, ulalange mka o odo,

manya isinga lyake manya kisinga kyake kika, manya

mmbe tsake, manya nzoi tsake, manya orio kindo ki

kyake kyose.”

Wandu waowuo

(Uwa 5:22-33)

18 Wandu wose wakawona mbawa, na ikuṟuṟuma na ṟu lya iranda, na fumvu lilya lyikaduka mtsu; na wandu wekiwona isho wakadedema, wakahoṟoka haleshe. 19Wakawia Mose, “Deda naso iyo, naso lochiicho, indi Ruwa naladede naso, lulache ipfiia iya.” 20Mose kawia wandu, “Mulaowuo, kyamba Ruwa nacha kundu namuheshe, kundu mlawute wunyamaṟi.” 21Kyasia, wanduwo wakahoṟoka haleshe, nao Mose katikiria meema fulya fung'anyi kundu Ruwa awei.

Wuwawaso wo rasio

22Mndumii-Ruwa kawia Mose, “Wia wana wa Waisraeli kudi, nyo muwenyi mowona ke ngadeda nanyo kuwuka ruwehu. 23Mulasungusie maruwa hengi hamu na inyi; maruwa ha fesa, manya maruwa ha sahabu, mulakusungusie. 24Mochinjisungusia rasio lya teri, na iyo nochilekia shidaso shapfo huyake; shidaso shemaya modonyi, na shidaso sha ofoṟo, machondi hapfo, na mmbe tsapfo, orio handu njechiwikaho ngumbuo ya rina lyako, oo nyi hondo njechikuchea na ikuwikia mboṟa. 25 Na iyo konjiwikia rasio lya maho, ochinjiwikia lya maho mapachepfo; cha kipfa kokoya iyo osungusia na kindo kipache kyapfo nyi oiteṟefutsa. 26Kingise, ochido ihenda rasionyi lyako huye kui ngasipfo, kitaṟe kyapfo kilache iwono huyake.”

Currently Selected:

IWUKA 20: KIM2

Highlight

Compare

Copy