IWUKA 21

Iwawaso lya masinga

(Uwa 15:12-18)

1“Kyasia, mawawaso ochiwika oshangunyi lo wandu nyi iha. 2 Kohuṟa isinga lya Kiebri, nechikuṟundia maka iṟandaṟu; maka fo mfungade nechiwuka kopfo wulya. 3Kokoya naleida na kopfo o amonyi tupu nechiwukapfo ado o amonyi; kokoya nawealikie, mka oke nechikure nahende handu hamu nao. 4Kokoya nyi mndumii oke amnengie mkacho, nao kamfea wana, wa womi ang'u wa waka; mkacho na wanawo wechiwa masaa ha mndumii cho oke nao miicho nechiwukapfo o amonyi. 5Kyaindi isingalyo lyikahamba na pata, “Inyi njikundi mndumii oko, na mka oko na wana wako; inyi njikundi iwuka wusingenyipfo; 6O nlyondi mndumii cho oke echimwende oshangunyi lo Ruwa na imwende na alya mongo, ang'u alya kisingitinyi kya mongo; na mndumii oke nechitocha kudu koke na menya nlyondi echimṟundia mkonu yose.

7“Mndu kakumba mana oke o kika nawe kisinga, o echilekio iwuka wusingenyi cha masinga ha kisoṟopfo. 8Kokoya mndumii cho amkosie alachihiyo nao, nechimkumba ko ndee; awode momu fomkumba ko wandu wahenupfo, kipfa alembutia wusumuhanyipfo. 9Kokoya namkosia mana oke, nechimbutia chandu kiwaṟi mbuka tsa wana wake wa kika. 10Kokoya aduo mka ungi, echiima mka ulya okuwooka, nechimnenga kelya, nguo tsake na shose shilya shimbaṟi nao. 11Kokoya alambutia shindoshi, nechimlekia nakuhendie wulya, alamkose.”

Muanduye fo mbaahi

12 “Mnducho oose echikapa mndu, tane apfa mnducho kiwaṟi nawoho. 13 Kyaindi kokoya nambaha alakusirie, nyi inyi Ruwa ngambika mawokonyi hake, kyasia njechikuloṟa handu echihadichia nakae ho ko ofoṟo. 14Kyaindi, mndu kawaha odoye akusirie nechiwoho ma kokoya adichiya rasionyi lyako. 15Mokapa ndee ang'u mae, kiwaṟi nawoho. 16 Ichu moiwa mndu, na imkumba, ang'u amhaluo isinga lyake, icho kiwaṟi nawoho, 17 Mosesa ndee ang'u mae, kiwaṟi nawoho. 18Wandu wakaloyana, na umu kakapa odoe na iho, ang'u na nzina, alapfe, kyaindi kalaṟo kitaṟenyi kyake; 19ili echikurese na ihenda nja na ndichi, oo ulya alemkapa nlyondi echilekio; indi nechimtaa kipfa kya maanya fulya foke fuledeka, namwinduṟa tane achia na kamu. 20Mndu kakapa isinga lyake, ang'u kisinga kyake kya kika na ndichi nao kapfia mawokonyi hake mndu cho netao kiṟache. 21Kyaindi isinga lilya lilampfe komesia mkonu fumu ang'u iwi, mnducho echiwoho pfo kyamba isinga lilya nyi masaa hake.

22“Wandu wasoṟo wakakapana, wakawika mndu mka mlemo shifaṟe tane adetsa kimana kyake, indi nalawawio ngoseṟa, icho amnanga kifaṟekyo, kimbaṟi natae njooko chandu mii o mkacho echihamba na iidikio nyi weanduo mondu. 23Kyaindi kokoya kuwode shifaṟe shifoi, nlyondi echitaa moo kwi moo, 24 riso kui riso, iheho kui iheho, owoko kui owoko, kudende kui kudende, 25irumatsa kui irumatsa, kifaṟe kui kifaṟe ipirichuka kipfa kya ipirichuka.

26“Mndu kakapa isinga lyake risonyi, ang'u riso lya kisinga kyake kya kika, kalinyamaṟa; nechimlekia nakuachie kipfa kya riso lyake. 27Ang'u kakapa isinga iheho lyikakuṟuka, ang'u heho lya kisinga kyake kya kika, nechimlekia nakuachie kipfa kya iheho lyake.”

Wuwawaso wo wenyi masaa

28“Kokoya mmbe yakapa mndu na membe kapfa, mmbeyo yechiwaaho kui ikumbio maho na nyama yake ilalyio; kyaindi menyi mmbeyo echianduyo mondu pfo. 29Kyaindi kokoya mmbeyo iweichiwie ikapa wandu wokia kacha, nao menyi mmbe kawawaso kya mbonyitso, manya nalaipfunge, nayo ikawaha mndu; mmbeyo yechiwooho na menyi oyo da. 30Kyaindi, kokoya aidikio itaa njooko ya moo foke, nechitaa ikyo kyose echiteṟio. 31Kokoya mmbeyo yawaaha mana o kiumi ang'u o kika, muanduye na ifoifo. 32Kokoya mmbeyo yawaaha isinga lya kiumi ang'u lya kika; menyi mmbe nechitaa njooko ya fesa 30, na mmbe yo yechiwoho ko ikapo na maho.

33“Mndu kapfunuo ṟungu ang'u kasuma ṟungu, nao nalalyishikie, numa mmbe ang'u nzoi ikaolokapfo ikapfa, 34menyi o iṟungu lyo nechitaa menyi kiumakyo fesa na kiumakyo kipfu kechiwa kyake. 35Mmbe ya mndu ikawaaha mmbe ya mndu ungi; wanduwo wawawi wechikumba mmbeyo iina moo, na ihawana fesa na ihawanase nyama tsa mbe iya yawoho. 36Ang'u kikamanyika ke mmbeyo wokia mawokioonyi iwekekapa na membe, na menyi oyo nalaipfunge; nechitaa mmbe kui mmbe, na mmbeyo ilepfa yechiwa yake.”

Currently Selected:

IWUKA 21: KIM2

Highlight

Compare

Copy