IWUKA 22
22
Wuwawaso wo italaa
1Mndu kaiwa mmbe ang'u ichondi, kashinja, ang'u kakumba; nechitaa mmbe tsingi tsitanu handu ha mmbe imu, na machondi haana handu ha ichondi limu. 2Mmiwi kakoyo kechifunja handu, nao kakapo tane apfa, kochikaapfo kiṟache kya samu kipfa kyakepfo. 3Kyaindi ko koya mnengeṟi fombaa, nlyondi kochikaapfo kiṟache kya samu kipfa kyake; kiwembaṟi ilekia masaa hashikie, kokoya alawode kindo, na nakumbo kipfa kya wuiwi woke. 4Kokoya kindokyo kyaiwo kikakoyo kii na moo mawokonyi hake, kokoya nyi mmbe, ang'u nyi nzoi, ang'u nyi ichondi nechitaa wuhuru wokyo makamba hawi.
5Mndu kalisira demenyi, ang'u demenyi lyamsabibu kadapfo shuma shake, shikalya demenyi lya mndu ungi, nechitaa shindo shii shicha sha demenyi lyake amonyi ang'u sha msabibunyi yake.
6Modo fukaaka, fukawada msha, na Ngano impfunge shihewa, ang'u Ngano ilameweho, ang'u dema, lyikasenekia; icho aatsa modofo kimbaṟi natae.
7Mndu kainengia odoe kichoṟe kya fesa ang'u shindo shingi namwiṟichie, na shindo sho shikaiwio mbenyi ya mnducho; mwiwi kawado nechitaa wuhuru wokyo makamba hawi. 8Mwiwi alamewado, nlyondi menyi mba echisembelia oshangu lo Ruwa, kiwono napata ke chio aleira shindo sha odoepfo. 9Orio kindo kyose kyaende maloyano ko wandu wawi huya masaa, kiwe nyi mmbe, nzoi, ichoondi, nguo ang'u kindo kingi kyose kidekie, mondufo fo wandu wo wawawi fochiendo oshangunyi lo Ruwa; na icho echianduyo nyi Ruwa ke nyio mdeko nechitaa odoe wuhuruwo makamba hawi.
10Mndu kainengia odoe nzoi, ang'u mmbe, ang'u ichondi, ang'u shuma shingi kyose, kundu namwikanyie iringa; kyuma kilya kikapfa, ang'u kikaluo, ang'u kikaiwo na kulakaepfo mndu edima iṟingishia; 11Mnducho nechihenda ilya nyamu rasionyi ko Mndumii-Ruwa ke alemeiwe shindosho pfo, na menyi masaa nechiidikia isho, nao echimtaa kindo kyose pfo. 12Kyaindi kokoya kyumakyo kileiwo kii mawokonyi hake, kimbaṟi natae menyi masaa. 13Kokoya kyumakyo kilewaho nyi indo lya ngeṟenyi, mnducho nawari naende kiṟingishio kyayo, na kaende kiṟingishio kyo echitaa ko ikyo kilewoho nyi indo lya ngeṟenyi pfo.
14Mndu kaakuo kyuma kya odoe, nakyo kikawada kifaṟe, ang'u kikapfa, menyi alaiho, kimbaṟi natae. 15Ko koya menyi naweiho handu hamu na kyuma kyo kyake echitaapfo; kyaindi kokoya kyumakyo kileakuyo, menyi okyo nechitao wueri wulya wo iakuo.
Wuwawaso wo mkao mcha
16 Mndu kalemba manamkeha alamkose kalaa nao, kimbaṟi naute ngosa kipfa kyake kundu nawe mka oke. 17Kokoya ndee o manacho aleha kichikichi imnengia manacho, mnducho nechitaa fesa tsishikie wuhuru wo ngosa ya manacho o waka.
18 Kulalekie mndu mka msawi nakae na moo.
19 Mndu oose echilaa na indo lya nja na nawoho.
20 Mndu echishinjia ruwa lyo lyose kidaso, shile ko Mndumii-Ruwa o amonyi, mndu cho nawoho.
21 Kulawonyie mhenu, manya kulambutie sha utimbiri; cha kipfa nanyo wuwei wahenu orukenyi lo Misri. 22Manya kulalise wukiwa mkusu, manya mana mngweda. 23Kokoya ochiwuta kudo kyalohi inyi njechiicho kifihiṟo kyawo, 24na nyashi yako yechimakia na inyi njechimuwaha ko oshu; waka wanu wechiwa wakusu, na wana wanu wechiwa ngueda.
25 Koakuya mndu ai mkiwa, kiidi kya wandu wako wai na iyo; manya kulawe cha mndu ombucha koke. 26 Kokoya oambia nguo lyerekia kiwaṟi nombihiṟie mnengeṟi fulameolokia. 27Kyamba nyio nguo awode tupu yekushikia, ngesa nyi kiki echikushikia nakyo? Kechiwa, ili echinjifihiṟia inyi, njechimadanyia; cha kipfa inyi nyi menyi osaṟio.
28 Kuladede Ruwa owicho, manya kulasese mnene o wandu wapfo. 29Kulakeleo injiendie mwano ya ndema lyapfo ya kuwoka ya Ngano na mvinyo, na mafuda ha msinefu. Na nochinjiendie wana wapfo wakisoṟo wawee. 30Nawudo ochiwuta ko wuwee wo mmbe tsapfo, na machondi hapfo, kyaindi nochishileka shionge ko mayawo ko mkonu mfungade na mkonu fo nyanya nonjiendie. 31 Nanyo nyi wandu wako wasambuṟe, koikyo manyamulalye nyama injiwahe nyi mando ha ngeṟenyi, kyaindi nyamayo mochikumbia mashite.
Currently Selected:
IWUKA 22: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
