IWUKA 24

Samu ya mkundano

1Naho Mndumii-Ruwa kawia Mose, “Donyi nyo, iyo na Aroni; na Nadabu, na Abihu na wandu makumi mfungade (70) wameku wa Waisraeli, mukooye Mndumii-Ruwa; mumwichimbiṟe mui haleshe; 2na Mose amonyi nyio echisembelia kufui na Mndumii-Ruwa; indi iwo wechisembelia kufuipfo, manya wanduwo wechido handu hamu nanyopfo.” 3Mose kahenda iwia wandu madedoho hose ha Mndumii-Ruwa, na mdumbuye yake yose; wandu wose wakahaluo kui ṟu limu, wehamba, “Madedo hose Mndumii-Ruwa adeda lochihawuta.” 4Kyasia, Mose kaṟehia madedo ha Mndumii-Ruwa hose, kakure ngamenyi otuko, kasungusia rasio tsindenyi ya fumvu, na ngo ikumi na tsiwi, kui iitala lya mbaṟi ikumi na tsiwi tsa wana wa Waisraeli, 5kadika wanake wa wana wa Waisraeli, walya walewika kidaso kemaya modonyi, wakashinjia Mndumii-Ruwa shidaso sha ofoṟo sha mmbe. 6Mose kaira kienga kya samu iya, kaiwika mboṟikonyi tsifoi na kienga kya samu iya kaipusuya huya rasio. 7Kiidima kaira kitapu kya mkundana kakisoma madunyi ha wandu; wakahamba, “Isho shose Mndumii-Ruwa ahamba lochishiwuta, naso lochiindia.” 8 Mose kaira samu iya kaolya wandu, kahamba, “Ii nyiyo samu ya mkundana Mndumii-Ruwa afuwika hamu nanyo kiidi kya madedoha hose.” 9Nahong'u kado na huye, Mose, na Aroni, na Nadabu, na Abihu, na wandu makumi mfangade (70) kiidi kya wameku wa Waisraeli; 10wakawona Ruwa o Waisraeli; shi ya madende hake kuwei cha maho mailyi pang'a hekelaho Yakuti hafanyi samawi, cha maloalo halya kui wucha woke. 11Ma chandu wanene walya wa Israeli walewona Ruwa, alewakapa pfo. Walekulia na inyo handu hamu.

Mose fumvunyi lya Sinai

12Mndumii-Ruwa kawia Mose, “Njo na kunu huye koko fumvunyi, nokae kunu; na inyi njikunenge maṟaṟo ha maho na mdumbuye na iwawasolyo njileṟehia kundu nowaloshe.” 13Mose kakure na Yoshua, mṟundi oke; Mose kado na fumvunyi lya Ruwa. 14Kawia wamekuwo, “Luwedenyi iya, mṟasa lochimuwuuya; na ambuyenyi Aroni na Huri wakeri kimu nanyo; orio mndu awode idedo nawahendie.” 15Mose kado na fumvunyi, ipuchi lilya lyikashikia fumvu lilya. 16Na kiṟumikyo kya Mndumii-Ruwa, kikakaa huya fumvu lya Sinai; ipuchi lylya lyikafushikia, mkonu iṟandaṟu; na mkonu fo mfungade kalaha Mose kuwuka kulya ipuchinyi. 17Na iwoneka lya kiṟumi kilya kya Mndumii-Ruwa, kiwei cha modo fokekombetsa, huya fumvu mesonyi ha wana wa Waisraeli. 18 Mose kaida na kiidi kya ipuchi lilya, kado na fumvuhu. Mose kakapfo kulya fumvuhu mkonu makumi haana (40), mfiri na kio.

Currently Selected:

IWUKA 24: KIM2

Highlight

Compare

Copy