IWUKA 25

Shidaso sha ihema lyiele

(Iwu 35:4-9)

1Mndumii-Ruwa kadeda na Mose, kambia, 2“Wia wana wa Waisraeli ke wanjiwikie mwano; orio mndu sa mrima fo foke fomnenga ikunda, mochiambia koke mwano foko. 3Mwano ochiambia mawokonyi hawo nyi; sahabu, na fesa na aṟeṟa, 4na ndusu tsa rangi ya samawi, na ya sambarau na ya kimande na nguo kitani kicha, na singa tsa mburu; 5na njonyi tsa masuwa tsinjishie rangi ya kimande, na njonyi tsa indo lya mṟingenyi, na mashidi ha mshita, 6na mafuda ha taa iya, na shiungo sha opfamo ko mafuda halya hekushia, na ko uvumba wulya wokepfama necha; 7na shindo sha wuhuru wung'anyi sha shohamu , na shindo shingi shepfumia kiidi kya naivera, na kulya iṟaonyi kya kipeeta. 8Nawo wanjisungusie handu ha haele; kundu njiidime ikaa kiidi kyawo. 9Kisumhanyi na ishi shose njikuloṟa, mfano fo handu hekaa, na mfano fo shihia shaho shose, nyi wudo mochishisungusia.”

Isanduku lya mkundana

(Iwu 37:1-9)

10“Nawo wasungusie isanduku lya ikidi lya mshita; wuleshe wolyo sentimeta 110, wulandari wolyo nyi sentimita 66, na wuleshe wodo huye nyi sentimeta 166 na kienga. 11Na iyo nolishie na sahabu njicha, nolishie kya mba na kya nja, na iyo noliwikie mkanda fo sahabu fulitengetie njora tsose. 12Sungusia pete tsa sahabu tsiina notsiwike ipfo madendenyi halyo haana, pete tsiwi ora lumu na pete tsingi tsiwi ora lolyo lo kawi. 13Sungusia mashidi maleshe ha mshita noshie sahabuyo. 14Na iyo itsa mashidi kiidi kya petetso tsii njora tsiwi tsa isanduku kundu noidime iduo isandukulyo mlembalemba. 15Mashidi ho hechikaa kiidi kya petetso tsa isanduku; hechiwutopfopfo. 16Numa nowikepfo kiṟingishioki njechikuinenga. 17 Na iyo sungusia kidi kedamia kya osaṟio kya sahabu njicha; wuleshe wokyo wochiwa sentimita 110, wulandari wokyo sentimita 66. 18Na iyo sungusia makerubi hawi ha sahabu; nohawike ko iṟunda lyetsana, ipfo mtsitsioni ya kitimakyo kya osaṟio oralu na oralu. 19Leṟia kerubi umu mtsitsionyi fumu na kerubi o kawi mtsitsionyi fo kawi; wika makerubiho ha kindo kimu na loṟika lo osaṟio mtsitsionyi fu na mtsitsionyi fu. 20Na makerubi wo wechiiria makungo hawo huye, washikie loṟika lo lo osaṟio kui makungoho hawo, na shamu shawo shechiambuyana ichu na ichu, shamu sha makerubiwo shechiambuya loṟika lo osaṟio. 21Hekia loṟika lo lo osaṟio huya isandukulyo; numa nowike uṟingishiwo njechikuinenga kiidi kya isandukulyo. 22Na inyi njechiwonanaho na iyo, njechideda na iyo njii o huya loṟika lo lo osaṟio, makidi hawi ha makerubiwo wawi wai o huya isandukulyo lya kiṟingishio, kya mbonyitso tsose njechikuwawasa kipfa kya wana wa Waisraeli.”

Mesa ya mkate injiwike kidaso ko Ruwa

(Iwu 37:10-16)

23“Na iyo sungusia mesa ya ikidi lya mshita; wuleshe woyo wochiwa sentimita 88, na wulandari woyo sentimita 44 na ido huye sentimita 66. 24Noishikie na Sahabu njicha, noiwikie otiṟimo lo Sahabu lutengetie njora tsose. 25Numa noisungusie mbau iitengetie njora tsose, wulandari woke wochiwa sentimita 66 26Noisungusie pete tsiina tsa sahabu, petetso notsiwike ndumbenyi tsalyo tsiina na madendenyi halyo haana. 27Petetso tsikae kufui na mbau iya, kundu tsiwe handu heitsa shidi shilya sha mshita, sheduo mesayo. 28Sungusia mashidi halya ha ikidi lya mshita, na ishikia Sahabu, kundu mesayo idao nasho. 29Na iyo sungusia sahanyi tsakyo na mdiko yakyo, na makopo hayo, na shikombe shayo shesalaṟia; sungusia shose sha Sahabu njicha. 30 Nochiwika mesayo oshangunyi lo isanduku lya mkundana. Na huya mesayo nochihekia mkate iya injiwute cha kidaso oshangunyi loko kiheri kyose.”

Kimnaṟa kya taa

(Iwu 37:17-24)

31“Na iyo sungusia kimnaṟa kya taa kya sahabu njicha; kimnaṟakyo kisungusie wokia, tsindenyi na ngo yakyo, shikombe shakyo, mrihiyo yakyo, na shiwaṟo shakyo, shose shiwe kindo kimu; 32nakyo kechiwada mbaha tsiṟandaṟu tsechiakia mbaṟinyi tsakyo; mbaha tsiṟaṟu tsa kimnaṟakyo ora lokyo lo kawi 33shikombe shiṟaṟu shishisungusie cha ofano lo shiwaṟo sha mlozi kiidi kya mbaha ya kawi, mrihiyo na kiwaṟo; na wudo mbahatso tsose tsiṟandaṟu tsiwukie ipfo kimnaṟenyii. 34Na kiidi kya kimnaṟakyo shikombe shiina shishisungusie kui ofano lo shiwaṟo sha mlozi, mrihiyo yakyo shiwaṟo shakyo; 35Kochiwada njana wanda ya Orio jozi tsiṟaṟu tsa maṟamba. 36Kimnaṟakyo kya taa, handu hamu na maṟamba hakyo, na shiwaṟo shakyo, shechiwa sha sahabu injisungusie necha. 37Na iyo sungusia taa tsakyo mfungade; nawo wechiatsa taa tso tsose, tsiloṟe sa oshangunyi lokyo. 38Na mamhado hakyo, na shisahanyi shakyo, shose shechiwa sha sahabu njicha. 39Kimnaṟa kyo kechisungusio ko shilo 35 sha sahabu njicha, handu hamu na shihiasho shose. 40 Na iyo ambuya ke noshisungusia cha ofano loke, kuleloṟo kulya fumvunyi.”

Currently Selected:

IWUKA 25: KIM2

Highlight

Compare

Copy