IWUKA 27

Rasio

(Iwu 38:1-7)

1“Na iyo sungusia rasio lya ikidi lya mshita, wuleshe wolyo wochiwa mita tsiwi na robo na wulandari wolyo mita tsiwi na robo, rasiolyo lyechihiana wuleshe na wulandari; na ido huye nyi wochiwa mita imu na robo. 2Na iyo sungusia ndumba tsiina ipfo ndumbenyi ya rasiolyo, ndumbatso tsechiwa kindo kimu na rasiolyo, na iyo notsishikie na aṟeṟa. 3Nosungusie na shihia shake sheira mafu hake; na makumbi hake, na mboṟiko tsake, na uma tsake, na mariko hake; shihia sho shose nochishisungusia sha aṟeṟa. 4Na iyo nosungusie chekecheke ya aṟeṟa ya o rasionyi; numa nowike pete tsiina tsa aṟeṟa kiidi kya ndumba tsiina tsa chekecheke yo. 5Na iyo wika cheke chekeyo wanda ya kioṟiho kitengetie rasiolyo kya wanda kundu cheke cheke yo ishikie makidi hawi ha rasiolyo. 6Na iyo sungusia mashidi kipfa kya rasio, mashidi ha mshita nohashikie na aṟeṟa. 7Na mashidiho nohawike kiidi kya pete, na mashidiho hechikaa njora tsiwi tsa rasio; kiheri keduo rasiolyo. 8Nosungusie ya mbau, tsiwode mwaanya kiidi kyatso; chandu kuleloṟo kulya fumvuhu, nyi wudo ochiisungusia.

Oṟiho lo ihema lyekoyanyia

(Iwu 38:9-20)

9“Na iyo sungusia oṟiho lo handu halya hekoyana, ora lo nuka woambuya kya nuka kochiwada chandaruo ya nguo ya kitanyi kicha injioke, na oṟiho lo wuleshe wolyo ora lumu wochiwa nyi mita 44; 10na ngo tsake tsechiwa ngo makumi hawi, na mrihio yake makumi hawi, na mrihio yake yechiwa ya aṟeṟa; kulabu tsa ngo tso na maṟoche hake nyi sha fesa. 11Nyi wudo na ora lo mtsudu, wuleshe wo chandaruo yo wochiwa nyi mita 44, na ngo tsake makumi hawi, na mrihio yake makumi hawi ya aṟeṟa, kulabu tsa ngotso na maṟoche hake shechiwa sha fesa. 12Ora lo kyukanyi, wulandari wo oṟiho lo lochiwada chandaruo ya mita 22; ngo tsake ikumi, na mrihio yake ikumi. 13Wulandari wo oṟiho lulya ora lo ngamenyi woambuya ora lo ngamenyi wochiwa nyi mita 22. 14Chandaruo ora lumu lo mongo lochiwada mita 6:5 wulandari woke; ngo tsake nyi tsiṟaṟu na mrihio iṟaṟu. 15Ora lo kawi na wudo chandaṟuo ya mita 6:5 ngo tsake tsiṟaṟu na mrihio yake iṟaṟu. 16Na ko mongo fulya kochiwadaho isulia mita 9 kechiwa kya nguo ya fana ya samawi, na fana ya buluu, na kimaande, na kitanyi kikioke, iṟunda lya moṟehaṟeha nguwo; ngo tsake tsechiwa tsiina, na mrihio yatso iina. 17Ngo tsose tsa oṟiholo tsitengetie njora tsose tsechiwada maṟoche ha fesa; kulabu tsake tsa fesa, na mrihio yake ya aṟeṟa. 18Wuleshe wo mfiṟiha fo wochiwa mita 44, na wulandari woke wochiwa mita 22 kose kose, na ido huye lyake nyi mita 2:25; iwe ya nguwo ya kitanyi kicha, na mrihio yake yechiwa ya aṟeṟa. 19Shihia shose sheṟundia handu hekoyanyia na sheiṟicha shasho shose na sha mfiṟihafo, shechiwa sha aṟeṟa.

Mafuda kipfa kya taa

(Wal 24:1-4)

20“Na iyo wawasa wana wa Waisraeli wakuendie mafuda ha mashidi ha mtsinefu mecha mapochepoche, haidimishe taa iake kiheri kyose. 21Kiidi kya ihema lilya lyesanzia, nja ya isulialyo, lii oshangunyi lo kiringishiokyo. Aroni na wana wake wechiiringa wokia kyukanyi tane ngamenyi oshangunyi lo Mndumii-Ruwa; kechiwa nyi iwawaso lya mlungana kiidi kya oshari lowo lose, kipfa kya wana wa Waisraeli.

Currently Selected:

IWUKA 27: KIM2

Highlight

Compare

Copy