IWUKA 28

Nguwo tsa wakohanyi

(Iwu 39:1-7)

1“Na iyo ende manomayo Aroni hafui na inyi, handu hamu na wana wake, kiidi kya wana wa Waisraeli kundu najiṟundie iṟunda lya wukohanyi. Aroni, na Nadabu, na Abihu, na Elieseri, na Itamari wana wa Aroni. 2Na iyo nochisungusia Aroni mano mayo maṟao maele kui kiṟumi na kui wucha. 3Na iyo nochiwia wandu wose wawode mrima fo osaṟe, njiwaichuṟie mumuyo fo osaṟe wasungusie Aroni maṟao kundu wamheṟemtse nanjiṟundie kiidi kya iṟunda lya wukohanyi. 4Na maṟao wechihasungusia nyiho iha; iṟao kya kipeeta, na naivera, na iṟikano, na kanzu ya wulole; na nguo yepfunga mdonyi (kilemba), na okowa; nawo wechisungusia manomayo Aroni, na wana wake maṟao maele kundu najiṟundie iṟunda lya wukohanyi. 5Nawo wechiira sahabu, na nguo ya fana ya buluu na ya fana ya sambarau, na ya fana ya kimaande, na nguwo ya kitani kicha.

Kikoti kya Mkohanyi

6“Nawo wasungusie naivera ya ndusu tsa sahabu, na tsa buluu na tsa sambarau na kimaande, na kitani kicha kikioke kui iṟunda lya wuaria. 7Yechiwada shitambaa shiwi sha masombenyi, shilunganyi kiidi kya mdo yasho iwi kundu iidime ilungo. 8Na okowa luluṟeheṟehe necha fui huyake, kundu fupfungio nafo; fochiwa fo iṟunda cha lilya lya naivera iya, ya shindo shilya shilya; sha ndusu tsa sahabu, na tsa fana ya buluu, na ya sambarau, na kimaande, na kitani kicha kikioke. 9Na iyo nochiira shindo sha wuhuru shiwi sha shohamu, ya fana ya kimaṟamaṟa, na iyo nochiṟehia huyakyo marina ha wana wa Waisraeli; 10marina hawo haṟandaṟu huya kindo kya wuhuru kimu, na marina haṟandaṟu hatsuhaaho huya kindo kya wuhuru kilya kya kawi, kui wuhendeli chandu walefeo. 11Kui iṟunda lya mndu moṟeha maho hai chandu mhuri yekeṟeho, nochiṟeha shindo sha wuhuru sho shiwi, chandu marina ha wana wa Waisraeli hai, na iyo noshiwike kiidi kya shindo shesuṟuma shii sha sahabu. 12Na iyo nochiwika shindo sha wuhuru sho shiwi huya shitambaa shilya sha makosohu sha naiverayo, shiwe shindo sha wuhuru sha ngumbuo kipfa kya wana wa Waisraeli; na Aroni nechiduo marina hawo oshangunyi lo Mndumii-Ruwa, huya makoso hake hawi kundu kiwe ngumbuo. 13Na iyo sungusia shindo shehekia shiwi sha sahabu, 14na mshe iwi ya sahabu njicha; nochiisungusia iwe cha kihowo, kikioke; na iyo nowike mshe iya injioke kiidi kya shindo shehekia.”

Kikuchu kya kipeeta kyeloṟa mdumbuye ya Ruwa

(Iwu 39:8-21)

15“Na iyo nochisungusia iṟao kya mndumbuye kya kipeeta, iṟunda lya mwaria; nochikisungusia iitumana na iṟundalyo lya naivera; lya ndusu tsa sahabu; na tsa fana ya buluu, na tsa fana ya usuṟungi, na kimaande, na kitani kicha kikioke, nyi wudo ochikisungusia. 16Kechihiana kose kose, na kiwe kelema makamba hawi, wuleshe woke wochiwa sentimita 22, na wulandari woke sentimita 22. 17Na iyo noichuṟe mfuko fo shindo sha wuhuru, njotasa tsiina tsa shindo sha wuhuru; otasa lumu nyi akiki, na yakuti ya fana ya opuko, na baharamani, ishi shechiwa otasa lo kuwoka; 18na otasa lo kawi lochiwa zumaridi, na yakuti ya buluu, na almasi; 19na otasa lo kaṟaṟu lochiwa hiakintho, na akiki ya kimaande, na amethisto; 20na otasa lo kaana lochiwa nyi zabajaradi, na shohamu, na yaspi; shindo sha wuhurushi shechiwanzio kiidi kya sahabu shiichuṟo handu hasho. 21Na shindo sha wuhurushi shechiwa cha marina halya ha wana wa Waisraeli, ikumi na shiwi, chandu marina halya hawo hai; ofano loṟeha kui otisiṟo orio kimu chandu rina lyake lii, shechiwa sha mbaṟi tso ikumi na tsiwi.

22“Na iyo wika mshe ii cha kihowo kiidi kya iṟao lilya lya kipeeta, ya iṟunda lyeoka, ya sahabu njicha. 23Nowike pete tsiwi tsa sahabu alya iṟaonyi lya kipeeta, na iwika petetso tsiwi ndumbenyi tsiwi tsa iṟao lyo lya kipeeta. 24Nomase mshe iya iwi ya sahabu injioke kiidi kya pete tsilya tsiwi tsii ndumbenyi tsa iṟao lilya ya kipeeta. 25Na mdo iya ingi ya mshe iya iwi injioke noiwike kiidi kya shindo shilya shiwi sheichuṟa na ishiwika shitambaenyi sha makosohu sha naivera ora lusonguo. 26Na iyo nochisungusia pete tsiwi tsa sahabu, notsiwike ndumbenyi tsiwi tsa iṟao kya kipeeta, ipfo otiṟimonyi loke, lui ora lo kyamba lo naivera. 27Sungusia pete tsiwi tsa sahabu, na itsiwika kiidi kya shitambaa shilya shiwi sha makoso sha naivera wanda yake, ora lusonguo, kufui na kipfungo kyake, huya mkandafo fo naivera fumsuke ko wuaria. 28Nawo wechiwanzia petetso kulya kitambaaenyi kiidi kya pete tsa naivera kui mkanda fo fana ya buluu, kundu kikae alya huya mkanda fulya fo naivera fumsuke kui wuaria, kundu iṟao kya kipeeta kilalekane na naivera. 29Na Aroni nechiduo marina ha wana wa Waisraeli kulya iṟaonyi lya kipeeta lya mdumbuye huya mrima foke, ili echiida na handu haele, kiwe ngumbuo oshangunyi lo Mndumii-Ruwa kiheri kyose. 30 Na iyo nowike Urimu na Thumimutso ipfo iṟaonyi lya kipeeta lya mdumbuye; natso tsechikaa huya mrima fo Aroni, ili echiida na mba oshangunyi lo Mndumii-Ruwa; nao Aroni nechiduo mdumbuye ya wanawo wa Waisraeli huya mrima foke oshangunyi lo Mndumii-Ruwa kiheri kyose.”

Maṟao hengi ha wukohanyi

(Iwu 39:22-31)

31“Na iyo sungusia iṟikanolyo lya naivera lya fana ya buluu lyose. 32Nalyo lyechiwada kiṟoṟi o makidi hawi handu heitsa mdo; lyechiwada mkanda fumwokeoke fuṟingichie kiṟoṟi kyo, ofano lo kiṟoṟi kii kanzunyi ya menya, kundu lilaranduke. 33Na ipfo otiṟimonyi loyo nochiwikapfo makomamanga ha fana ya buluu, na ha fana ya usurungi, na ha fana ya kimaande itengetie otiṟimo loyo kose kose; na shicheheṟe sha sahabu makidi hawi ha makomamanga ho njora tsose; 34kicheheṟe kya sahabu na komamanga, kicheheṟe kya sahabu na komamanga otirimonyi lo iṟikano itengeta njora tsose. 35Nalyo lyechiwa lya Aroni kechiṟunda; na ṟu lya shicheheṟe sho lyechiichuo ili echiiida na mba ya handu haele oshangunyi lo Mndumii-Ruwa, na ili echiida na nja, ke nalapfe. 36Na iyo sungusia ipalu lya sahabu njicha na itorongocha huyalyo, ofano lo mtorongochie fo mhuri, MWELE KO Mndumii-Ruwa. 37Na iyo nowike ipalulyo mkandenyi fo fana ya buluu, nalyo lyechiwiko kiidi kya kilemba; lyikae ora lo mbele lo kilembakyo. 38Nalyo lyechiwa kyamunyi kya Aroni, na Aroni nechiduo wuwicho wo shindo shilya shiele, shechiheṟemtso nyi wanawo wa Waisraeli kiidi kya shisumbo shawo shose shele, nalyo lyechikaa kyamunyi kyake mkonu yose, kundu shiidikio oshangunyi lo Mndumii-Ruwa. 39Na kanzu yo nochiipfuma ya kitani kicha ya iṟunda lyeṟehaṟeha, nosungusie na kilemba kya nguwo ya kitani kicha, na iyo nosungusie mkanda fo iṟunda lya mndu moṟehaṟeha.”

Nguwo tsa wakohanyi wengi

(Iwu 39:27-29)

40“Numa nosungusie kanzu kipfa kya wana wa Aroni, na iyo nowasungusie na mkanda ifoi, wasungusie na kofia tsa kiṟumi na wucha. 41Noṟike odoo Aroni na wana wo wake maṟaoho; nowashie mafuda, na iwawika kiidi kya iṟundalyi liele, na iwaheremtsa, wawuteho injiṟundia inyi iṟundenyi lya wukohanyi. 42Na iyo nowasungusie suruwale tsa nguwo ya kitani, kundu washikie kitaṟe kya mbihuyo yawo; suruwaletso tsiwokie kitsinyi tane tsashika huya ndi; 43na Aroni na wana wake wechitsiṟaa, ili wechiida na ihemenyi lyesanzia ang'u ili wechicha na kufui na rasionyi injiṟundia kiidi kya handu haele, walashike ikudika wunyamari, wapfe; ili lyechiwa iwawaso lya mlungana koke o, na ko kishari kyake.”

Currently Selected:

IWUKA 28: KIM2

Highlight

Copy

Compare