IWUKA 29

Ishimbuo wakohanyi

(Wal 8:1-36)

1Na iyo wawutie mbonyi tsi, iwaheṟemtsa, waidime injiṟundia inyi kunu iṟundenyi lya wukohanyi; ira ihache limu lya ipung'a, na masuwa hawi halawode kifaṟe, 2na mkate fulamtarang'ashe na maandasi halamawike mtarang'ao hamawunde wunde na mafuda, na keki tsilantarang'ashe tsinjiwike mafuda; nochitsisungusia tsa mso mcha mmamiri fo Ngano. 3Na iyo noshiwike shose kikapunyi, noshiende kikapunyi, handu hamu na mmbeyo, na masuwaho hawi. 4Numa noende Aroni na wana wake mṟasa mongo fo ihema lyekusanzia, nowasanje na mṟinga. 5Numa ira maṟao ho noṟike Aroni; kanzu iya, na iṟikano lya naivera, na nguwo ya kyamba, na kiṟao kya kipeeta, na impfunga na mkanda fo fo naivera fumsungusie ko wuaria; 6na iyo nomṟike kilemba kilya mdonyi, na oṟo iya njiele nochiiwika kiidi kya kilemba kilya. 7Nlyondi ochimshimbuo ko imletsia mafuda mdonyi. 8Numa noṟike wana wa Aroni kanzu. 9Na mboṟohondo, shisha, numa nowashimbuo, kipfa wo na oshari lowo wechiwa wakohanyi mlungana. 10Numa nochiende ipung'alyo na nja ya ihema lyekusanzia; na Aroni na wana wake wechihekia mawoko hawo huya mdo folyo. 11Kiidima noshinje ipung'alyo oshangunyi lo Mndumii-Ruwa mongo fo ihema lyekusanzia. 12Numa ira samu njiangu ya mmbe, noiwike ndumbenyi ya rasionyi na kimnyo kyapfo; na iletsia samu yose shia rasionyi. 13Numa noire mafuda hose ha onga haoṟowie ndeu, na kitambi kikeri dimenyi, na shiho tsiwi, na mafuda hakeri shihonyi nohakoṟie huya rasio hasenekie. 14Indi nyama ya mmbeyo na njonyi yake, na mṟa foke, nochishikoṟa na modo nja ya kambilyo; nyi mwano kipfa kya wunyamaṟi. 15Irase isuwalyo limu; na Aroni na wana wake wahekie mawoko hawo huya mdo fo isuwa. 16Numa noshinje isuwa, noire samu yalyo noinanatsie rasionyi noitengetie mbai-mbai. 17Numa nodumbuo-dumbuo isuwalyo njohawi tsalyo, na isanja maulaho halyo na madende halyo, na ihawika hamu na njohawi tsalyo, na mdo folyo. 18 Na iyo nokoṟe ichondilyo lyose huya rasio lyisenekie; nyi kidaso kemaya modonyi kipfa kya Mndumii-Ruwa; nyi opfaamo lucha, kidaso kileinengo Mndumii-Ruwa kui njia ya modo. 19Numa noire isuwa lyo lya kawi; Aroni na wana wake wahekie mawoko hawo huya mdo fo ichondilyo. 20Kiidima noshinje isuwa lyo, noire samu yalyo, noiwike huya kudu ko Aroni ko ora lo kulyo, na huya madu ha kulyo ha wana wake, na kiidi kya shimnyo shinganyi sha mawoko hawo ha kulyo, na kiidi kya shimnyo shinganyi sha madende hawo ha kulyo, na inanatsia samuyo itengeta mbai na mbai ya rasionyi. 21Numa ira samuyo ii rasionyi, na mafudaho heshia, noletsie Aroni, huya maṟao hake, na wana wake, na maṟao hawo daa, hamu nao; nao nechiheṟemka, na maṟao hake na wana wake, na maṟao ha wana wake, hamu nao. 22Irase mafuda ha isuwalyo, na mṟehese folyo fo mafuda, na onga lulya lokeshikia ndeu, na kitambi kii dimenyi na shiho tsiwi, na mafuda hai kiidi kya shihotso, na owaa lo kulyo; kipfa nyi ichondi sa lyechiwiko lya iṟunda liele; 23noire na mkate fumu fo mso, na mkate fumu fumteseheṟe na mafuda, na keki imu kiidi kya kikapu kilya kya mkate ilantarang'ashe, kikiwike oshangunyi lo Mndumii-Ruwa; 24Na iyo nochishiwika ishi shose mawokonyi ha wana wake na iyo nochishikucha kucha shiwe mwano fokuchakucha oshangunyi lo Mndumii-Ruwa. 25Numa noire shindoshi mawokonyi hawo, noshirumatse rasionyi, huya kidaso kilya kemaya modonyi, shiwe opfamo lucha oshangunyi lo Mndumii-Ruwa; nyi kidaso kikiseheṟe ko Mndumii-Ruwa, kui njia ya modo. 26Numa noire kidari kya isuwalyo lyewika Aroni ko iṟunda liele, na ikikucha kucha kiwe kidaso kekucha kucha oshangunyi lo Mndumii-Ruwa; nakyo kechiwa ohawi lopfo. 27Na iyo kiheṟemtse kidarikyo kya kidaso kekucha kucha, na owaa lulya lo kidaso keiria, lukuchekuche, na luluirie huye, sha isuwa lilya lya iṟunda liele, ilyo liweliteseherie Aroni, na ilyo liwei kipfa kya wana wake, 28nasho shechiwa sha Aroni na wana wake kelya kyawo kiwawaṟi mkonu yose kiwukie ko wana wa Waisraeli; kipfa nyi kidaso keiria huye, nakyo kechiwa nyi kidaso keiria kiwukie ko wanawo wa Waisraeli; kiidi kya njodambiko tsawo na shidaso sha ofoṟo, nyi kidaso kyawo keiria kipfa kya Mndumii-Ruwa.

29Na maṟao ho maele ha Aroni hechiwa ha wana wake ili numa, wahaṟae ili wechishio mafuda, na wechiwiko kiṟundionyi kiele. 30Manacho echiwa mkohanyi handu hake nechiharaa mkonu mfungade, ili echiida na mba ya ihema lyekusanzia, kundu naṟunde kiidi kya handu haele. 31Na iyo ira isuwalyo lyiwei lyewika kiṟundionyi kiele, nokoṟe nyama yalyo handu haele. 32Aroni na wana wake walye nyamayo ya isuwa, na mkate ikeri kulya kikapunyi, oo osehu lo mongo fo ihema lyekusanzia. 33Nawo wechilya shindo shilya shilewiko sha kisanza, kundu wawiko kiṟundionyi kiele na iwaheṟemtsa; kya indi mhenu nalalye, kyamba, nyi shindo shiele. 34Na kokoya kindokyo kyose kya nyamayo, ii yewika iṟunda liele, ang'u ikyo kyose kya mkateyo kikatsuhaa tane ngamenyi, nlyondi ochishikoṟa modonyi shindosho shiletsuhaa; shechiliopfo, kyamba, nyi shindo shiele. 35Nyi wudo ochiwutia Aroni na wana wake, kisumhanyi na isho shose njilekututuma; nochiwawika kiṟundionyi kiele mkonu mfungade. 36Orio mkonu nolekia mmbe ya kidaso kya wunyamaṟi kipfa kya kisanza; na iyo nochisanja rasio lyo oo handu ochiwutia kisanza kipfa kya rasio; na iyo noliletsie mafuda, kundu nolyiheṟemtse. 37Na iyo nochiwika kisanza kipfa kya rasio lyo mkonu mfungade, na ilyiheṟemtsa; nlyondi rasio lyechiwa liele mnu nakamu; orio kindo kechipaaya rasio kechiwa kiele.

Mwano ya orio mkonu

(Mta 28:1-8)

38Kyasia, shidaso ochishiwuta o huya rasionyi nyi ishi; machondi matutu ha maka fumu hawi orio mkonu kiheri kyose. 39Ichondi limu nochilyishinja ngamenyi; na ichondi lya kawi nochilyishinja kyukanyi. 40Na handu hamu na ichondi limu nochiwuta mboṟiko tsiṟaṟu tsa mso mcha fulonganyi na mafuda hamahuo, cha mboṟiko imu na robo; na mvinyo mboṟiko imu na robo, kiwe mwano fo kindo kenyo. 41Na ichondilyo lya kawi nochishinja kiheri kya kyukanyi, nowewuta kudo cha kidaso kilya kya mso kya ngamenyi, na cha kidaso kilya kya kindo kenyo, kiwe opfamo lucha, nyi odambiko loinenga Mndumii-Ruwa kui njia ya modo. 42Kechiwa nyi kidaso kemaya modonyi mlungana ko orio wufee wonu wose osehu lo ihema lilya lyekusanzia oshangunyi lo Mndumii-Ruwa ili njechikoyana nanyo, kundu njidedeho na iyo.

43Na inyi njechikoyanaho na wana wa Waisraeli, na ihemalyo lyechitano liele, nyi kiṟumi kyako. 44Na inyi njechiheṟemtsa ihemalyo lyekusanzia, na rasiolyo; Aroni daa na wana wake njechiwaheṟemtsa, kundu wanjiṟundie iṟundenyi lya wukohanyi. 45Na inyi njechikaa kiidi kya wana wa Waisraeli, na inyi njechiwa Ruwa owo. 46Nawo wechinjimanya ke inyi nyio Mndumii-Ruwa, Ruwa owo, njilewaende wawuke kulya orukenyi lo Misri, njiidime ikaa kiidi kyawo; inyi nyi Mndumii-Ruwa, Ruwa owo.

Currently Selected:

IWUKA 29: KIM2

Highlight

Copy

Compare