IWUKA 30

Rasio lyepfamiṟa uvumba

(Iwu 37:25-28)

1Na iyo sungusia rasio handu hedutsia uvumba; nochiisungusia ya ikidi lya mshita 2wuleshe woyo wochiwa sentimita 45, na wulandari woyo wochiwa sentimita 45, yechihiana kose kose; wuleshe wodo huye sentimita 90; ndumba tsayo tsechiwa tsa kindo kimu. 3Na iyo noishikia na sahabu njicha o huyake, na mbarinyi tsayo mbai na mbai, na ndumba tsayo; na iyo noitengetie na sahabu. 4Numa noitsanyie pete tsiwi tsa sahabu, wanda ya mtsitsionyi foyo, na mbarinyi tsayo tsiwi, kiidi kya njora tsayo tsiwi nochitsisungusia; natso tsiwe handu heitsa mashidi hekudika. 5Na mashidiho hechiwa ha mshita, na iishikia na sahabu njicha. 6Na iyo nochiwika rasio lyo likae kusonguo ko isulia lilya lilimase oshangunyi lo isanduku lyo lya mkundana, hondu njechideda na iyo. 7Aroni nechidutsa uvumba wo opfaamo huyake; orio mkonu ngamenyi ili echisungusia taa tsilya, nechiwudutsa. 8Aroni ili echiatsa taa tsilya kiheri kya kyukanyi, nechidutsa, wuwe uvumba wo kiheri kyose oshangunyi lo Mndumii kiidi kya shishari shanu shose. 9Mochidutsiaho uvumba wuhenupfo, manya kidaso kekoṟapfo, manya kidaso kya msopfo, manya mochiletsiaho kidaso kya kindo kenyopfo. 10Nao Aroni nechiwika kisanza huya ndumba tsakyo ili limu ko maka; kui samu ya kidaso kilya kya wunyamari yewika kisanza, limu orio maka nechiwika kisanza, kiidi kya shishari shanu shose; nyi wuele mnu ko Mndumii-Ruwa.

Okamba lo ihema liele

11Mndumii-Ruwa kadeda na Mose, na immbia, 12“llyi ochiitala wana wa Waisraeli, chandu itala lyawo lyechiwa, nlyondi orio mndu echinjitaa wuhuru ko mrima foke, kundu njiwaringe na ndaare tsose. 13 Na kindo wechilekia nyi iki; orio mndu echiida ko walya wai waitale, nechilekia shekeli , chandu kiwaṟi handu haele; mwano fo Mndumii-Ruwa. 14Orio mndu amuitale, wokia msa awode maka makumi hawi, ang'u ngoseṟa, nechilekia mwanofo fo Mndumii-Ruwa. 15Wasuṟi wechiende ngoseṟapfo, manya wakiwa wechiende kilashikiepfo, kya kiengakyo kya shekeli, ili wechilekia mwanofo fo Mndumii-Ruwa, kiheri wechiwika kisanza kipfa kya mrima yanu. 16Na iyo nochiambia fesatso tsa kisanza mawokonyi ha wana wa Waisraeli na itsisuṟuma tsa wuṟundi wo ihema lyekoyana kundu tsiwe ngumbuo ya wana wa Waisraeli oshangunyi lo Mndumii-Ruwa, kundu wawike kisanza kipfa kya mrima yanu.”

Mboṟiko ing'anyi ya aṟeṟa

17Mndumii-Ruwa kadeda na Mose, kambia, 18 “Sungusia mboṟiko ya aṟeṟa na mrihiyo folyo fo ilama, lyesambia; na iyo nochiliwika makidi hawi ha ihema lyesanzia na rasio, na iyo nowikepfo mṟinga. 19Na Aroni na wana wake wechisanjiapfo mawoko hawo na madende hawo; 20kiheri keida na mba ya ihema lyekusanzia; wechisamba mṟingenyi kundu walapfe; ang'u ili wechitikiria rasionyi kundu waṟunde, iongoṟia Mndumii-Ruwa kidaso kemaya modonyi; 21Nahong'u wechisanja mawoko hawo na madende hawo walachepfa; na idedolyi lyechiwa iwawaso kowo mlungana, koke o na ko oshari loke kiidi kya shishari shawo shose.”

Mafuda heheṟemtsa

22 Nahong'u Mndumii-Ruwa kadeda na Mose, kambia, 23“Ira mafuda hepfaama mecha, ha manemane mawishi lita 6, na madalasini fuwode opfamo lucha kienga kya ikyo lita 3, na kane kilo 3, 24na kida kilo 3, na lita 4 tsa mafuda ha msinepfu. 25Sungusia mafuda maele heshimbuo hamasanze cha mafuda ha mpfaamo mcha. 26Na iyo nochishia ihemalyo lyekusanza mafudaho na isanduku lyo lya kiṟingishio. 27Na mesayo, na shihia shayo shose, na kimnaṟa kilya kya taa, na shihia shakyo, na rasio lilya lyedutsia uvumba, 28na rasio lya kidaso kemaya modonyi, handu hamu na shihia shasho shose, na mboṟikoyo na mrihio folyo. 29Na iyo nochiheṟemtsa shindosho kundu shiwe shiele mnu; na orio kindo kechishipaaya shindo shi kechiwa kiele. 30Na iyo nochishimbuo Aroni na wana wake, na iwaheṟemtsa, kundu wanjiṟundie iṟunda lya ukohanyi. 31Na iyo nochideda na wana wa Waisraeli nowawie, Iha hechiwa nyi mafuda maele heshimbuo kipfa kyako inyi kiidi kya shishari shanu shose. 32Hechiletsio mbihunyi fo mndupfo, manya mulasungusie hengi ofano lo ihapfo chandu hai masungusie na shindo shakepfo; nyi hamaele na konu nyo hechiwa maele. 33Mnducho oose echilongalonga mafuda ofano lo iha, ang'u mnducho oose echishimbuo mndu mhenu na mafudaha, mnducho nechiletsano kuleshe na wandu wake.”

Mpfaamo fo uvumba

34Mndumii-Ruwa kawia Mose, “Ira mafuda mecha hepfaama, natafi, na shekeleti, na kelbena, shiungo sha mafuda mecha hepfaama handu hamu na udi wucha; shindoshi shose shiwa sha kiheo kimu; 35Na iyo nochisungusia uvumba wo shindoshi, mafuda hepfaama hamasungusie nyi mndu mwaria mosungusia mafuda hepfaama necha, mecha, maele, 36na iyo maataho nochihapochapocha necha, nohawike osehu loṟingishia ipfo ihemenyi lyekusanzia, ili njechikoyana na iyo, naho hechiwa maele mnu konu. 37Na iyo ulasungusie uvumba wufananyi na iwo pfo, kipfa iwo wui wuele ko Mndumii-Ruwa. 38Mnducho oose echisungusia uvumba ofano lo iwo, kundu nawupfamire, mnducho nechifunyio kuleshe na wandu wake.”

Currently Selected:

IWUKA 30: KIM2

Highlight

Copy

Compare