IWUKA 31
31
Mndumii asambuṟa Bezaleli na Oholiabu
(Iwu 35:30–36:1)
1Mndumii-Ruwa kadeda na Mose, kahamba, 2“Ambuya, ngamlaha kui rina lyake Bezaleli mana o Uri, mana o Huri o mbaṟinyi ya Yuda; 3na inyi ngamwichuṟa mumuyo fo Ruwa, kiidi kya osaṟe, na wuṟango, na wumanyi, na wuaria wo orio mbaṟi ya iṟunda, 4kundu nawoke maṟunda ha wuaria, nawe mpfuru o sahabu na o fesa, na o aṟeṟa, 5na idumbuo maho ha shindo sha wuhuru hewika handu, na iṟeha, mashidi, na iṟunda lya wuaria wa mbaṟi yose. 6Ambuyase, ngamsambuṟa, Oholiabu nakae na iyo, mana o Ahsamaki, o mbaṟinyi ya Dani; na inyi ngawika osaṟe mrimenyi ya wose wawode mrima fo wuṟango, kundu waidime iṟunda isho shose njilekuwawasa; 7ihema lyekusanzia na isanduku ya mṟingishie, na loṟika lo osaṟio lui huyalyo, na shihia shose sha Ihema; 8na mesa, na shihia shayo, na kimnaṟa kicha kya taa hamu na shihia shakyo shose, na rasio lyedutsia uvumba; 9na rasio lya kidaso kemaya modonyi na shihia shalyo shose, na biṟika na mrihiyo folyo; 10na maṟao ha wana wake, kundu wanjiṟundie ipfo iṟundenyi lya ukohanyi, 11na mafuda heshia, na uvumba wo opfaamo lucha kipfa kya handu haele, chandu njilekuwawasia shose nyi wudo nawo wechiwuta.”
Mawawaso ha Sabato
12Mndumii-Ruwa kadeda na Mose kambia, 13“Kyasia, iyo deda na wana wa Waisraeli; nowawie, nkya lohi mochiringa sabato tsako, kyamba nyi ofano kiidi kyako inyi nanyo kiidi kya shishari shanu shose; kundu mukuwutieho imanya ke inyi nyi Mndumii-Ruwa njekemuheṟemtsa nyo. 14Kyasia, mochiringa mkonu fo mwele; kipfa fui mwele konu; orio mndu echifuteṟefutsa nkya lohi kyake nechiwoho, kipfa orio mndu echiṟunda iṟunda mkonufo, mrima foke fochikumbo kuleshe na wandu wake. 15 Iṟunda lyechiṟundo mkonu iṟandaṟu, kyaindi mkonu fo mfungade nyi mkonu mwele fosia moo nakamu, mwele ko Mndumii-Ruwa; orio mndu echiṟunda iṟunda lyo lyose mkonu fo mwele, kui kiilohi nechiwoho. 16Wandu wa Israeli wechiindia mnu mkonu fo Sabato kipfa mkonufo fui kichano kya mkundana. 17 Nyi kichano kiidi kyako inyi na wana wa Waisraeli mlungana; kyamba mkonu iṟandaṟu Mndumii-Ruwa nalewumba ruwehu na oruka, kasia moo mkonu fo mfungade na ikeseka.”
Maṟaṟo hawi ha maho nyi kiṟingishio kya mkundana
18Nahong'u Mndumii-Ruwa kekimarisa ideda na Mose kulya fumvunyi lya Sinai, kamnengia maṟaṟo hawi ha maho hamaṟehie mawawaso ko owoko loke.
Currently Selected:
IWUKA 31: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
