IWUKA 35

Wuwawaso Wo Sabato

1Mose kasanza chila yose ya wana wa Waisrael na iwawia, Madedo Mndumii-Ruwa alemupfunda nyi iha, ke muhawute. 2 Ṟundenyi maṟunda mkonu iṟandaṟu, kyaindi mkonu fo mfungade fochiwa mwele konu; mkonu fo sabato fosia moo nakamu ko Mndumii-Ruwa; mnducho oose echiṟunda kiṟundiokyo kyose mkonufo nechiwoho. 3Mochiatsa modo ipfo kanyi konu mkonu fo sabatopfo.

Mwano ya Hema liele

(Iwu 25:1-9)

4Numa Mose kadeda na chila yose ya wana wa Waisraeli, kawawia, “Idedolyi nlyo Mndumii-Ruwa alelyiwawasia kechihamba, 5Inengyenyi kiidi kyanu shiano ko Mndumii-Ruwa; mnducho oose awode mrima fo ikunda, naende shiano; sahabu na fesa na aṟeṟa; 6na ndusu tsa fana ya mapuchi, na tsa fana ya usuṟungi, na tsa fana ya kimaande na kitani kicha, na singa tsa mburu; 7na njonyi tsa masuwa tsinjishie rangi ya kimaande, na njonyi tsa (pomboo) indo lyekekaa mṟingenyi, na mbau tsa mshita; 8na mafuda ha taayo, na shindo sha opfaamo ko mafudaho heshia, na ko uvumba wo wucha; 9na shindo sha wuhuru sha shohamu, na shindo sha wuhuru shewika kiidi kya naivera, na iṟaonyi kya kipeeta.”

Shihia sha hema lyekoyana na Mndumii

(Iwu 39:32-43)

10“Na orio mndu kiidi kyanu awode mrima fo osaṟe nache, nawute isho shose Mndumii-Ruwa awawasia; 11handuho hekaa na ihema lyake, na kipfinyiko kyake, na shipfunga shake, na mbau tsake, na mataruma hake na ngo tsake, na mrihiyo yake; 12isandukulyo na mashidi halyo, na loṟikalo lo osaṟio, na isulia lilya lyeshikia; 13na mesayo, na shidi shayo, na shihia shayo shose, na mkateyo yeṟihichia; 14na kimnaṟakyo kya taa kelimikia na shihia shakyo, na taa tsakyo, na mafudaho kipfa kya ngeela; 15na rasiolyo lyedutsia uvumba, na shidi shalyo, na mafudaho heshia, na uvumbawo wucha, na kindokyo keṟihika mongo, mongonyi fo handu hekaa, 16na rasio lya kidaso kemaya modonyi, handu hamu na chekecheke yake ya aṟeṟa, na mashidi hakyo, na shihia shakyo shose, na ibiṟikalyo na mrihiyo folyo; 17na mawandaho ha nguo tsa oṟiho, na shingo shake, na mrihio foke, na isulia lya imongo lya oṟiho; 18na njomambo tsa handu halya hekaa, na njomambo tsa oṟiho na shihowo shake; 19na maṟao ha, mapfume kui wulole, kipfa kya iṟunda kiidi kya handu haele, maṟaoho maele ha mkohanyi Aroni na maṟao ha wana wake; wechiṟunda iṟunda lya ukohanyi.”

Mwano fo ihemenyi lyekoyana

20Nahong'u chila yose ya wana wa Waisraeli wakakure alya oshangunyi lo Mose. 21Wakacha orio mndu chandu mrimafo foke fomduma, na orio mndu chandu ngo yake yamnenga ikunda, nawo wakaende mwano yeinenga Mndumii-Ruwa, kipfa kya ihema lilya lyekusanzia, na kya wuṟundi woke na kipfa kya maṟao halya maele. 22Nawo wakacha, wasoṟo na waka wose wawode mrima fo ikunda, wakaende shipuli, na pete-tsa mbuonyi na pete tsa mhuri, na mleta na shihia shose sha sahabu; orio mndu alelekia kiinengo kya sahabu kainenga Mndumii-Ruwa. 23Kingise orio mndu alekooya awode ndusu tsa fana ya mapuchi, na ndusu tsa fana ya usuṟungi, na kimaande, na kitani kicha, na singa tsa mburu, na njonyi tsa masuwa tsinjishie fana ya kimande, na njonyi mando hekekaa mṟingenyi, wakashiende. 24Orio mndu alelekia wuleki wo fesa, na wo aṟeṟa, kaende mwano ko Mndumii-Ruwa; na orio mndu alewona koke ikidi lya mshita lya iṟunda lyo lyose kalyiende. 25Na waka wose wawewode mrima ya osaṟe, waleoka ko mawoko hawo, nawo wakaende isho waweokie, nguo tsa fana ya mapuchi, na tsa fana ya usuṟungi, na ndusu tso tsa kimaande, na nguoyo ya kitani kicha. 26Na waka wose sa mrima yawo ilewaitika kiidi kya wuṟango wakaoka singatso tsa mburu. 27Na wanenewo wakaende shindo sha wuhuru sho sha shohamu na shindo sha wuhuru shewika kiidi kya naivera, na ipfo iṟaonyi kya kipeeta, 28na shindo sha opfaamo na mafuda; ha taayo, na ko mafudaho heshia, na ko uvumbawo wucha. 29Wana wa Waisraeli wakaende shiano sheinenga Mndumii-Ruwa kui mrima fo ikunda; wose womi na waka, sa mrima yawo ilewaitika wakunde iende kipfa kya iṟundalyo Mndumii-Ruwa alewawasa lyiṟundo kui owoko lo Mose.

Waaria wewika ihema lyekoyana

(Iwu 31:1-11)

30Lyefurumia Mose kawia wana wa Waisraeli, “Ambuyenyi, Mndumii-Ruwa amemlaha kui rina lyake Bezaleli mana o Uri, mana o Huri, o kisharinyi kya Yuda; 31nao kamwichuṟa mumuyo fo Ruwa kui osaare, na wuṟango, na wumanyi, na iṟunda lya wuaria wo orio mbaṟi; 32na iwooka imanya maṟunda ha wuṟango, na iṟunda maṟunda na sahabu, na fesa, na aṟeṟa, 33na idumbuo shindo sha wuhuru shewikia na iṟeha mashidi, narunde kiidi kya marunda ha wuaria wo orio mbaṟi. 34Nao nalemmbikia mrimenyi foke kundu naidime ilosha, o, na Oholiabu mana o Ahisamaki o kisharinyi kya Dani. 35Naleichuṟa wanduwo wurango wo mrimenyi, kundu waṟunde orio mbaṟi ya iṟunda, ya moṟeha maho, na maṟunda ha wuṟango, na ya moṟehaṟeha nguo, kiidi kya ndusu tsa fana ya mapuchi, na tsa fana ya usuṟungi, na ya kimaande, na kitani kicha, na ya mopfuma nguo; ya iwo wekeṟunda maṟunda ho hose, na ya mawooka imanya maṟunda ha wuṟango.”

Currently Selected:

IWUKA 35: KIM2

Highlight

Copy

Compare