IWUKA 36

1Nahong'u Bezaleli na Oholiabu na wandu wengi wose wawode wuaria wawainenge nyi Ruwa wosungusia shindo sha handu haele heindia, wechiṟunda chandu Mndumii-Ruwa alewawasa.

Wandu waende mwaano ifoi

2Nahong'u Mose kalaha Bezaleli na Oholiabu na orio mndu awewode wuaria sa Mndumii-Ruwa alemsumba, na sa wawewwode macha herunda, kawawia wawoke iṟunda. 3Nawo wakaambia mawokonyi ha Mose mwaano yose, wana wa Waisraeli waweendie kipfa kya wuṟundiwo wo handu haele, kundu waṟundieho. Numa wakaende shiano orio mkonu ngamenyi kui mrima fo ikunda. 4Na wanduwo wose wawode wuṟango, waleṟundia handuho haele, wakaende orio mndu kuwuka kiṟundionyi kyake awekerunda; 5nawo wakadeda na Mose, wechimmbia, “Wandu waende shindo shifoi mnu ngoseṟa ya isho shishikie sha iṟunda Mndumii-Ruwa alewawasa lyiṟundo.” 6Kyasia, Mose kawika iwawaso, nawo wakakapa iranda kulya mfiṟihenyi kose, wehamba, Walaendese, mndu msoṟo manya mndu mka, kipfa kya wuleki wo handu haele.” Nahong'u wandu wakatirimisho walaendese. 7Kyamba shindo shilya wawewode shiwemeshika sheṟundia iṟundalyo lyose na mbuitsi.

Iwika ihema lyekoyanyia

(Iwu 26:1-37)

8Kyasia, orio mndu awewode wuaria kiidi kya iwo waleṟunda, kasungusia masulia ikumi ha handu halya hekaa; ha nguo ya kitani kicha kikioke na ndusu tsa fana ya mapuchi, na fana ya usuṟungi, na kimaande; handu hamu na makerubi, iṟunda lya wuaria wucha; nlyo alelyiṟunda. 9Wuleshe wo orio isulia nyi mita 12, na wulandari wo orio isulia nyi wuwei mita 2. Masulia hose hawehianyi. 10Nao kalunga masulia hatanu ilyi na ilyi; na masulia hengi hatanu kahalunga ilyi na ilyi. 11Numa kapfuma maṟoche ha fana ya mapuchi kiidi kya ndumba tsa isulia limu, kulya otiṟimonyi lo mtsitsionyi folyo; kawewika ado kiidi kya ndumba tsa isulia lyiwei ora lo kya nja mtsitsiony-fo kiungo kya kawi. 12Kapfuma maṟoche 50 kiidi kya isulia limu, na maṟoche 50, kiidi kya otiṟimo lo isulia lyiwei kilungionyi kya kawi; maṟocheho hakaambuyana ilyi na ilyi. 13Numa kawika shipfungo 50 sha sahabu, kalunganyitsa masuliaho ilyi na ilyi kui shipfungosho; na kudi handu halya hekaa hakawa kindo kimu. 14Numa kasungusia shipfinko sha singa tsa mburu tsa ihemalyo lyeshikia handuho hekaa; kasungusia masulia ikumi na limu. 15Wuleshe wo orio isulia wuwei mita 13, na wulandari wo orio isulia wuwei mita 2; masuliaho ikumi na limu hawehianyi. 16Nao kasanza masulia hatanu handu hamu kyanya kyaho, na masulia haṟandaṟu handu hamu kyanya kyaho. 17Numa kapfuma maṟoche 50 kiidi kya otiṟimo lo isulia lyii ora lo nja alya kilungionyi, nao kapfuma maṟoche 50 kiidi kya ndumba ya isulia lyiwei ora lo kya nja kilungionyi kya kawi. 18Numa kasungusia shipfungo 50 sha aṟeṟa nasanze ihema lilya lyiwe ihema limu. 19Numa kasungusia kipfinko kya njonyi tsa masuwa kya ihemalyo, tsinjishie fana ya kimaande, na huyakyo kasungusia kipfinko kya njonyi tsa pomboo.

Mṟeho fo ihema liele

(Iwu 26:15-30)

20Numa kasungusia mbau tsa ikidi lya mshitatsa handuho hekaa, tsinjihoṟotsu. 21Wuleshe wo orio mbau wuwei mita 4, na wulandari wo orio mbau wuwei sentimita 66. 22Orio mbau iwewode njolimi tsiwi, tsinjilunge handu hamu; nyi wudo aletsisungusia mbautso tsose tsa handu halya hekaa. 23Nao kasungusia mbao 20 tsa handuho hekaa woambuya ora lo nuka; 24na kasungusia mrihiyo ya fesa 40 ikae wanda ya mbautso makumi hawi mrihiyo iwi wanda ya mbau imu kui njolimi tso tsake tsiwi, na mrihiyo iwi wanda ya mbau ingi kui njolimi tsayo tsiwi. 25Na ko ora lo kawi lo handu hekaa ora lo mtsudu, kasungusia 20, 26na mrihiyo yatso ya fesa 40; mrihiyo iwi wanda ya mbau imu na mrihiyo iwi wanda ya mbau ingi. 27Na ora lo numa lo handuho hekaa kuambuya ora lo kyukanyi kasungusia mbau tsiṟandaṟu. 28Nao kasungusia mbau tsiwi tsa ndumbenyi tsa handu hekaa ora lo numa. 29Natso tsiwei mbau tsinjiwawe tsiwi tsa mbasa ora lo wanda, nyi wudo tsilewadana handu hamu tane kikoyo ikoya pete iya ya kuwoka; nyi wudo alesungusia tsose tsitsiwi kiidi kya ndumba tso tsi tsiwi. 30Ko ikyo tsiwei mbau nyanya, na mrihiyo yatso ya fesa, mrihiyo ikumi na iṟandaṟu, mrihiyo iwi ko orio mbao. 31Numa kasungusia mataṟuma ha mashidi ha mshita; hatanu ko mbau tsa ora lumu lo handu halya hekaa, 32na mataṟuma hatanu ko mba tsa ora lo kawi lo handu halya hekaa, na mataruma hatanu ko mbau tsa handu hekaa tsii ora lo numa woambuya ora lo kyukanyi. 33Nao kasungusia itaṟumalyo lya makidi hawi lyiide makidi hawi ha mbautso kuwuka oralu tane oralu. 34Nao kashikia mbautso na sahabu, kasungusia pete tsilya tsake tsa sahabu tsiwadane na mataṟuma ho, kashikia mataṟumaho ko sahabu.

Ora-lo kyamba lo ihema liele

(Iwu 26:31-37)

35Numa kasungusia isulialyo lya ndusu tsa fana ya mapuchi, na tsa fana ya usurungi, na ya kimaande na kitani kicha, tsinjioṟowie; kawika na makerubi iṟunda lya mwaria, nyi wudo alesungusia. 36Nao kipfa kyake kasungusia ngo tsiina tsa ikidi lya mshita, katsishikia na sahabu; na sasia tsatso tsiwei tsa sahabu; nao kasalaṟa mrihiyo yake iina ya fesa. 37Numa kasungusia isulia lyeshikya kipfa kya mongo fo ihema, lya nguo ya fana ya mapuchi, na ya usuṟungi, na ya kimaande na nguo ya kitani njicha injioṟowie, iṟunda lya mndu mowika mreho, 38na ngo tsake tsitanu handu hamu na sasia tsatso; na kashishikia mdo iya yake na shiungo shake ko sahabu; na mrihiyo yayo itanu iwei ya aṟeṟa.

Currently Selected:

IWUKA 36: KIM2

Highlight

Copy

Compare