IWUKA 37

Isungusia isanduku lya mkundana

(Iwu 25:10-22)

1Lyefurumia Bezaleli kasungusia isanduku lilya lya mashidi ha mshita wuleshe wolyo wuwei sentimita 110, na wulandari wolyo wuwei sentimita 66, na ido huye wolyo nyi liwei sentimita 66; 2kalyishikia na sahabu njicha, kya mba na kya nja, kalyiwikia na minga ya sahabu kalyitengetia njora tsose. 3Nao kasalaṟa pete tsiina tsa sahabu kipfa kyalyo, ipfo madendenyi halyo haana; pete tsiwi ora lolyo lumu na pete tsiwi ora lolyo lo kawi. 4Kasungusia na mashidi heliduo, ha mashidi ha mshita, kahashikia na sahabu. 5Nao kawika mashidiho kiidi kya pete tsilya tsiwei owarinyi lo isandukulyo, kundu wakudike naho isandukulyo. 6Numa kasungusia kitima kya osaṟio kya sahabu njicha; wuleshe wokyo nyi sentimita 110, na wulandari wokyo nyi wuwei sentimita 66. 7Numa kasungusia makerubi hawi ha sahabu; kahasungusia kui itsana, hakae mtsitsionyi iwi ya kitimakyo kya osaṟio; 8kerubi limu mtsitsiofu na kerubi limu mtsitiofu; nalesungusia makerubi ho hawi ha kindo kimu na kitima kya osaṟio mtsitsionyi fo makerubiho. 9Na makerubi ho hakahoruo makungo hawo huye, hakashikia kitima kyo kya osaṟio na makungo hawo, na shamu shawo shiweambuyanyi ilyi na ilyi; shamu sha makerubiwo shiweambuye kitimakyo kya osaṟio.

Meza ya mkate njiele

(Iwu 25:23-30)

10Numa kasungusia mezayo ya ikidi lya mshita; wuleshe woyo wuwei sentimita 88, na wulandari woyo wuwei sentimita 44, na wuleshe wo huye wuwei sentimita 66. 11Nao kaishikia na sahabu njicha, kasungusia mtsitsio fo sahabu kaitengetia njora tsose. 12Kaiṟingichia na kimbau kya milimita 75, njora tsose katengeshia kimbau kilya na wulole wo sahabu. 13Kyasia, kasungusia pete tsiina tsemasa, katsiwika madendenyi haana ha isanduku lilya. 14Pete tsilya tsiwei kufui na ndumba tsa isanduku lyo, kundu shikae handu heitsa shidi shilya sheiria mesa. 15Na kasungusia shidisho sheduo meza, sha mashidi ha mshita, kaishikia na sahabu, kundu waduo mezayo. 16Numa shihia shilya shiwei huya meza, shahani tsatso, na mdiko yayo, na mboṟiko tsayo, na makopo hayo heletsia mvinyo fo shidaso, kashisungusia sha sahabu njicha.

Isungusia kinaṟa ya taa

(Iwu 25:31-40)

17Numa kasungusia kinara kilya kya taa kya sahabu njicha; kasungusia kinara kilya kya taa kya iṟunda lyetsana, mrihiyo fokyo, na kidi kyake; shikombe shakyo, na shiwaṟoshakyo, na mrihiyo hakyo, shose shiwei sha kindo kimu nakyo, 18nakyo kiwewode mbaha tsiṟaru tsiwukie owarinyi lokyo; mbaha tsiṟaṟu tsa kinaṟakyo hawei oralu, na mbaha tsiṟaṟu tsa kinaṟakyo hawei oralu, 19shikombeshiṟaṟu, shiweshisungusie cha ofano lo shiwaṟo sha mlozi, shiwei kiidi kya mbaha imu, mrihiyo fumu na kiwaṟo; na shikombe shiṟaṟu shiweishisungusie cha ofano lo shiwaṟo sha mlozi mbahenyi ya kawi, mrihiyo na kiwaṟo; na wudo kiwei ko mbahatso tsiṟandaṟu tsiwei kulya kimnaṟenyi, 20kulya kimnaṟenyi kuweipfo shikombe shiina, shishisungusie kui ofano lo shiwaṟo sha mlozi mamrihiyo hakyo na shiwaṟo shakyo; 21wanda ya mbaha tsiwi kuwewode mrihiyo liwei lya kindo kimu nakyo na wanda ya mbaha tsingi tsiwi kuwewode mrihiyo lyiwei kindo kimu nakyo; na wanda ya mbaha tsingise tsiwi kuwewode mrihiyo lyiwei kindo kimu nakyo; kipfa kya mbahatso tsiṟandaṟu, halewukana nakyo. 22Mrihiyo yo yake na mbahatso tsake tsiwei tsa kindo kimu; kinaṟakyo kyose daa nyi iṟunda limu lyetsana, lya sahabu njicha. 23Kiidima kasungusia taa tsakyo mfungade, na mhado hakyo, shisahanyi shakyo, sha sahabu njicha. 24Kakisungusia kya kilogramu 35 sha sahabu njicha handu hamu na shihia shayo shose.

Rasio ya shidaso shepfaama

(Iwu 30:1-5)

25Kiidima kasungusia rasiolyo lyedutsia uvumba ya ikidi lya mshita; wuleshe wolyo nyi wuwei sentimita 45,, na wulandari wolyo wuwei sentimita 45, lyiwehianyi kose kose; wuleshe wodo huye wuwei sentimita 90; na ndumba tsake tsiwei tsa kindo kimu. 26Nao kaishikia na sahabu njicha ora lo huye, na mbarinyi tsake njora tsose, na ndumbatso tsayo; kaisungusia minga ya sahabu ikatengetia njora tsose. 27Nao kasungusia pete tsiwi tsa sahabu katsiwika wanda ya mingatso tsayo, njowarinyi tsayo tsiwi, kiidi kya njora tsake tsiwi, shiwe nyi handu hewika mashidi heiiria. 28Numa kasungusia mashidi ho ha ikidi lya mshita na iishikia na sahabu.

Isungusia mafuda heshimbuo, na hepfaamiṟa

(Iwu 30:22-38)

29 Numa kasungusia mafudaho maele heshia, na uvumba wulya mcha, na shiwungo sha opfaamo lucha, kui wuhendeli wo mndu mosungusia shindo sha opfaamo.

Currently Selected:

IWUKA 37: KIM2

Highlight

Copy

Compare