IWUKA 5

Mose na Aroni oshangunyi lo Farao

1Numa, Mose na Aroni wakahenda iwia Farao, wehamba, “Mndumii-Ruwa o Israeli, nahamba adi, ‘Inenga wandu wako momu wahende, kundu wanjisungusie mkonu mnene ipfo nuka.’” 2Farao kahamba, “Mndumii-Ruwa nyiu, tane ngaicho ṟu lyake, na iinenga Waisraeli momu wakuhendie kowo? Inyi njiichi Mndumii-Ruwapfo, manya njechiinenga Waisraeli wahende kowopfo.” 3Wakahamba, “Ruwa o Waebri alekumbuhana naso; lokuterewa, luinenge momu luhende kyaṟo kya mkonu iṟaṟu kulya nuka, luwutiepfo Mndumii-Ruwa, Ruwa odu kidaso; nalachekukapa kui ndaaṟe ang'u oshu.” 4Mangi ya Misri kawawia, “Lanye Mose na Aroni, nki ili muihataṟa wandu kiṟundionyi kyawo? Hendenyi na maṟio hanu.” 5Kiidima Farao kahamba, “Ambuyenyi, wandu wa iya orukenyi nyi wafoi, nanyo muiwadokosha, walakudike maṟio hawo.”

6Mkonu na fulya fulya Farao kawawasa wachili na walya wehoṟokia wandu kechihamba, 7“Mulainengese wandu maṟa hesungusia matofaṟi, chandu muweichiwie wuka mawokioonyi; wahende iende maṟa wo wawenyi. 8Kyaindi iitala lya matofaṟi mulaanguṟe manyale, kyamba iwa nyi wai wadoko; ko ikyo waikoṟoṟoma, wehamba, luinenge momu luhende iwutia Ruwa odu kidaso. 9Inengenyi wanduwo kiṟundio kiumu-umu ngoseṟa, waturuchuke, manya walechiadanyia madedo ha wongo.”

10Wachiliwo wa wandu na walya wehoṟokia wandu wakakure, wakadeda na wandu, wehamba, 11“Farao nahamba adi, ‘Inyi njechimuinenga maṟapfo.’ Kekuhendienyi nyo muwenyi, mukuwutie maṟa o handu mochihawona; kyamba iṟunda lyanu lyechianguṟo manyalepfo.” 12Kyasia, wanduwo wakanyanyaṟikia orukenyi lose lo Misri kundu waidime isanyiapfo masaho ha mademenyi handu ha maṟa. 13Wachili wawo wakawaitika, wehamba, “Awutsienyi iṟunda lyanu, ṟungusu tsanu tsa orio mkonu, cha lilya mandi maṟa haweipfo.” 14Na walya wehoṟokia wana wa Waisraeli, walya wachili wa Farao walewawika, wakakapo, wewio, “Nki ili mulaleawutsia iṟunda lyanu wukowu na inu; mochikapa matofaṟi cha lilya mawokioonyi?” 15Kyasia, wehoṟokia walya wa wana wa Waisraeli wakahenda, wakafihiṟia Farao, wehamba, Nki ili oluwutia kudi, so masinga hapfo? 16Masinga hapfo wainengose maṟapfo, nawo wailuwia, “Kapenyi matofaṟi; na ambuya, masinga hapfo waikapo; kyaindi dekolyi nyi lya wandu wapfo iyo kumonyi.” 17Kahamba, “Nyo nyi mui wadoko; wadoko; kipfa kya iki muihamba, luinenge momu luhende iwikia Mndumii-Ruwa kidaso? 18Kyasia hendenyi wulalu, muhende ṟunda; kyamba mochiinengose maṟapfo, na handu hamu na isho mochiende iitala lilya lilya lya matofaṟi.” 19Nahong'u wehoṟokia wa wana wa Waisraeli wakawona ke wai handu hawicho lilya walewio, “Mochianguṟio iitala lya matofaṟi hanu manyalepfo; itso ntso ṟungusu tsanu tsa orio mkonu.”

20Wakakoyana na Mose na Aroni, wahoṟoki njienyi lilya walewuka ko Farao; 21Wakawawia, “Mndumii-Ruwa nawaambuye na idumbuo; kipfa muletana opfaamo lodu lukowa luwicho oshangunyi lo Farao na oshangunyi lo waṟundi wake, mukawika oshu mawokonyi hawo, waluwaahe.” 22Mose kawuuya Mndumii-Ruwa, kahamba, “Mndumii-Ruwa nki ili kulewutia wanduwa mawicho? Nki ili kulenjiduma inyi? 23Cha kipfa wokia njilehenda ko Farao, ngadeda nao kui rina lyapfo, nalewutia wandu wa mawicho; manya kuleashuo wandu wapfo manyalepfo.”

Currently Selected:

IWUKA 5: KIM2

Highlight

Compare

Copy