IWUKA 6

1Mndumii-Ruwa kawia Mose, “Wulalu nochiwona chandu njechiwutia Farao; kyamba kui owoko lukahari nechiwainenga momu wakuhendye kowo, na kui owoko lukahari nechiwafuna orukenyi loke.”

Mndumii-Ruwa alaha Mose

2 Numa Ruwa kadeda na Mose kambia, “Inyi nyi Mndumii-Ruwa ; 3na Inyi njilewonekia Abrahamu, na Isaki, na Yakobo, cha Ruwa Menyiwuitoṟi, indi kui rina lyako Mndumii-Ruwa njilemanyika kowopfo. 4Njileṟingishiase mkundana foko nawo fowainenga oruka lo Kanaani, oruka walekaapfo cha wahenu. 5Na ngoseṟa ya isho, njileicho isungulula lya wana wa Waisraeli, sa Wamisri walewawada masinga, na inyi ngakumbuo mkundana foko. 6Kyasia, wia wana wa Waisraeli, lnyi nyi Mndumii-Ruwa, na inyi njechimuwuta nyo muwuke ipfo shia maṟio ha Wamisri, na inyi njechimuashuo wusingenyi wowo, na inyi njechimukiṟa kui owoko luhoṟotsu, na kui mwanduye fung'anyi; 7na inyi njechimuira muwe wandu wako, njechiwa Ruwa konu, nanyo mochimanya ke inyi nyi Mndumii-Ruwa, Ruwa onu, njimuwutie mkure kiidi kya maṟio ha Wamisri. 8Na inyi njechimuende mṟasa orukenyi sa njileiria owoko loko njiinenge Abrahamu, Isaki, na Yakobo; njechimuinenga luwe kioṟa kyanu; inyi nyi Mndumii-Ruwa.” 9Mose kawia wana wa Waisraeli madedoha, kyaindi walaadanyie Mose kipfa kya fowa mrimenyi, na kipfa kya wuumu wo wusinga.

10Mndumii-Ruwa kadeda na Mose, kambia, 11“Ida na mba, nodede na Farao, mangi ya Misri, kundu nainenge momu wana wa Waisraeli wawuke orukenyi.” 12Mose kadeda oshangunyi lo Mndumii-Ruwa, kahamba, “Ambuya, wanawo wa Waisraeli wanjiadanyia inyipfo; Farao chu nechinjiadanyia ada, inyi njii na momu njilemeri?” 13Mndumii-Ruwa kadeda na Mose na Aroni, kawawawasa wahendie wana wa Waisraeli, na Farao, mangi ya Misri, kundu nawute wanawo wa Waisraeli wawuke orukenyi lo Misri.

Kishari kya Mose na Aroni

14Iwa nyiwo mdo ya mba tsa wandeawo; wana wa Reubeni, mana mmbee o Israeli; nyi Enoki na Palu, na Hesroni, na Karmi; iwo nyi mbaṟi ya Reubeni. 15Na wana wa Simeoni; Yemueli, na Yamini na Ohadi, na Yakini, na Sohari, na Shauli mana o mndu mka o Kikanaani; iwo nyi mbaṟi ya Simeoni. 16 Na iha nyiho marina ha wana wa Lewi, chandu shisharisho shii; Gershoni, na Kohathi, na Merari; na maka ya moo fo Lewi iweshikie maka ihana na makumi haṟaṟu na mfungade (137). 17Wana wa Gershoni; nyi Libni, na Shimei, chandu mbaṟi tsawo tsii. 18Na wana wa Kohethi; nyi Amramu, na Ishari, na Hebroni, na Uzieli; na maka ya moo fo Kohathi-cho nyi ihana na makumi haṟaṟu na iṟaṟu (133). 19Na wana wa Merari; nyi Mali, na Mushi. Itsi ntso mbaṟi tsa Walewi-wo chando shishari shawo shiwei. 20Amramu-cho kaalika Yokebedi manomae o ndee; nao kammbonyia Aroni na Mose; na maka ya moo fo Amramu nyi iwei maka ihana na makumi haṟaṟu na mfungade (137). 21Wana wa Ishari; nyi Kora, na Nefegi, na Zikri. 22Na wana wa Uzieli; nyi Mishaeli, na Elisafani na Sithri. 23Aroni kaalika Elisheba, mana o waka o Aminadabu, mshiki o Nashoni; nao kamfeea Nadabu, na Abihu, na Eleasari, na Ithamari. 24Na wana wa Kora; nyi Asiri, na Elkana, na Abiasafu; itsi nyitso mbaṟi tsa Wakora-wo 25Na Eleasari mana o Aroni kaalika umu o kiidi kya wana wa kika wa Putieli; na kamfeea Finehasi. Iwa nyiwo wandu wa mdo wa waku wa Walewi sumhana na washari wawo. 26Iwa nyi Aroni ulya ulya, na Mose ulya ulya, Mndumii-Ruwa alewawia, kechihamba, “Irenyi wana wa Waisraeli wawuke orukenyi lo Misri kui matorito hawo. 27Nyi iwo walededa na Farao mangi ya Misri kundu nawute wana wa Waisraeli wawuke Misri; nawo nyi Mose ulya ulya na Aroni ulya ulya.”

Mose na Aroni waindia mawawaso ha Ruwa

28Fuwei mkonu fo Mndumii-Ruwa alededa na Mose kulya orukenyi lo Misri, Mndumii-Ruwa kawia Mose, 29kahamba, “Inyi nyi Mndumii-Ruwa; wia Farao mangi ya Misri madedo ho hose njikuwia.” 30Mose kadeda oshangunyi lo Mndumii-Ruwa, “Inyi nyi mndu njilaichi ideda necha, Farao nechinjiicho ada?”

Currently Selected:

IWUKA 6: KIM2

Highlight

Compare

Copy