IWUKA 7

1Mndumii-Ruwa kawia, Mose, “Ambuya, ngakutana iyo nowe cha Ruwa ko Farao; na manomayo cho opfo Aroni nechiwa muikimbi kopfo. 2Nochideda isho shose njikuwawasia; na manomayo Aroni nechideda na Farao, kundu nainenge wana wa Waisraeli momu wawuke orukenyi loke. 3 Na inyi njechiumiṟa mrimafo fo Farao, na inyi njechiwuta njofano tsifoi na ṟiho tsako orukenyi lo Misri. 4Indi Farao echimuadanyiapfo, na inyi njechihekia owoko loko huya Misri, na iwutapfo matorito hako, wandu wako, wanawo wa Waisraeli, wawuke orukenyi lo Misri kui mdumbuye ing'anyi. 5Na Wamisri wechimanya ke inyi njii Mndumii-Ruwa, ili njechihoṟoya owoko loko Misri na iwutapfo wana wa Waisraeli wawuke kiidi kyawo.” 6Mose na Aroni wakawuta wado; chando Mndumii-Ruwa alewawia, na wudo walewuta; 7Mose chu nyi awei mndu o maka makumi nyanya (80), na Aroni nawei mndu o maka makumi nyanya na iṟaṟu (83), mandiho walededa na Farao.

Ndichi ya Aroni

8Mndumii-Ruwa kadeda na Mose na Aroni, kahamba, 9“Ili Farao echideda nanyo, namuwie, kewutenyi ṟiho; nlyondi ochiwia Aroni, ‘Wada ndichi yapfo, noikape wanda oshangunyi lo Farao, kundu ihaluke njoka.’” 10Kyasia, Mose na Aroni wakaida na ko Farao, wakawuta wado chandu MNMDUMII ewawia, Aroni kakumba wanda ndichi iya yake oshangunyi lo Farao, na oshangunyi lo waṟundi wake, ikahaluka njoka. 11Nalyo Farao nao kalaha waṟango wake na wasawi; nawo weambia wana wa Misri wakawewuta wado kui wuhangawo wowo. 12Wakakapa wanda orio mndu na ndichi yake, natso tsikahaluka njoka; kyaindi ndichi ya Aroni ikameṟa ndichi tsilya tsawo. 13Mrima fo Farao lfukawa muumu nalawaadanyie; chandu Mndumii-Ruwa alehamba.

Ngapo ikumi

(Iwu 34:18-26)

14Mndumii-Ruwa kawia Mose, “Mrima fo Farao fumlemeri, naleha inenga wandu momu wakuhendie. 15Hendia Farao ngamenyi; ambuya, naikure ihenda mṟingenyi; na iyo hoṟoka kufui wambaṟa ha meda kundu noidime iwonana nao; na ndichi iya ilehaluka ikawa njoka nochiiduo owokonyi lopfo. 16Na iyo nommbie, ‘Mndumii-Ruwa, Ruwa o Waebri, nanjiduma kopfo, ikuwia, Inenga wandu wako momu, kundu wahende injiindia ipfo nuka; na iyo omenjiicho mṟasa wulalupfo.’ 17 Mndumii-Ruwa nahamba, ‘Kya mbonyitsi nochinjimanya ke inyi nyi Mndumii-Ruwa; ambuya, njikapa mṟingafu fo ipfo medenyi na ndichi ii njiwode owokonyi loko, nafo fochihaluka fuwe samu. 18Na makungaho hai ipfo medenyi hechipfa, na medafo fochiwada mdao mmbicho; na Wamisiri-wo wechisukio inyo mṟingafo fo medenyi.’” 19Mndumii-Ruwa kawia Mose, “Wia Aroni, Wada ndichi yapfo, hoṟuo owoko lopfo huya mṟinga fo Misri, huya meda yawo, huya shimeda shawo, na huya, nduwa tsawo tsa mṟinga, na huya maṟungu hawo hose ha mṟinga, kundu fuhaluke fuwe samu, napfo kochiwada samu orukenyi lo Misri lose, kiidi kya shihia sha shidi, na kiidi kya shihia sha maho.” 20Mose na Aroni wakatana wado chandu Mndumii-Ruwa alewawia; nao kairia ndichi iya, kakapa mṟinga fulya fo medenyi, oshangunyi lo Farao, na lo waṟundi wake; na mṟingafo fo medenyi fose fukahaluka fukawa samu. 21Makungaho hawei ipfo medenyi naho hakapfa, na meda nafo fukadaa mdao mmbicho, Wamisri walaidime inyo mṟinga fo medenyi; na samu iya iwei orukenyi lo Misri lose. 22Kyaindi wahanga wa Misri wakawewuta mfanano fo isho kui wuhanga wowo na mrima fo Farao fukawa muumu, manya nalawaadanyie, chandu Mndumii-Ruwa alewehamba. 23Farao katengeta kaida na mba koke, manya ma ilyo aleliwika mrimenyipfo. 24Wamisri wose wakasuma-suma mbai ya meda kundu wakuwonyiepfo mṟinga fonyo; kyamba, waleidima inyo mṟinga fulya fo medenyipfo. 25Ikasia mkonu mfungade, numa ya Mndumii-Ruwa amkapa meda fulya.

Currently Selected:

IWUKA 7: KIM2

Highlight

Compare

Copy