IWUKA 8

Ngapo ya kawi: Shilo

1Mndumii-Ruwa kawia Mose, “Ida na ko Farao, nommbie, ‘Mndumii-Ruwa nahamba adi, Inenga wandu wako momu, kundu waidime injiṟundia. 2Na kokoya olehase iwainenga momu, ambuya, njechikapa mṟasa yapfo yose njiende ngele, 3na medafo fochiichuo ngelepacha, natso tsechidoya huye tsiide na mba kopfo, na kiṟihenyi kyapfo kelaa, na kitaṟenyi kyapfo, na mmbenyi ya waṟundi wapfo, na huya wandu wapfo, na kiidi kya mariko hapfo, na kiidi kya shihia shapfo sheruwikia mso. 4Na lyefurumia shilo sho shechikudoya iyo, na huya wandu wapfo, na huya waṟundi wapfo wose.’” 5Mndumii-Ruwa kawia Mose, “Wia Aroni, ‘Hoṟuo owoko lopfo na ndichi yapfo huya meda, huya shimeda, na huya nduwa; tsa mṟinga, noendepfo ngele tsicheye orukenyi lose lo Misri.’” 6Kyasia, Aroni kahoṟuo owoko loke huya mṟinga yose ya Misri; na ngeletso tsikadoya huye, tsikapfumba oruka lo Misri. 7Walasha nawo wakawewika wado kui wuhanga wowo; wakaende ngele orukenyi lo Misri. 8Nalyo Farao kalaha Mose na Aroni kawawia, “Terewenyi Mndumii-Ruwa, nakewuta ngeletsi kunu koko na ko wandu wako; na inyi njechiinenga wanduwa momu wakuhendie; kundu wawutie Mndumii-Ruwa kidaso.” 9Mose kawia Farao, “Kyakusia hamba nyi indi ukundi njikuterewie iyo, na waṟundi wapfo, na wandu wapfo, kundu ngeletso tsikombetso tsiwuke kopfo iyo na mmbenyi tsapfo, tsikae kunu medenyi tupu.” 10Farao kambia, “Ngama.” Kahamba, “Kikekuwia kido chandu ohamba; kundu nokuwutieho imanya ke kuipfo ang'anyi cha Mndumii-Ruwa, Ruwa odupfo.” 11Ngeletso tsechiwuka kopfo, na mbenyi tsanu, na ko waṟundi wapfo na ko wandu wapfo, wakae ipfo medenyi Nili tupu 12Kyasia, Mose na Aroni wakawuka ko Farao; Mose kaeṟeṟia Mndumii-Ruwa kipfa kya ngeletso aweendie huya Farao. 13Mndumii-Ruwa kawuta kya sumhana na idedo lya Mose na ngeletso sikapfa kuwuka kulya mmbenyi, na mapatenyi, na mademenyi. 14Wakatsiwumbia sohu kui sohu; na oruka lukadaa mdao mmbicho. 15Indi Farao kekiwona amewuyo nyi moo, kahaluo mrima fulya foke fukauma, nalakiwaadanyie; chandu Mndumii-Ruwa alehamba.

Ngapo ya kaṟaṟu: Nda

16Mndumii-Ruwa kawia Mose, “Wia Aroni, Hoṟuo ndichi yapfo, nokape kilulyi kya orukenyi, kundu kukaepfo nda iya orukenyi lose lo Misri.” 17Nawo wakawuta wado: Aroni kahoṟuo owoko loke na ndichi yake, kakapa kilulyi kya orukenyi, nakyo kikawa nda huya wandu na huya shuma; kilulyi kyose kya orukenyi kikawa nda orukenyi lose lo Misri. 18Na wahanga wa Misri nawo wakawewuta ofano ludi kui wuhanga wowo, ke wakeende nda, kyaindi walaidime; kukawada nda, huya wandu, na huya shuma. 19 Nalyo wahanga walya wakawia Farao, “Iki nyi kimnyo kya Ruwa;” na mrima fo Farao fukawa mlemeri, nalawaadanyie; na wudo da chandu Mndumii-Ruwa ewawia.

Ngapo ya kaana: Nzi

20Mndumii-Ruwa kawia Mose, “Kure ngamenyi otuko nohoṟoke sumhana na Farao; ambuya naikure nahende mṟingenyi, nokemmbia, ‘Mndumii-Ruwa nahamba: Inenga wandu wako momu wakuhendie kundu wanjiṟundie inyi. 21Ang'u kokoya kulainenga wandu wako momu, ambuya, njiende tendemṟa ya nzi huya wandu wapfo, tsechiida mmbenyi tsapfo; na mba tsa Wamisri tsechiichuo tendemṟa ya nzi na orukenyi kose. 22Na inyi mkonufo njechiletsana oruka lo Gosheni, handu wandu wako wekekaa, kundu nzi tso tsilakaepfo; kundu iyo nowuteho imanya ke inyi nyi Mndumii-Ruwa, kiidi kya wuyana. 23Na inyi njechiwikaho mṟasa kiidi kya wandu wako na wandu wapfo; na ṟiho i yechiendo ngama.’” 24Mndumii-Ruwa, kawuta ado; kukocha tendemra nzi tsa kiṟiha mnu nakamu, tsikaida na mba ko Farao, na mba ko waṟundi wake, na orukenyi lose lo Misri; nalo oruka lukanyamaṟika kipfa kya nzi tso. 25Farao kalaha Mose na Aroni kawawia, “Henda wikienyi Ruwa onu kidaso kunu orukenyi.” 26Mose kahamba, “Kiluwaṟi iwuta ludopfo; kyamba lochishinjia Mndumii-Ruwa, Ruwa odu kidaso, na mawichoho ha Wamisri ngesa! Na locheshinjia kidaso mawichoho ha Wamisri mesonyi hawo, wade walalukapa na maho? 27O manyale, lochihenda kyaṟo kya mkonu iṟaṟu ipfo nuka, lushinjiepfo Mndumii-Ruwa odu kidaso, chando aleluwawasa.” 28Farao kahamba, “Inyi njechimuinenga momu muhende, kundu mushinjie Mndumii-Ruwa onu kidaso, ipfo nuka; indi mochihenda haleshe mnupfo; kyasia njiterewienying'u.” 29Mose kahamba, “Ambuya inyi ngawuka kopfo, njechiterewa Mndumii-Ruwa kundu nzi tso tsiwuke ko Farao, na waṟundi wake, na wandu wake ngama; kyaindi nalawutese kui wulembi, kui ida alalekia wandu wahende ishinjia Mndumii-Ruwa kidaso.” 30Mose kawuka ko Farao, katerewa Mndumii-Ruwa. 31Mndumii-Ruwa, kawuta chandu Mose alededa, kawutapfo nzi tsilya tsiwicho ipfo ko Farao, na ko waṟundi wake, na wandu wake; kuladeyopfo manyaimu. 32Kambalyo Farao kaweumiṟa mrima foke, manya nalainenge wanduwa momu wakuhendie.

Currently Selected:

IWUKA 8: KIM2

Highlight

Compare

Copy