IWUKA 9

Ngapo ya katanu: Njopfu tsa shuma

1Naho Mndumii-Ruwa kawia Mose, “Iyo ida na ko Farao, nommbie, ‘Mndumii-Ruwa, Ruwa o Waebri, nahamba: Inenga momu wandu wako kundu wahende njiṟundia. 2Kyamba koleha iwainenga momu wahende, koengeṟa iwaima, 3ambuya, owoko lo Mndumii-Ruwa lui huya shuma shapfo ushiwikie kulya pichinyi, na huya frasi, na huya nzoi, na huya ngamia, na huya mmbe, na huya machondi; kochikaapfo iwawe lilemeri mnu. 4Lyefurumia Mndumii-Ruwa nechiletsana shuma sha Waisraeli na shuma sha Wamisri; manya kochipfa ma kimu kya shuma sha Waisraelipfo.’ 5Nao Mndumii-Ruwa, kateṟia mkonu, kahamba, ‘Ngama Mndumii-Ruwa, nechiwuta mbonyitsi iya orukenyi.’” 6lyi lya ngama Mndumii-Ruwa, kawuta mbonyi tso, na shuma shose shishiwikie kulya Misri shikapfa; kyaindi kiidi kya shuma sha Waisraeli kulapfeho ma kimu. 7Farao kaduma wandu, na ambuya, kuwode ma umu o wana wa Israeli alepfapfo. Kyaindi mrima fo Farao fuwei mlemeri, manya nalainenge waduwo momu wakuhendie.

Ngapo ya Kaṟandaṟu: Maude

8Mndumii-Ruwa kawia Mose na Aroni, “Irenyi ohi lo mafu ha nungunyi ya modo, numa Mose nahakumbe huye ruwehu oshangunyi lo Farao. 9Naho hechiwa mafu mamamiri huya oruka lo Misri lose, naho hechiwa maude hechishimba na ipuṟuka ko wandu na ko shuma, orukenyi lo Misri lose.” 10 Kyasia wakaira mafu ha nungunyi ya modo, wakahoṟoka oshangunyi lo Farao; Mose kahakumba huye ruwehu naho hakawa maude heshimba na ipuṟuka ko wandu na ko shuma. 11Nawo walasha walya walaidime ihoṟoka oshangunyi lo Mose kipfa kya maude halya, cha kipfa na walashawo walewewado nyi maude, na Wamisri wose wawewodo. 12Mndumii-Ruwa kaumiṟa mrima fo Farao, nalawaadanyie, na chando Mndumii-Ruwa awewie Mose.

Ngapo ya mfungade: Mvuo ya Manzaho

13Mndumii-Ruwa kawia Mose, “Kure ngamenyi otuko, nohoṟoke oshangunyi lo Farao, nommbie, ‘Mndumii-Ruwa o Waebri, nahamba: Inenga wandu wako momu kundu wahende injiṟundia. 14Kyamba kiheri ki njiende ngapo tsako tsose huya mrima fopfo, na huya waṟundi wapfo, na huya wandu wapfo; kundu nowuteho imanya ke kuwode ungi cha inyi kunu wuyanenyi kosepfo. 15Kipfa kiheriki kokoya mbemehoṟuo owoko loko, njikukape iyo na wandu wapfo, kui ndaaṟe ya nzi, na iyo nowerumatsio kuleshe na iwuto iya orukenyi; 16 kyaindi, njilekuhoṟotsa iyo kipfa kya iki, kundu njikuloṟe wuidimi woko, na kingise ke rina lyako, lihambo wuyanenyi kose. 17A iyo, ngesa! Na ikutimbisha oi huya wandu wako, kulawainenge momu wakuhendie? 18Ambuya, ngama kiheri cha iki, njechiolotsa mvuo ya manzaho sa njiwawo, sa ilalemewono kunu Misri wokia mawokyonyi mṟasa wulalu. 19Kyasia, wulalu duma owinyi faṟa waitike shuma shapfo shiide na mba na isho shose uwode ipfo mademenyi hapfo; kyamba orio mndu ang'u shuma echikoyo demenyi, alameitso na mba, nechikapo nyi mvuoyo ya manzaho, nawo wechipfa.’” 20Msa aleindia idedo lya Mndumii-Ruwa kiidi kya waṟundi wa Farao naledichiṟa waṟundi wake na shuma shake shiide na mba. 21Na ulya alaleindia idedo lya Mndumii-Ruwa mrimenyi foke naleda waṟundi na shuma shake mademenyi.

22Mndumii-Ruwa kawia Mose, “Leshia owoko lopfo ruwehu, kundu kukape mvuo ya manzaho orukenyi lose lo Misri, huya wandu na huya shuma, na huya shindo shose sha mademenyi, orukenyi lose lo Misri.” 23Mose kaleshia owoko loke ruwehu; na Mndumii-Ruwa kaende makuṟuṟuma na mvuo ya manzaho; na modo fukaoloka orukenyi; Mndumii-Ruwa kaende mvuo ya manzaho orukenyi lose lo Misri. 24 Kyasia, kukakaapfo mvuo ya manzaho, na modo fulonganyi na mvuo iya ya manzaho, njiwawo mnu, sa ilalembono orukenyi lose lo Misri wokia lowa mkambo. 25Na mvuo iya ikakapa orio kiwei mademenyi kyose, mndu o wandu, na shuma, orukenyi lose lo Misri; mvuo yo ya manzaho ikakapa orio kilimu kya mademenyi, na ifunja orio ikidi lya mademenyi. 26Orukenyi lo Gosheni tupu, handu wana wa Waisraeli wawei nyihondo mvuo ya manzaho ilalekapa. 27Farao kaduma wandu, kalaha Mose na Aroni kawawia, “Kambalyi inyi njii mdeko; Mndumii-Ruwa nyio menyi kiilohi, na inyi na wandu wako luiwawicho. 28Terewenyi Mndumii-Ruwa; cha kipfa makuṟuṟuma ha hang'anyi mnu na mvuo yo ya manzaho hashikie, na inyi njechimuinenga momu mukuhendie, mlakaese ngoseṟa.” 29Mose kambia, “Ngamekure kunu mṟinyi njechiiria Mndumii-Ruwa mawoko hako, na makuṟuṟuma ho hechitsitsa, manya kochikaapfo mvuo ya manzahopfo; kundu nowuteho imanya ke wuyanawu nyi wo Mndumii-Ruwa. 30Kyaindi, iyo na waṟundi wapfo, njiichi ke mochiindia Mndumii-Ruwapfo. 31Mbeke na katanyi na shairi tsilekapo; kipfa mbeke tsiwei ipucha na shairi tsiwewaṟa shiwaṟo. 32Kyaindi Ngano na shifananyi nayo shilekapo pfo; kyamba shiwemeoṟepfo.” 33Mose kakure kulya mṟinyi, kawuka ko Farao, kaleshia Mndumii-Ruwa mawoko hake; makuṟuṟuma halya na mvuo iya ya manzaho shikatsitsa, manya mvuo ilakapese orukenyi. 34Farao kekiwona ke mvuo na mvuo ya manzaho na makuṟuṟuma shatsitsa, kaengeṟa iwuta wunyamaṟi, na iumiṟa mrima foke, o na waṟundi wake. 35Mrima fo Farao fukauma, nao nalainenge wana wa Waisraeli momu wakuhendie; chandu Mndumii-Ruwa alewehamba kui dumbu lya Mose.

Currently Selected:

IWUKA 9: KIM2

Highlight

Compare

Copy