WALEWI 17
17
Wuhendelyi wo samu
1Mndumii-Ruwa kawia Mose, kehamba, 2“Deda na Aroni, na wana wake, na wana wose wa Waisraeli, uwawie; Idedolyi nlyo Mndumii alelyiwawasia kehamba, 3Mnducho oose o mba ya Waisraeli echishinja mmbe, ang'u kidahina kya ichondi, ang'u mburu, kiidi kya mfiṟihenyi, ang'u sa echimshinjia nja ya mfiṟiha, 4manya nalemende na mongo fo ihema lyesanzia, kundu nalekie mwano ko Mndumii mongo fo ihema lya Mndumii; mnducho nechiitalo ke nawode mti fo samu; napusuo samu; na mnducho nechiletsano kuleshe na wandu wake; 5kundu wana wa Israeli waende mwano yawo, waishinjie mademenyi, ee-da waendie Mndumii tane mongo fo ihema lyesanzia ko mkohanyicho, natsishinje tsiwe mwano fo ofoṟo ko Mndumii. 6Nao mkohanyi nechiolia samu yake huya rasio lya Mndumii, mongo fo ihema lyesanzio na ikora mafuda hakyo, hawe opfamo lucha oshangunyi lo Mndumii. 7Manya wechilekiase shiano shawo wainenge waṟumupfo, iwo wekewapfula kundu wawute nawo wuṟuhui. Iwawasolyi lyechiwa iwawaso lya mlungana kowo kishari numa ya kishari.
8“Na iyo nochiwawia, Mnducho oose kiidi kya mba ya Israeli, ang'u kiidi kya wahenu, wekekaa nawo, ekelekia kidaso kekoṟa ang'u kidaso, 9manya alaende na mongo fo ihema lyesanzia, kundu naisembeṟie ko Mndumii, kyasia mnducho nechiletsano na wandu wake.
10 “Na mndu oose o mba ya Israeli, ang'u kiidi kya wahenuwo wai kiidi kyawo, echinyo samu, ya mbaṟiyo yose, njechilema kyamu kyako koke mnducho ekenyo samu, na Inyi njechimkumba kuleshe na wandu wake. 11 Kyamba moo fo mbihu nyi ipfo samunyi fui, na Inyi ngamuinenga nyo samuyo rasionyi, kundu muwike kisanza kipfa kya mrima yanu; kipfa nyi samuyo yekewika kisanza kipfa kya mrima yanu. 12Ko ikyo njilewia wana wa Waisraeli, kuwode momu mndu o konu nanyo samupfo, manya mhenu ai kiidi kyanu nalanyo samu.
13“Mnducho oose ai o wana wa Waisraeli, ang'u o wahenuwo wai kiidi kyanu, sa echiwada indo lii na moo, ang'u ilehe lyekelio, kilasionyi kyake; nechipusuo samu yalyo, na iishikia terinyi.
14“Kyamba kundu kui moofo fo indo nyi ipfo samunyi yalyo; ko ikyo njilewia wana wa Waisraeli, mulalye samu ya mbaṟi yose ya indo; kyamba moo fo mando hose nyi kiidi kya samuyo yaho; icho oose echiilya nechiletsano na wandu. 15Kingise, orio mndu echilya mnying'a, ang'u nyama sa iraherahe nyi indo, kokoyanyi mndu amfee kiidi kyanu, ang'u nyi mhenu, nechisanja nguo tsake, nawesamba kose na mṟinga, nao nechiteṟefuka mṟasa kyukanyi; nlyondi echiheṟemka 16indi kokoya alatsisanja, manya nalasambe kose nlyondi echikudika wuwicho woke.”
Currently Selected:
WALEWI 17: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.