WALEWI 22
22
Wuele wo mwano
1Mndumii -Ruwa, kawia Mose, 2“Wia Aroni na wana wakohanyi waindie shindo Waisraeli wameshinjishimbuya walashike iruma rina lyako liele. “Inyi nyio Ruwa.” 3Wawie kudi, “Kokoya umu o iwo wai wafee konu ipfo shisharinyi shanu shose atikiria shindo shiele sa Waisraeli wameshinjishimbuya Inyi Mndumii-Ruwa owo, ateṟefukie, nechiletsano na Inyi. Inyi nyio Mndumii-Ruwa. 4Mndu oose o kisharinyi kya Aroni kokoya nawodo nyi ndaaṟe ya saka ang'u nyi yewuka ofia nalalye shindo shiele mṟasa naheṟemke. Mndu oose kapaya mndu ateṟefukie kui ipaya mnying'a ang'u mndu aiwuka maachi, 5ang'u kapaya ikyo kyose kekekukuruo wanda sa kekeendie mndu iteṟefuka ang'u mndu eidima imteṟefutsa kui njia yo yose, 6mnducho, nechiteṟefuka tane kyukanyi, na awode momu folya shelya, shielepfo mṟasa nasambe kose. 7Mnengeṟi fukameolokia nlyondi echiwa mheṟemtsu. Kombuka oo neidima ilya shelya shiele kipfa ikyo nyi kelya kyake. 8Mkohanyi nalalye nyama ya indo lyapfa lyilienyi ang'u lyawaaho nyi indo lya ngeṟenyi, nalashike ikuteṟefutsa. Inyi nyi Ruwa Menyipfinya. 9Koikyo kiwaṟi wakohanyi wawade iwawaso lyako, walacheiwuta wunyamaṟi na iwoho. Inyi Ruwa Menyipfinya nyio njilewashimbuo.”
10“Mndu alai o kishari kya wakohanyi awode momu folya kelya kielepfo. Manya mhenu ko mkohanyipfo ang'u mṟundi oke awode momupfo. 11Kokoya mkohanyi ahuṟie isinga lyikawa masaa hake, kyasia isingalyo lyiwode momu folya na walya wawafeeye ipfo kanyi kokeda. 12Kokoya mana o kika o mkohanyi amwalyike nyi mndu alai mkohanyi awode momu folya shelya shielepfo. 13Kyaindi kokoya manacho o waka o mkohanyi nyi mkusu, ang'u nalesamo na paruo nyi mii nao awode manapfo, nao nalewuya na ko ndeye, nakae nao cha lilya kuwoka ai mrika, oo keidimika nalye kelya kya ndeye. Manya kudo, mhenu awode momu folya shelyashopfo 14Kokoya mndu ungi alya shelya shiele alaichi, kyasia nechitaa kienga kya makumi hawi kya kelya kyo alya nawihiṟie mkohanyi. 15Mkohanyi nalateṟefutse shindo Waisraeli waendie Mndumii-Ruwa, 16na itewa wandu wawuwuyo wuwicho na wunyamaṟi kya ilya shindo shawo shiele. Inyi Mndumii-Ruwa, Ruwa-Menyipfinya nyio njileshimbuo shindosho.”
17Mndumii-Ruwa, nalewia Mose, 18“Wia Aroni na wana wake wakohanyi na Waisraeli wose kudi: Kokoya mndu oose kidi kyanu ang'u mhenu oose ekekaa kiidi kya Waisraeli kalekia kidaso kyake koya yeawutsia kyasa, ang'u nyi ya kiinengo ko Mndumii-Ruwa, fomaya modonyi, 19kundu naidikio, nalekie pung'a ang'u kioṟo ang'u isuwa lilawode tewe. 20 Nkikiime nakamu ilekia ikyo kyose kiwode tewe kipfa kechiidikio ko kiira kyanupfo. 21Mndu oose ili ekeinenga Mndumii-Ruwa, mwano fo ofoṟo kundu nainutsie kiasa, ang'u mwano fo nnga awuta mfiṟihenyi foke fo shuma, nkiwaṟi nalekie kiuma kiheṟemtsu; kiuma kyo kilawade tewe yose. 22Kulainenge Mndumii-Ruwa, kiuma kya mbaṟi yose ki kipfu meso, kilema, kifunjikie handu, kiwuko nyi ofia, kiwode uhee ang'u okuru, manya kulashiwute shiwe kidaso kemaya modonyi rasionyi lya Mndumii-Ruwa. 23Ipung'a ang'u huṟuwi liwode kiungo kimu kilesheleshe ang'u kifui kota nochiidima imlekia mwano fo nnga; indi kulamlekie mwano foawutsia kyasa. 24Kiuma sa kiungo kyakyo kya kulyo kikiwike kifaṟe, kilepoṟipotso, kifunjikie ang'u kikidumbuo kilainengo Mndumii -Ruwa manyale manya imbika kidaso orukenyi lopfo. 25Manya kulaambie kuwuka ko wahenu shuma sha mbaṟiyo na injiinengya Inyi Ruwa opfo cha kela. Shumasho shiwode tewe kipfa kya ili shishidumbuo wechiidikio ko kiira kyanupfo.”
26Mndumii-Ruwa, nalewia Mose, 27“Kukoshao ipunga, isuwa ang'u kioṟo kechikaa na mae mfiri mfungade. Wokya mfiri fo nyanya keidima iinengo Mndumii-Ruwa cha kidaso kemaya modonyi. 28Kyaindi manya kulashinje mmbe ang'u ichondi mfiri fumu handu hamu ihache lyayo. 29Kiheri ochinjiinenga Inyi Mndumii-Ruwa, kidaso keana nochilekia chando kechiidima sikutana noadanyio. 30Kiumakyo kiwaṟi kilio kyose mfirifo ifo; manya mulatsuhaṟe mṟasa ili lya ngama ngamenyi. Inyi nyio Mndumii-Ruwa.
31“Koikyo mochiwada na iinutsia mawawaso hako, Inyi nyio Ruwa. 32Mularume rina lyako liele, kyamba kiwaṟi njiindio kiidi kya wandu wa Israeli. Inyi nyio Mndumii-Ruwa, njilemuheṟemtsa. 33Nyio Inyi njilemuwuta orukenyi lo Misri kundu njiwe Ruwa onu. Inyi nyio Mndumii-Ruwa.”
Currently Selected:
WALEWI 22: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.